Skip to content

Skip to table of contents

Wichi toj yen Lhometa Heowa

Select language wichi

 NʼOCHUFWENYAJ 8

¿Atsi toj hope Dios Niyatyaj?

¿Atsi toj hope Dios Niyatyaj?

1. ¿Atsi mʼak toj Jesús ichufwenej pʼante lechufwenkay?

WUJPEY wichi matche toj itafwelej nʼotʼalhyaj toj lhey Padrenuestro. Jesús ichumyenlhi pʼante nʼotʼalhyajna hopkhilak ichufwenej lechufwenkay toj iwo tʼalhyaja. ¿Atsi mʼak toj tʼalhchʼoye Jesús toj iwo pʼante tʼalhyaja? ¿Atsi mʼak toj tamenej toj matche toj laha ihi che natafwelche mʼak toj yome nʼotʼalhyajtso?

2. ¿Atsi tres mʼayhay toj Jesús ichufwen pʼante namejen toj natʼalhchʼoye toj nawo lhatʼalhyaja?

2 Jesús yopʼantek: «Mat amel chik lewoyay alhyaja, oyaykwe: Dios tä olhamel Ojcha tä lhe puleye, is chik õyen tʼamajcheta ey. Is chik Aniyatyaj inʼoyejen. Is chik õʼwoye ämet honhatena, mälhyej tä õʼwoye tä ipuleye» (yahyen Mateo 6:9-13). Natetshanla mʼak toj tamenej toj Jesús ichufwen namejen che natʼalhchʼoye tres mʼayhayna lewhay toj nawo lhatʼalhyaja (tetshan Nʼosilot 20).

3. ¿Atsi mʼak toj natetshanla toj ihi nʼochufwenyajna?

3 Pajche nalechufwenej naji toj Dios lhey hope Heowa. Hate natetshan naji atsi mʼak toj lenechʼethayaj toj tʼuhlak itiyej wichi wet honhat. Mat, lewhay toj Jesús iwo pʼante tʼalhyaja toj yok «Is chik Aniyatyaj inʼoyejen», ¿atsi pʼante mʼak toj tʼuhlak yome? Toj ihi nʼochufwenyajna natetshanla atsi toj hope Dios Niyatyaj, atsi mʼak toj iwohiyela wet atsi lenʼayij toj ikalhihila hopkhilak nʼoyen tʼamajcheta Dios lhey.

 ¿ATSI TOJ HOPE DIOS NIYATYAJ?

4. ¿Atsi toj hope Dios Niyatyaj, wet atsi toj hope Niyat toj ihi nʼoniyatyajtso?

4 Heowa yenlhi pʼante nʼoniyatyaj toj ihi pele wet itshupyene Jesús toj niyat. Biblia inʼalit toj nʼoniyatyajtso lhey Dios Niyatyaj. Jesús hope «Nʼowuk tä Matche wet äp Niyat tä Lhamya» (Apocalipsis 17:14). Lham iwoyek ikalhi wujpe mʼayhay hopkhilak naisej, inuʼpe niyat at che hope toj iʼpe honhatna. Hate lakhajyhayaj inuʼpe nilhokej niyatey toj iʼpe honhatna che lhaihutwek.

5. ¿Atsi toj niyatiyeja Dios Niyatyaj, wet atsi lhip toj ihihla?

5 Tafwaytshi pʼante 40 ifwalas toj nʼolayhti wet Jesús yaple pʼante pele. Toj paj Heowa hiwʼenho pʼante lenʼohyaj hopkhilak lham hope Dios Leniyatyaj laka Niyat (Apóstoles Lhenhay 2:33). Dios Niyatyaj ihihla pele toj niyatej honhat (Apocalipsis 11:15). Hop toj tamenej toj Biblia yome toj Dios Niyatyaj hope «[Nʼo]niyatyaj tä ipuleye» (2 Timoteo 4:18).

6, 7. ¿Atsi mʼak toj tamenej toj Jesús inuʼpe niyat at che hope toj iʼpe honhatna?

6 Hop Biblia yome toj Jesús inuʼpe niyat at che hope toj iʼpe honhatna, hop toj «nemla yachajo chik yʼil» (Romanos 6:9). Nilhokej niyatey toj iche toj paj yʼinhen, mat Jesús ihichetʼala lewhay che yʼil. Toj malhyejtso nilhokej mʼayhay toj isen toj Jesús iwohiyela hopkhilak naisej, ihichela pajlaʼtha tiyajʼattsiy.

7 Hate Biblia ichufwen namejen toj Jesús hopkhila Niyat toj is alhoho mʼak toj iwoye wet pʼaltsentsaj. Iche profecía toj yomeje Jesús toj yok: «Lhawuk laka Espíritu yikhitʼalachʼoye tä iʼpe, wet iwohla lehanyaja  lhäyʼe tä lehusek ihi, wet letäfwnhayaj ihi lhäyʼe lakhajyhayaj. Wet itihiyejpeja lenʼokhayaj Lhawuk wet iwohiyela lhämtes». Wet hate yok: «Iwohitʼala lakalelhthayajayejpe iyhäj häp mʼak tä tatelhoy hiwʼen wok mʼak tä wichi yäme. Yämla is alhoho lakalelhthayaj tä itiyej wichi tä pʼelitses» (Isaías 11:2-4). ¿Ha lehumnhichek lewʼen niyat toj malhyejtso?

8. ¿Atsi mʼak toj tamenej toj nahanej toj Jesús tsʼilakhitʼala lham che iwo leniyatyaja?

8 Hop Biblia yome toj Dios itsupyene pʼante wujitʼaʼpe wichi hopkhilak lhayʼe Jesús toj iwo leniyatyaja toj ihi pele. Hop toj tamenej toj apóstol Pablo ifwenho pʼante Timoteo toj yok: «Chik lhateläythayaj inʼamejen, häte yʼehiyeja lham tä ihi Leniyatyaj» (2 Timoteo 2:12). ¿Chifwajte (ep hote toj ihi) wichi toj lhayʼehila Jesús che iwo leniyatyaja?

9. a) ¿Chifwajte (ep hote toj ihi) wichi toj lhayʼehila Jesús toj iwo leniyatyaja? b) ¿Atsi pʼante lewhay toj iwo tesa toj Heowa itsupyene hop 144.000 wichi?

9 Malhyej toj natetshan naji toj ihi nʼochufwenyaj 7, hop apóstol Juan hiwʼen pʼante toj ihi lewʼenek lewhay toj Jesús Niyat toj ihi pele lhayʼe 144.000 niyatey iyhaj. ¿Atsi iyhaj toj hopehen wichina toj 144.000? Juan ikalelhat pʼante toj «lhamelna häpehen iyhäj tä [...] ihänlhi tʼat Tsonʼataj Lhäs, lhip chik häpe chik ihoye». Wet hate yome pʼante toj «lhamel tafwayhen tä iyej wichi tä ihonhatena» (Apocalipsis 14:1, 4). Tsonʼataj Lhos hope Jesús. Wet 144.000 wichi hopehen tʼat Dios kawos toj tʼifwtintses toj Lham itsupyene pʼante, hopkhilak «niyatejen honhat» lhayʼe Jesús. Lewhay che lhamel yʼinhen,  nʼolayhtiche toj ihi pele (Apocalipsis 5:10). Heowa iwo pʼante tesa toj itsupyene 144.000 wichi toj talhe lewhay toj iche pʼante hop apóstoles.

10. Lewhay toj Heowa itsupyene pʼante toj Jesús wet 144.000 niyatej wichi, ¿atsi mʼak toj tamenej toj inʼalit namejen lehumnhayaj?

10 Heowa itsupyene pʼante wichi hopkhilak lhayʼe Jesús toj iwo leniyatyaja, hop toj matche toj iti namejen lehumnhayaj. Iche dos mʼayhay toj inʼalit namejen tajtso. Toj ichun, Jesús hopkhila niyat toj matche toj is, hop toj lham malhyej pʼante iwoye hinʼu wet lepʼaltseyaj ihi pʼante. Hop apóstol Pablo yome pʼante toj Jesús ihanej mʼak toj nalate toj ihi lhahusek wet iwoyek itafwelej «lhakʼefwhayaj», hop toj «häte nʼolhelhtshayajay tä ipej nʼamejen, iyej pʼante häp lham» (Hebreos 4:15; 5:8). Hate wichi toj hopehen 144.000 ihanej mʼak toj nalate toj ihi lhahusek, hop toj lhamel ihi pʼante lechʼisukyajay wet tʼinhayajay ihi. Hop toj tamenej toj kalelhaj namhohen toj Jesús wet 144.000 wichi matche toj itafwenhiyeja mʼayhay toj ihi lhahusey wet lhawitʼayhyajay.

¿ATSI TOJ IWOHIYELA DIOS NIYATYAJ?

11. Nilhokej lhamel toj ihi pele, ¿ha nilhok lewhay toj iwoye pʼante Dios lenechʼetayaj?

11 Jesús ichufwenej pʼante lechufwenkay toj tʼalhchʼoye che nʼowoye Dios lenechʼethayaj toj iʼpe honhatna, malhyej toj nʼowoye toj ihi pele. Mat iche pʼante lewhay toj iyhaj toj ihi pele iwohiyetʼa Dios lenechʼethayaj. Toj ihi nʼochufwenyaj 3 nalechufwenej naji toj Satanás tatayhla pʼante Dios. Toj tafwaytshi  toj Satanás tatayhla, Heowa inuhitʼahla che lham wet ángeles toj tachʼahuhiyetʼa wok ahot lhayis ihi ayej pele. Toj ihi nʼochufwenyaj 10 nalechufwenhiyeja iyhaj mʼayhay, mʼak toj hope Satanás wet ahot lhayis.

12. ¿Atsi dos mʼayhay toj Apocalipsis 12:10 yome toj matche toj lahal ihi?

12 Hop Biblia yome pʼante mʼak toj Jesús iwohiyela che tafwaytshi toj nʼoyen Niyata toj ihi Dios Leniyatyaj. Toj ihi lewhaytso Lham tatayhla pʼante Ahottaj (yahyen Apocalipsis 12:7-10). Toj ihi Apocalipsis 12:10 inʼalit dos mʼayhay toj matche toj lahal ihi. Toj ichun inʼalit toj Jesús iwo tesa toj iwo leniyatyaja. Wet hate toj nʼotiyej kanhi wet nʼochen honhate Satanás. Malhyej toj natetshanla, dos mʼayhayna pajche pʼante iche.

13. ¿Atsi mʼak toj iche pʼante lewhay toj nʼotiyej kanhi Satanás toj ihi pele?

13 Ángeles toj tachʼahuye Dios, matche toj lekajyaj ihi pʼante lewhay toj nʼotiyej kanhi Satanás wet ahot lhayis toj ihi pele. Biblia yok: «¡Tä mälhyejtso, pule lhayis, woyay akäjyaja, häte amel tä lhenay hawʼeta!» (Apocalipsis 12:12). Athana nilhokej lhamel toj ihi pele iwoye Dios lenechʼethayaj, hop toj tamenej toj letamsek ihi wet tek lhaiwʼenhathen.

Talhe toj Satanás wet ahot lhayis nʼotiyej kanhi toj ihi pele wichi toj iʼpe honhatna tʼaytshi toj ihi lepʼaltseyaj. Mat nʼopʼaltseyaj atofwiyetʼa che nofwila.

14. ¿Atsi mʼayhay toj tʼaytshi toj ihi honhatna talhe lewhay toj nʼotiyej kanhi Satanás toj ihi pele?

14 Mat mʼayhay toj nʼehi toj ihi honhatna malhnhiyejtʼa iwoye toj ihi pele. Honhat nʼopʼaltseyaj tapoyej, «tsi ahättaj ihanej tʼat tä tatäy lhimphaj wet nofwila lewhäy, wet häp tä lhäyʼe lhip tä lewäk ihi, wet  inuhchä» toj ihoho honhatna (Apocalipsis 12:12). Satanás matche toj lewak ihi, hop toj ihanej toj atofwiyetʼa che nʼotayhtila. Hop toj tamenej toj lhaikhajyenej toj itiyej wichi mʼak toj aytaj wet lewitʼayhyajay.

15. ¿Atsi mʼak toj Dios lenechʼethayaj toj tʼuhlak itiyej honhat?

15 Mat Dios lenechʼethayaj toj itiyej honhat iwohitʼa pʼante elha pajtha athana. Lham kamaj tʼuhlak honhat hope lhip toj wʼatshan wet isilataj, toj wichi tʼisanis ihichetʼa mʼak toj niʼisa che ihi wet ilayhiche pajlaʼtha tiyajʼattsiy (Salmo 37:29). ¿Atsi lenʼayij toj Dios Niyatyaj ikalhihla toj iwoye tajtso?

16, 17. Hop profecía toj ihi Daniel 2:44, ¿atsi toj ichufwen namejen mʼak toj iwohiyela Dios Niyatyaj?

16 Profecía toj ihi Daniel 2:44 yok: «Wet chik ifwalas tä reyes ihi, häp Dios tä pule Lewuk lhamlak inechʼayen nʼoniyatyaj tä nittäya, wet nehit katsik ikalhihila. Itäyhthihena nʼoniyatyajay iyhäj pajlaʼtha nofwej, wet ihihila tä ihi pajlaʼtha tiyäjʼattsiy». ¿Atsi toj ichufwen namejen profeciana, mʼak toj iwohiyela Dios Niyatyaj?

17 Toj ichun, ichufwen namejen toj lewhay toj Dios Niyatyaj iwo tesa toj iwo leniyatyaja hope «ifwalas tä reyes ihi». Tajtso yome tʼat toj, che ihi lewhaytso, kamaj iche nʼoniyatyajay iyhaj toj iʼpe honhat. Hate, profeciana inʼalit namejen toj Dios Niyatyaj ihihla toj ihi pajlaʼtha tiyajʼattsiy wet toj ihichetʼala nʼoniyatyaj elh che tiyajo lewʼet. Wet toj lepes, ichufwen namejen toj Dios Niyatyaj ikalhihila nʼoniyatyajay toj iʼpe honhatna toj tatayhlahla wet wʼeihalhahila che niyatej honhat. Lewhay che  nanhila profeciana, nʼoniyatyaj toj niyatiyeja wichi toj iʼpe honhatna inuhlaʼpe elh at che hope toj iche pʼante.

18. ¿Atsi lhey toj nʼoyen lheya nʼokhaʼtshayajna toj niyatey toj iʼpe honhat tatayhla hop Dios Niyatyaj?

18 Che tatay lhimpaj che niyatey toj iʼpe honhatna tatayhla hop Dios Niyatyaj, ¿atsi mʼak toj ihichela? Hop ahot lhayis ikanhiyeja wet «ihut[la]wek nilhokej niyatey tä iʼpe honhat yämthilek iwo lakaʼtshayajayej Dios tä najit letumfwaya». Nʼokaʼtsayajna toj niyatey toj iʼpe honhat toj tatayhlahla Dios Niyatyaj, lhey Armagedón (Apocalipsis 16:14, 16; tetshan Nʼosilot 10).

19, 20. ¿Atsi mʼak toj tamenej toj nawatla che Dios Niyatyaj niyatej honhat?

19 ¿Atsi mʼak toj tamenej toj nawatla che Dios Niyatyaj niyatej honhat? Iwoyek name tres mʼayhay toj tamenej. Toj ichun, lhatʼinhayajay ihi wet nayʼinhen, hop toj lhachʼisukyajay ihi. Mat che Dios Niyatyaj niyat namejen nalayhichehla pajlaʼtha tiyajʼattsiy. Dios Lhomtes yok: «Dios wuj tä ihumnhen wichi tä iʼpe honhat, wet hiwʼenho Lhäs tä weihalha, häpkhilek elh at chik häpe chik tʼekhaye, tatäyhitʼala, mat ikatej lewʼatshancheyaj tä tʼun» (Juan 3:16).

20 Hate elh mʼak toj tamenej, hop toj nehi wichi toj matche toj niʼisa toj iʼpe honhatna. Wujpe lhamel hopehen wichi toj ifwechʼenwetha iyhaj, akantses wet iwoye lechʼisukyajay. Wet iwohiyetʼa che namel nanuhla mʼak toj lhamel iwoye. Mat Heowa iwoyek inuhla tajtso. Che lhamel iwohitʼa iyhaja lakeyis, Lham itayhtihena che ihi Armagedón (yahyen  Salmo 37:10). Wet toj lepes, nawatla che Dios Niyatyaj niyat namejen, hop toj niyatey toj iʼpe honhatna matche toj fwitses, akantses wet iwohiyetʼa che yam isen nʼowitʼayhyajay toj iyej wichi. Lhayʼe toj tachʼotiyetʼa wichi hopkhilak tachʼahuye Dios. Malhyej toj Biblia yome «hinʼol tä lhayen iyhäj lewuhuya wet äp iwitʼäyen lhamel» (Eclesiastés 8:9).

21. ¿Atsi mʼayhay toj iwohiyela Dios Niyatyaj hopkhilak nʼowoye Dios lenechʼethayaj toj iʼpe honhatna?

21 Lewhay che tafwaytshi Armagedón, Dios Niyatyaj ikalhihila che nʼowoye Dios lenechʼethayaj toj iʼpe honhat. Malhyej toja, Satanás wet ahot lhayis nʼopʼohichehla (Apocalipsis 20:1-3). Che paj, nemla iche nʼoelh che tʼinhayaj ihi wet yʼil. Isejla toj Jesús lhayen pʼante lahayaʼpe wichi, nilhokej lhamel toj  tachʼahuye Dios iwohiyela che ilayhiche yamlek tiyajʼattsiy toj ihi honhat toj wʼatshan wet isilataj (Apocalipsis 22:1-3; tetshan Nʼosilot 21). Hate Dios Niyatyaj tamenhiyeja toj nʼoyen tʼamajcheta Dios lhey. Tajtso hope tʼat toja, lewhay che Dios Niyatyaj niyatej honhat, nilhokej wichi yenhitʼala wʼet mʼayeka Dios lhey.

¿ATSI PʼANTE LEWHAY TOJ IWO TESA TOJ IWO LENIYATYAJA JESÚS?

22. ¿Atsi mʼak toj tamenej toj nahanej toj Jesús kamaj niyatitʼa pʼante lewhay toj ihi honhat wet hate toj nechʼe toj yaple pele?

22 Lewhay toj Jesús ihi pʼante honhat, ichufwenej pʼante lechufwenkay toj tʼalhchʼoye toj ihi letʼalhyaj toj is che yok: «Is chik Aniyatyaj inʼoyejen». Lham  yome pʼante tajtso hop toj lewhaytso kamaj namhitʼa pʼante Dios Niyatyaj. Mat Heowa, toj ichun is pʼante che yenlhi nʼoniyatyajtso wet yen Niyata hop Jesús. ¿Ha hope tʼat lewhay toj Jesús yaple pele toj nʼoyen Niyata? Kha. Apóstoles Pedro wet Pablo, toj tafwaytshi toj nʼolayhti Jesús, ikalelhat pʼante toj mʼak toj iyej Jesús toj yam matche hop profecía toj ihi Salmo 110:1. Profeciana, yome Heowa lhomtes toj yopʼantek: «Tayhiphä olhip tä ofwomkat wet otihlachufwi apachʼol häp atayhfwas» (Apóstoles Lhenhay 2:32-35; Hebreos 10:12, 13). Tajtso hope tʼat toj Jesús is che tataye pʼante pajtha Heowa yen Niyata.

Dios Niyatyaj ikalhihila che nʼowoye Dios lenechʼethayaj toj iʼpe honhat.

23. a) ¿Atsi pʼante lewhay toj Jesús iwo pʼante tesa toj iwo leniyatyaja toj ihi Dios Niyatyaj? b) ¿Atsi toj natetshanla toj ihi elh nʼochufwenyaj toj ihan elhna?

23 ¿Atsi pʼante lewhay toj Jesús iwo pʼante tesa toj iwo leniyatyaja? Toj nekchom 1914. Toj kamaj nichataye pʼante lewhaytso, iche pʼante Dios lakawos toj itafwelche toj 1914 nʼanhila wujpe profecías toj ihi Biblia. Mʼayhay toj iche toj iʼpe honhatna talhe toj 1914, inʼalit toj matche mʼak toj pajche itafwelche Dios lakawostso: Jesús iwo pʼante tesa toj iwo leniyatyaja nekchomtso (Salmo 110:2; yahyen Nʼosilot 22). Toj paj, Satanás nʼotiyej kanhi pʼante toj ihi pele wet nʼotat honhate, wet athana «tatäy lhimphaj wet nofwila lewhäy» (Apocalipsis 12:12). Biblia iwo lheya lewhayna toj yok: «lewhäy che lepese». Nʼochufwenyaj toj ihan elhna natetshanla iyhaj mʼayhay toj inʼalit toj nehi tʼat lewhaytso. Hate nalechufwenhiyeja toj Dios Niyatyaj atofwiyetʼa che ikalhihila toj nʼowoye Dios lenechʼethayaj toj iʼpe honhatna.