HE KO ʼE ʼE INA TUKU KE HOKO IA TE FAʼAHI ʼAIA?

Michelle: Malō siʼou maʼuli, ko toku higoa ko Michelle.

Sophia: Ko au ia, ko Sophia.

Michelle: ʼE au fiafia ʼi taku maʼu mai koe, Sophia.

Sophia: Mo au foki ʼe au fiafia ʼi tatā felaveʼi.

Michelle: ʼI te ʼaho nei, ʼe au lolotoga tufa te kiʼi pepa lotu ki te hahaʼi fuli ʼo tokotou telituale. Ko tona kupu tafitō ʼE Kotou Fia ʼIloʼi Koa Te Moʼoni? Pea neʼe au manatuʼi koe.

Sophia: ʼE talanoa ki te ʼu lotu?

Michelle: ʼEi, ʼe ke tokagaʼi la te ʼu fehuʼi ʼe ono ʼi tona takafi? Ko te fehuʼi fea la—

Sophia: E, tuku atu koe. ʼE puli tou temi ki te fakamahino mai ʼo te faʼahi ʼaena.

Michelle: ʼIo, ʼe au fakaʼapaʼapa ki tau manatu. Kaʼe ʼe ke tui ʼe ʼi ai te ʼAtua?

Sophia: ʼE mole kei au tui ki te ʼAtua.

Michelle: ʼE au fakamalō atu ki tau fakaha mai tau manatu. Kaʼe neʼe kua fualoa ia tau maʼu ia te manatu ʼaia?

Sophia: Kailoa ia, neʼe au tupu ake ʼi te lotu Katolika, kaʼe ʼe mole kei au alu ʼo misa.

Michelle: Sio koe Sophia, ʼe mole au fia fakamalohiʼi koe ke ke tui ʼe ʼi ai te ʼAtua, kaʼe ʼe au fia iloʼi pe pe ko ʼe kua fetogi tau manatu?

Sophia: Neʼe hoko te aluʼaga ʼi toku maʼuli. Neʼe fakaʼi taku faʼe kua hili ki ai taʼu ʼe 17.

Michelle: ʼE ko he aluʼaga fakaʼofaʼofa. Kaʼe neʼe kovi siʼona fakaʼi?

Sophia: ʼEi, kua palalisia ʼi te temi nei.

Michelle: ʼOiau, kua au mahino leva ki tau lotomamahi.

Sophia: ʼE moʼoni, ʼe au lotomamahi. Ko te tupuʼaga la ʼaia ʼo taku manatu ʼae, kapau la ʼe tou ui ʼe ʼofa te ʼAtua, kaʼe he ko ʼe ʼe hoko ia te ʼu aluʼaga ʼaia? Pea he ko ʼe ʼe fakagafua e te ʼAtua ke tou mamahi feia?

ʼE KOVI KOA TATATOU KUMI TONA TUPUʼAGA?

Michelle: ʼE maʼua ia ke tou maʼu ia te ʼu faʼahiga manatu ʼaia pea mo tou feʼuiʼaki pe ko ʼe ʼe hoko te ʼu aluʼaga ʼaia. Ka tou mamahi, ʼe tonu ke tou feʼuiʼaki pe ko ʼe ʼe hoko kia tatou te faʼahi ʼaia. Maʼia ʼi te Tohi-Tapu, neʼe ʼi ai te ʼu tagata mo te ʼu fafine, neʼe natou kumi tona tupuʼaga.

Sophia: Ko tau moʼoni?

Michelle: ʼEi, kapau ʼe ke lotolelei ki ai, ʼe feala ke au fakaha atu tona faʼifaʼitaki ʼi te Tohi-Tapu.

Sophia: Fakalogo pe ki siʼou ʼofa.

Michelle: Fakatokagaʼi muʼa koe pe ʼe kotea ʼae neʼe kole age e te polofeta ko Hapakuke ki te ʼAtua, ia Hapakuke kapite 1, vaega 2 mo te 3: “E kaku anai ki afea, oi [Sehova]? . . . Nee au tagi, kae e mole ke fakalogo mai! Nee au kalaga kia koe o tupu ko te agamalohi, kae e mole ke tokoni mai! Kotea e ke fakasio ai au ki te agakovi?” ʼE mole koa alu tahi mo te fehuʼi ʼae ʼe ke tautau fai?

Sophia: ʼEi, ʼe moʼoni.

Michelle: Neʼe mole pe la ita ia te ʼAtua ʼi te fai age e Hapakuke ia te fehuʼi ʼaia, peʼe ina ui age ke ina fakamalohiʼi tana tui.

Sophia: ʼE lelei foki te manatu ʼaeni.

ʼE FEHIʼA IA SEHOVA KI TE MAMAHI

Michelle: ʼE fakaha ʼi te Tohi-Tapu, ʼe tokagaʼi e te ʼAtua ʼotatou mamahi.

Sophia: Kotea tona fakaʼuhiga?

Michelle: Sio, ʼi te vaega ʼaeni ʼo Ekesote 3:7, ʼe ke lotolelei la ke ke lau ia te vaega ʼaeni?

 Sophia: Mole kovi ia. ʼE ui fenei: “Nee ui leva e [Sehova]: Kua au sio ki te mamahi o taku hahai i Esipito, pea kua au logo ki anatou tagi o tupu ko tonatou gaohi kovii e onatou pule; pea e au iloi onatou mamahi.”

Michelle: Malō pe siʼau lautohi. ʼI te vaega ʼaeni neʼe ke lau, ʼe tokagaʼi koa e te ʼAtua ia te ʼu mamahi ʼo tana hahaʼi?

Sophia: ʼE moʼoni, koia pe ia.

Michelle: ʼE mole ina tokagaʼi pe ia te meʼa ʼae neʼe hoko. Sio ki te manatu fakaʼosi ʼo te vaega. ʼE ui fenei e te ʼAtua: “E au iloi onatou mamahi.” Ki tau manatu la, ʼe ko he ʼu palalau koa ʼa he ʼAtua ʼe fefeka pea mo agakovi?

Sophia: Kailoa ia.

Michelle: ʼE mole gata ʼaki pe te tokagaʼi e Sehova ʼotatou mamahi, kaʼe ʼe toe lotomamahi mo ia.

Sophia: ʼE moʼoni.

Michelle: Ta toe lau ia te tahi vaega ʼe ha ai neʼe mamahi ia te hahaʼi ʼa te ʼAtua, pea ʼe ta maʼu ia Isaia 63:9, MN. ʼE ui fenei ʼi te ʼuluaki koga ʼo te vaega: “Lolotoga ʼonatou mamahi, neʼe toe mamahi ai mo ia.” Ki tau manatu la, ʼe lotomamahi koa te ʼAtua moka mamahi tana hahaʼi?

Sophia: ʼEi, koia pe ia.

Michelle: ʼI tona fakahagatonu, Sophia, ʼe tokaga moʼoni te ʼAtua kia tatou pea ʼe mole ina loto ke tou mamahi. Ka tou mamahi, ʼe toe lotomamahi mo ia.

HE KO ʼE ʼE FAKATUATUAI?

Michelle: ʼI muʼa ʼo tatā tau mavae, ʼe au fia vaevae mo koe ia te tahi manatu.

Sophia: Mole kovi ia.

Michelle: ʼE ke fakatokagaʼi ia te faʼahi ʼae ʼe ui ʼi te Tohi-Tapu ʼo ʼuhiga mo te malohi ʼo te ʼAtua. ʼE ta maʼu ia Selemia 10:12, ʼe feala la ke ke lau maʼa taua?

Sophia: ʼEi. ʼE ui fenei ai: “Nee ina fakatupu te kele i tona mafimafi, nee ina fakatuutuu te u fakatafito o te malamanei i tona poto, pea nee ina folahi te atu lagi i tona atamai.”

Michelle: Malō siʼau lautohi. Kotea la tau manatu ki te vaega ʼaeni? Ki tau manatu la, neʼe ʼaoga koa ki te ʼAtua he toe malohi moʼo fakatupu ia te ʼatulaulau pea mo meʼa fuli ʼe maʼu ai?

Sophia: ʼE mahino ia.

Michelle: Kapau ʼe maʼu e te ʼAtua ia he toe malohi moʼo fakatupu ia meʼa fuli, ʼe mole koa la feala ke ina puleʼi ia te ʼu meʼa fuli ʼae neʼe ina fakatupu?

Sophia: Koia pe ia.

Michelle: Manatuʼi ia tau faʼe. He ko ʼe ʼe ke lotomamahi ʼi tau sio ʼae ki ai ʼe mamahi?

Sophia: Koteʼuhi ʼe au ʼofa ai. Pea tahi, ko taku faʼe.

Michelle: Kapau neʼe ke maʼu ia te fealagia ʼae ke ke fakamalolō ia ia ʼi te ʼaho nei, ʼe ke fakahoko anai koa te faʼahi ʼaia?

Sophia: ʼE au fakahoko anai.

Michelle: Kotea tona fakaʼuhiga? ʼE ui ʼi te Tohi-Tapu, ʼe tokagaʼi e te ʼAtua ʼotatou mamahi, ʼe toe lotomamahi ai mo ia pea ʼe ina maʼu he toe malohi. Koia ʼe feala tau mahino ki te fakatataʼofi lahi ʼa te ʼAtua, ʼo mole ina fakagata atu aipe ʼotatou mamahi.

Sophia: Ko taku hoki mahino ʼae ki te faʼahi ʼaeni.

Michelle: ʼE ʼi ai koa he tupuʼaga lelei ʼo tana mole fakagata ʼotatou mamahi? a

Sophia: ʼEi, ʼe au mahalo.

Michelle: Kaʼe kapau ʼe ke lotolelei ki ai ʼe feala ke au toe liliu mai ʼo tali atu ki te fehuʼi ʼaeni. ʼEa la te Moeaki ʼaeni ka haʼu, ʼi te hola mahani pe?

Sophia: Ta fai ʼaki, malō pe siʼau fakalaka mai. b