Te ʼu Meʼa ʼAe Neʼe Fakaha Kia Soane 16:1-21
-
Te ʼu ipu ʼe fitu ʼo te hauhau ʼo te ʼAtua (1-21)
16 Pea neʼe au logo ki te leʼo malohi ʼe haʼu mai te fale lotu,*+ ʼe ina ui ki te ʼu ʼaselo ʼe toko fitu: “Kotou olo ʼo huaʼi te ʼu ipu ʼe fitu ʼo te hauhau ʼo te ʼAtua ki te kele.”+
2 Neʼe alu ai te ʼuluaki ʼaselo ʼo huaʼi tona ipu ki te kele.+ Pea ko te hahaʼi ʼae neʼe natou maʼu te fakailoga ʼo te manu fekai+ pea mo atolasio ki tona fakatata,+ neʼe fakamamahiʼi natou ʼaki he papala kovi mo fakamataku.+
3 Neʼe huaʼi e te lua ʼaselo tona ipu ki te tai.+ Pea neʼe liliu ai te tai ʼo toto ohage ko te toto+ ʼo he tagata kua mate, pea neʼe mamate te ʼu meʼa maʼuli* fuli ʼae ʼi te tai.+
4 Neʼe huaʼi e te tolu ʼaselo tona ipu ki te ʼu vai tafe pea mo te ʼu matapuna vai.+ Pea neʼe natou liliu ai ʼo toto.+
5 Neʼe au logo leva ki te ui e te ʼaselo ʼae ʼe pule ki te ʼu vai: “ ʼE ke faitotonu, ia koe ʼae ʼe maʼuli ʼi te temi nei, mo te temi muʼa,+ ʼae ʼe agatonu,+ koteʼuhi neʼe ke fai te ʼu fakamau ʼaia.+
6 Neʼe natou liligi te toto ʼo te kau maʼoniʼoni pea mo te kau polofeta,+ koia neʼe ke foaki age kia natou te toto ke natou inu,+ pea ʼe tuha mo natou te faʼahi ʼaia.”+
7 Pea neʼe au logo ki he leʼo ʼe haʼu mai te ʼaletale, ʼe ina ui: “ ʼEi, Sehova* ʼAtua, te Mafimafi,+ ʼe moʼoni mo faitotonu ʼau fakamau.”+
8 Neʼe huaʼi e te fa ʼaselo tona ipu ki te laʼa,+ pea neʼe fakagafua ki te laʼa ke momofi vela ki te hahaʼi.
9 Pea neʼe mamahi te hahaʼi ʼi te momofi ʼo te vela, kae neʼe natou laukovi ki te huafa ʼo te ʼAtua, ʼae ʼe pule ki te ʼu tautea ʼaia, pea neʼe mole natou fakahemala pea mo fakakololia kia te ia.
10 Neʼe huaʼi e te nima ʼaselo tona ipu ki te hekaʼaga fakahau ʼo te manu fekai. Pea neʼe fakapoʼuli tona puleʼaga,+ pea neʼe kamata ʼusiʼusiʼi ai e te hahaʼi ʼonatou ʼalelo ʼi tonatou mamahi,
11 kae neʼe natou laukovi ki te ʼAtua ʼo te lagi, ʼuhi ko ʼonatou mamahi mo ʼonatou papala pea neʼe mole natou fakahemala mai ʼanatou gaue.
12 Neʼe huaʼi e te ono ʼaselo tona ipu ki te vai tafe lahi ko Efalate,+ pea neʼe mamaha te vai tafe+ ke teuteuʼi ai te ala ki te ʼu hau+ ʼae ʼe ʼomai mai te hopoʼaga ʼo te laʼa.*
13 Pea neʼe au sio ʼe haʼu mai te gutu ʼo te talakone,+ mo te gutu ʼo te manu fekai pea mo te gutu ʼo te polofeta loi ni folafola ʼuli* ʼe tolu ʼe natou hage ko ni kelenui.
14 ʼI tona fakahagatonu, ʼe ko ni folafola ʼe haʼu mai te ʼu temonio pea neʼe logo ki ai te ʼu hau ʼo te kele katoa. ʼE fakahoko e te ʼu folafola ʼaia he ʼu fakailoga+ pea mo natou fakatahitahiʼi te ʼu hau ki te tau+ ʼo te ʼaho lahi ʼo te ʼAtua te Mafimafi.+
15 “Koʼeni, ʼe au haʼu ohage ko he tagata kaihaʼa.+ Fiafia ia ia ʼae ʼe nofo ʼalaʼala+ pea mo ina taupau ʼona kofu tuʼa, ke ʼaua naʼa haʼele telefua pea mo sisio te hahaʼi ki tona ufiufi.”+
16 Pea neʼe fakatahitahiʼi e te ʼu folafola ʼaia te ʼu hau ki te koga meʼa ʼe higoa ko Alamaketone* ʼi te Fakahepeleo.+
17 Neʼe huaʼi e te fitu ʼaselo tona ipu ki te ʼaele. Pea neʼe ui e te leʼo neʼe haʼu mai te fale lotu,*+ mai te hekaʼaga fakahau: “Kua hoko!”
18 Pea neʼe mana, mo hila, pea neʼe au logo ki he ʼu leʼo pea neʼe hoko te mafuike lahi mo fakamataku neʼe heʼeki hoko talu mai te fakatupu ʼo te tagata ʼi te kele.+
19 Neʼe mafahi tolu te kolo lahi,+ pea neʼe maumau te ʼu kolo ʼo te ʼu puleʼaga. Pea neʼe manatuʼi e te ʼAtua ia Papiloni Lahi,+ ke ina foaki ki ai te ipu vino ʼo tona hauhau lahi.+
20 Neʼe feholaki foki mo te ʼatu motu fuli, pea neʼe puli te ʼu moʼuga.+
21 Pea neʼe to ifo mai te lagi ki te hahaʼi te toe ʼuamaka lahi, pea ko te mamafa ʼo te foʼi maka ʼe tahi ʼe tatau mo te mamafa ʼo he taleta* ʼe tahi,+ pea neʼe laukovi te hahaʼi ki te ʼAtua ʼuhi ko te tautea ʼo te ʼuamaka,+ he neʼe lahi ʼaupito te tautea ʼaia.
Nota
^ ʼE fakaʼuhiga ki te Potu Taputapu ʼAupito ʼo te fale lotu.
^ Klka. psukhê. Vakaʼi Te ʼu Kupu.
^ Vakaʼi Te ʼu Fakamahino 1.5.
^ Peʼe “potu esite.”
^ Klka. “laumalie ʼuli.”
^ ʼI te Fakakeleka, Har Magédôn, ʼe haʼu mai he kupu Fakahepeleo ko tona fakaʼuhiga “Moʼuga ʼo Mekito.”
^ ʼE fakaʼuhiga ki te Potu Taputapu ʼAupito ʼo te fale lotu.
^ Ko te mamafa ʼo te taleta Keleka neʼe ko kilo ʼe 20,4. Vakaʼi Te ʼu Fakamahino 2.14.
