NE’E fakatotonu ki te kau Kilisitiano ke nātou fai te ’Aho Fakamanatu ’o te mate ’o Kilisito. ’E toe fakahigoa’i te ’aho ’aia ko “te taumafa ’o te ’Aliki.” (1 Kolonito 11:20, MN) He ko’e ’e ma’uhiga ke fakamanatu te ’aho ’aia? Ko te temi fea ’aē ’e tonu ke fakamanatu’i ai, pea ’e tonu ke fakahoko feafea’i?

Ne’e kamata fai e Sesu Kilisito te to’oto’oga ’aia ’i te pō ’o te Pāsikate Faka Sutea ’aē ne’e fai ’i te ta’u 33 ’o totatou temi. Ne’e fai tu’a tahi ’i te ta’u ia te Pāsikate, ’i te ’aho 14 ’o Nisani ’i te kaletalio ’a te kau Sutea. Mo’o ’ilo’i te ’aho ’aia, ne’e fakatalitali te kau Sutea ki te ’aho ’o te fāsiga ta’u mātala, ’aē ’e ko ’ona hola e teitei 12 ’i te ’aho pea mo ’ona hola e 12 ’i te pō’uli. Ko te ’uluaki tu’u afiafi ’o te māhina ’aē ’e ōvi mai ki te ’aho ’aia, ’e ko te kamata’aga ’aia ’o te māhina ’o Nisani. Hili ’aho e 14, pea fai te Pāsikate ’i te ’osi tō ’o te la’ā.

Ne’e fai e Sesu te Pāsikate mo tana ’u ’apositolo, pea ’i te ’osi mavae ’a Sutasi Isikaliote, ne’e ina fakatu’utu’u te Taumafa ’o te ’Aliki. Ne’e fetogi e te taumafa ’aia ia te Pāsikate Sutea, koia ’aē ’e tonu ai ke tou fakamanatu’i tu’a tahi pe ’i te ta’u.

’E ’ui ’i te Evaselio ’o Mateo: “Ne’e to’o e Sesu te pane pea, ’i tana ’osi lau te tapuaki, ne’e ina tofitofi pea, ’i tana foaki ki te kau tisipulo, ne’e ’ui ma’ana: ‘Koutou to’o, ’o kai. Ko te me’a ’aenī ’e ina fakatātā toku sino.’ Pea ne’e ina to’o te ipu pea, ’i tana ’osi fai te fakafeta’i, ne’e ina foaki age kiā nātou, ’o ’ui ma’ana: ‘Koutou ’i’inu fuli kiai; he’e ko te me’a ’aenī ’e ina fakatātā toku “ta’ata’a ’o te fuakava,” ’aē ’e tonu ke liligi ma’a te tokolahi ki te fakamolemole ’o te ’u agahala.’ ”—Mateo 26:26-28, MN.

Ko ’ihi ’e nātou tui ko Sesu ne’e ina fakaliliu mo’oni te pane ko tona kakano pea ko te vino ko tona ta’ata’a. Kae ko te sino kakano ’o Sesu ne’e kei kātoa ’i te temi ’aē ne’e ina momoli ai te pane ’aia. Ne’e kai mo’oni koa e te ’u ’apositolo ’a Sesu tona kakano pea mo ’inu tona ta’ata’a? Kailoa, he’e ne’e tapu’i ’i te lao ’a te ’Atua ia te kai tagata pea mo te ’inu ’o te toto. (Senesi 9:3, 4; Levitike 17:10) Iā Luka 22:20, ne’e ’ui fēnei e Sesu: “Ko te ipu aeni e ko te [“fuakava fo’ou,” MN] i toku toto kua liligi ia o uhiga mo koutou.” Ne’e liliu mo’oni koa ia te ’ipu ’aia ko “te fuakava fo’ou”? Kailoa, he’e ko te fuakava ’e ko he fakapapau, pea ’e mole ko he me’a ’e tou lava sio kiai.

Koia, ko te pane pea mo te vino ’e ko he ’u me’a fakatātā. Ko te pane ’e ina fakatātā ia te sino haohaoa ’o Kilisito. Ne’e faka’aoga’i e Sesu te toega pane ’o te taumafa ’o te Pāsikate. Ne’e mole ’i ai he me’a fakatupu ’o te pane ’aia. (Ekesote 12:8) ’I te Tohi-Tapu, ko te me’a fakatupu ’e ina fakatātā te agahala pe’e ko te aga fakakākā. Koia ko te pane ’e ina fakatātā te sino haohaoa ’aē ne’e sākilifisio’i e Sesu. Ko te sino ’aia ne’e ’āteaina mai te agahala.—Mateo 16:11, 12; 1 Kolonito 5:6, 7; 1 Petelo 2:22; 1 Soane 2:1, 2.

Ko te vino ’e ina fakatātā te ta’ata’a ’o Sesu. Pea ne’e fakamo’oni e te ta’ata’a ’aia ia te fuakava fo’ou. Ne’e ’ui e Sesu ko tona ta’ata’a ne’e liligi “ki te fakamolemole ’o te ’u agahala.” Koia ’e feala ki te haha’i ke nātou ma’a iā mata ’o te ’Atua pea mo nātou kau ki te fuakava fo’ou ’aē ne’e fai mo Sehova. (Hepeleo 9:14; 10:16, 17) ’Aki te fuakava ’aia kua feala ki te toko 144 000 Kilisitiano agatonu ke nātou ’olo ki selo. ’I te lagi, ’e nātou gāue ai anai ko ni ’u hau pea mo pelepitelo, mo’o foaki te ’u tapuakina ki te malamanei kātoa.—Senesi 22:18; Selemia 31:31-33; 1 Petelo 2:9; Apokalipesi 5:9, 10; 14:1-3.

Ko ai anai ’aē ka kai ki te pane pea mo ’inu ki te vino ’i te ’Aho Fakamanatu? Ko nātou pe anai ’aē ’e kau ’i te fuakava fo’ou—ia nātou ’aē ’e ’amanaki ke nātou mā’u’uli ’i selo. Ko te laumālie ma’oni’oni ’o te ’Atua ’e ina fakahā lelei age kiā nātou ’aia ne’e filifili nātou ke nātou ’olo ’o hau ’i selo. (Loma 8:16) ’E nātou toe kau ki te fuakava ’aē ne’e fai mo Sesu ’o ’uhiga mo te Pule’aga.—Luka 22:29.

E feafea’i kiā nātou ’aē ko tanatou ’amanaki ko te ma’uli ’o he’egata ’i te Palatiso ’i te kele? ’E nātou fakalogo ki te fakatotonu ’a Sesu ’o nātou kau ki te Taumafa ’o te ’Aliki, kae ’e mole nātou kai te pane pea mo ’inu te vino. Tu’a tahi ’i te ta’u mokā tō te la’ā ’i te ’aho 14 ’o Nisani, ’e fakamanatu’i e te kau Fakamo’oni ’a Sehova ia te Taumafa ’o te ’Aliki. Logola ko te tokosi’i ’aē ka mā’u’uli ’i selo, kae ’e ma’uhiga ia te to’oto’oga ’aia ki te kau Kilisitiano fuli. ’E ko he to’oto’oga ’e feala ai kiā tatou fuli ke tou fakakaukau’i te ’ofa lahi ’o Sehova ’Atua pea mo Sesu Kilisito.—Soane 3:16.

← Vaka’i te pasina ’o te kāpite