Senesi 3:1-24
3 Neʼe poto* lahi age te gata+ ʼi te ʼu manu fuli ʼo te vao ʼae neʼe fakatupu e Sehova ʼAtua. Neʼe ina ui ki te fafine: “Neʼe ui moʼoni atu koa e te ʼAtua ke ʼaua takolua kai ki te ʼu fuʼu ʼakau fuli ʼo te ʼoloto?”+
2 Pea neʼe tali age e te fafine ki te gata: “ ʼE gafua tamā kai ki te ʼu fua ʼo te ʼu fuʼu ʼakau ʼae ʼo te ʼoloto.+
3 Kae neʼe ui e te ʼAtua ʼo ʼuhiga mo te fua ʼo te fuʼu ʼakau ʼae ʼi te lotomalie ʼo te ʼoloto:+ ‘ ʼE mole tonu anai ke kolua kai ki ai, kailoa ia, ʼe mole tonu ke kolua fāfā ki ai, he ʼe kolua mamate anai.’ ”
4 Pea neʼe ui e te gata ki te fafine: “Kailoa ia, ʼe mole kolua mamate anai.+
5 He ʼe iloʼi e te ʼAtua ko te ʼaho pe ʼae ka kolua kai anai ki ai, ʼe ava anai ʼokolua mata pea ʼe kolua hage anai ko te ʼAtua, ʼo iloʼi te meʼa ʼae ʼe lelei pea mo te meʼa ʼae ʼe kovi.”+
6 Koia, neʼe sio ai leva te fafine neʼe lelei te ʼu fuaʼi ʼakau ki te kai pea mo matalelei, ʼei, neʼe ko he fuʼu ʼakau neʼe lelei ki te sio. Neʼe ina toliʼi ai he fuaʼi ʼakau ʼo kai.+ Ki muli age, neʼe ina foaki age ki tona ʼohoana ʼi te temi ʼae neʼe fakatahi ai mo ia, pea neʼe kai ai e tona ʼohoana.+
7 Neʼe ava leva ʼonā mata pea neʼe nā mahino ai neʼe nā telefua. Neʼe nā haʼi ai ki ʼonā koga loto he ʼu lau fiku neʼe nā tui.+
8 Ki muli age, neʼe nā logo leva ki te leʼo ʼo Sehova ʼAtua, ʼi tana haʼele ʼi te ʼoloto ʼi te temi ʼae ʼe agi ai he kiʼi matagi mokomoko, pea neʼe fenonoʼi te tagata mo tona ʼohoana ia Sehova ʼAtua, ʼi te ʼu fuʼu ʼakau ʼo te ʼoloto.
9 Pea neʼe pauʼi liuliuga e Sehova ʼAtua ia te tagata, ʼo ina ui: “ ʼE ke ʼifea?”
10 Neʼe ina tali age leva: “Neʼe au logo ki tou leʼo ʼi te ʼoloto, kae neʼe au mataku he neʼe au telefua, koia neʼe au nono ai.”
11 Pea neʼe ina ui age: “Ko ai ʼae neʼe ina fakaha atu ʼe ke telefua?+ Neʼe ke kai koa ki te fuʼu ʼakau ʼae neʼe au fakatotonu atu ke ʼaua naʼa ke kai ki ai?”+
12 Neʼe tali age e te tagata: “Ko te fafine ʼae neʼe ke foaki mai, neʼe ko ia ʼae neʼe ina foaki mai te fuaʼi ʼakau, pea neʼe au kai.”
13 Pea neʼe ui e Sehova ʼAtua ki te fafine: “He koʼe neʼe ke fai te faʼahi ʼaia?” Neʼe tali age e te fafine: “Neʼe kakaʼi au e te gata, koia neʼe au kai ai.”+
14 Koia, neʼe ui leva e Sehova ʼAtua ki te gata:+ “ ʼE ke malaʼia anai ʼi te ʼu manu lalata fuli pea mo te ʼu manu fuli ʼo te vao he neʼe ke fai te faʼahi ʼaia. ʼE ke totolo anai pea ʼe ke kai anai te efu ʼi tou maʼuli katoa.
15 Pea ʼe au tuku anai he fehiʼa+ ia koe+ mo te fafine+ pea ʼi tou hakoga+ mo tona hakoga.+ ʼE ina malaki* anai tou ʼulu+ pea ʼe ke taʼi* anai ia ia ʼi tona mulivaʼe.”+
16 Neʼe ina ui leva ki te fafine: “ ʼE au fakalahi anai tou mamahi ʼi te temi ʼae ʼe ke faitama ai. ʼE ke fanauʼi anai ʼau fanau ʼi te mamahi, pea ʼe ke holi anai ke ke fakatahi mo tou ʼohoana, pea ʼe ina puleʼi anai koe.”
17 Pea neʼe ina ui kia Atama:* “ ʼE malaʼia anai te kele ʼuhi ko koe,+ he neʼe ke fakalogo ki te leʼo ʼo tou ʼohoana pea neʼe ke kai ki te fuaʼi ʼakau ʼae neʼe au fakatotonu atu:+ ‘ ʼE mole tonu ke ke kai ki ai.’ Koia, ʼe ke gaue kinakina anai ʼi tou maʼuli katoa ke ke maʼu ai hau meʼa kai.+
18 ʼE tupu anai mai te kele te vao talatala, pea ʼe tonu anai ke ke kai ki te ʼu fua ʼo te ʼu gaueʼaga.*
19 ʼE ke kai anai ki hau moʼi pane* ʼi te kakava ʼo tou laʼe, ʼo kaku ki tau toe liliu ki te kele, he neʼe toʼo koe mai ai.+ Koteʼuhi ʼe ke efu pea ʼe ke toe liliu pe anai ki te efu.”+
20 Hili ʼaia, neʼe fakahigoaʼi e Atama tona ʼohoana ko Eva,* he neʼe tonu ke liliu ko te faʼe ʼa te hahaʼi fuli.*+
21 Pea neʼe fai e Sehova ʼAtua maʼa Atama mo tona ʼohoana he ʼu kofu loloa ʼaki te ʼu kiliʼi manu, ke nā tui.+
22 Neʼe ui leva e Sehova ʼAtua: “Koʼeni kua liliu te tagata ohage ko he tahi ia taua,* ʼo ina iloʼi te meʼa ʼae ʼe lelei mo te meʼa ʼae ʼe kovi.+ Koia, ke ʼaua naʼa fa tona nima ʼo toe toliʼi te fua ʼo te fuʼu ʼakau ʼo te maʼuli,+ ʼo kai pea ke maʼuli ʼo heʼe gata,* . . .”
23 Neʼe kapu ai leva e Sehova ʼAtua ia ia mai te ʼoloto ʼo Eteni+ ke ina gaueʼi te kele ʼae neʼe toʼo mai ai.+
24 Koia, neʼe ina kapu ai te tagata, neʼe ina fakatuʼu ʼi te potu esite ʼo te ʼoloto ʼo Eteni te ʼu kelupimi+ mo he heleta ʼe ulo pea ʼe takaminomino tuʼumaʼu. Neʼe ina fai te faʼahi ʼaia ke leʼohi ai te ala ʼae ki te fuʼu ʼakau ʼo te maʼuli.
Nota
^ Peʼe “kaka.”
^ Peʼe “malaki.”
^ Peʼe “taʼi.”
^ Ko tona fakaʼuhiga “Tagata Neʼe Toʼo Mai Te Kele.”
^ ʼE feala ke kau ki ai te ʼu fua ʼo te ʼu fuʼu ʼakau vao.
^ Peʼe “meʼa kai.”
^ Ko tona fakaʼuhiga “He Tahi ʼe Maʼuli.”
^ Hep. “hahaʼi maʼuli fuli.”
^ ʼI te Fakahepeleo, ʼe feala ke fakaʼuhiga ki he foʼi toko lua peʼe laka atu.
^ Peʼe “ ʼi he ʼu temi ʼe mole iloʼi hona gataʼaga.”
