Skip to content

Skip to table of contents

Wichi toj yen Lhometa Heowa

Select language wichi

 NʼOCHUFWENYAJ 11

¿Atsi wichi toj ilesayen mʼak toj iyej pʼante Jesús?

¿Atsi wichi toj ilesayen mʼak toj iyej pʼante Jesús?

¿Ha lewʼen hinʼul toj ihi nʼopeyakna?​... Hopehen Mateo, Marcos, Lucas, Juan, Pedro, Santiago, Judas, wet Pablo. Nilhokej hinʼulna ichehen pʼante lewhay toj Jesús iche, wet lhamel ilesayen mʼak toj iyej pʼante Jesús. Lhek natetshan mʼak toj iyej pʼante lhameltso.

¿Ha lehanej atsi toj hopehen hinʼulna?

Tres hinʼultso hopehen pʼante apóstoles toj ihanlhi Jesús toj iwo lhometa. ¿Ha lehanej atsi toj hopehen tres hinʼulna?​... Mateo, Juan, wet Pedro. Hop apósteles Mateo wet Juan matche toj lhamel itafwelej pʼante Jesús, wet elh weihalhapej ilesayen  pʼante laka libro toj yome mʼak toj iyej Jesús. Hop apóstol Juan hate ilesayen pʼante libro toj lhey Apocalipsis wet tres cartas toj lheyis Hop Juan laka carta toj Ichun, laka carta elh toj Segunda, wet laka carta toj Tercera. Hop apóstol Pedro ilesayen pʼante dos cartas toj ihi Biblia toj lheyis Hop Pedro laka carta toj Ichun, wet laka carta elh toj Segunda. Laka cartana toj segunda, Pedro ilesayen pʼante lewhay toj Heowa yome Jesús toj tumho pele wet yopʼantek: ‹Hop tajtsi olhas. Matche toj ohumin, wet matche toj okajejlhi›.

Iyhaj hinʼul toj ihi nʼopeyakna, hate ichufwenej pʼante wichi mʼak toj iyej Jesús toj ihi libros toj lhamel ilesayen pʼante. Marcos hope elh lhameltso. Nʼalej toj hope pʼante lewhaytso toj nʼotsoklhi Jesús wet hiwʼenej pʼante nilhokej mʼayhay toj iche. Elh hinʼu toj ihi nʼopeyakna hope pʼante Lucas. Lhamtso hope pʼante kachawo wet nʼalej toj lhayen pʼante Cristo lakawoya toj tafwaytshi toj Cristo yʼil.

Dos hinʼul iyhaj toj ilesayen pʼante Biblia toj lewʼen toj ihi nʼopeyakna hopehen pʼante Jesús lechʼinhis. ¿Ha lehanej lheyis?​... Lheyis pʼante Santiago wet Judas. Toj ichun lhamel tʼekhahiyetʼa pʼante Jesús. Hate lhamel yenek hope elh toj welan. Mat toj paj lhamel tʼekhaye pʼante Jesús wet lhayen hopeya Cristo lakawos.

Nʼoelh toj lepes toj ihi nʼopeyakna toj ilesayen pʼante Biblia hope Pablo. Toj kamaj hopkhitʼa pʼante Cristo lakawo, lhey pʼante Saulo. Lham matche pʼante toj nʼayiho Cristo lakawos wet iwoyeje pʼante mʼayhay toj matche toj niʼisa. ¿Ha lehanej mʼak toj iwoye pʼante Pablo hopkhilak hope Cristo lakawo?​... Iche pʼante ifwala toj Pablo inukwe nʼayij, toj malhyejtso ilate nʼoelh lapak toj tumho pele. ¡Hope pʼante Jesús! Lham tayʼatshane pʼante Pablo: ‹¿Atsi toj tamenej letiyej afwitseyaj hop wichi toj tʼekha nʼoye?›. Toj tafwaytshi tajtso, hop Pablo iwo pʼante elha letichunhayaj wet nechʼe lhayen pʼante Cristo lakawoya. Pablo ilesayen pʼante catorce libros toj ihi Biblia, Romanos pajtha nichate Hebreos.

Is che nayahin Dios Lhomtes ifwalapej. Che nawoye tajtso, natʼayhettshi lhatafwnhayaj toj talhe mʼak toj Cristo iwoye pʼante. ¿Ha lewatlak letʼayhettshi atafwnhayaj toj talhejla mʼak toj Cristo iwoye pʼante?​...