Tou Ako Mai Te Folafola ʼa Te ʼAtua

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai tona ʼu tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. He koʼē neʼe fakatoʼo e te ʼAtua kiā ia totonu ia he huafa?

ʼE mahino ia ʼe kotou leleiʼia age te toʼo atu ʼo tokotou higoa ʼi te ʼui atu ʼaē “tagata” peʼe “fafine.” Neʼe foaki atu hokotou higoa ke fakakeheʼi ai koutou mai he tahi age. ʼE maʼu e te ʼAtua te ʼu higoa fakatuʼulaga ohagē lā ko “Aliki,” “Atua Mafimafi,” pea mo “tupuaga.” (Senesi 15:2; 17:1; Ekelesiasi 12:3) Kae neʼe ina toe fakatoʼo kiā ia totonu ia he huafa ke feala ai hatatou felōgoi takitokotahi mo ia. ʼI te Fakaʼuvea, ko te huafa ʼo te ʼAtua ko Sehova.—Lau ia Esaia 42:8. a

Logolā kua fetogi e te kau fai fakaliliu Tohi-Tapu te huafa ʼo te ʼAtua ʼaki te ʼu kupu “Atua,” mo “Aliki” pea mo “Eteleno” kae ʼe tuʼu teitei tuʼa 7 000 ia te huafa ʼaia ʼi te ʼu koga tohi ʼāfea Fakahepeleo ʼo te Tohi-Tapu. ʼE hā lelei mai, ʼe loto e te ʼAtua ke ʼiloʼi e te hahaʼi ia tona huafa.—Lau ia Esaia 12:4.

2. He koʼē ʼe maʼuhiga ke tou ʼiloʼi ia te huafa ʼo te ʼAtua?

Ko tatatou ʼiloʼi ʼaē te puʼaki ʼo te huafa ʼo te ʼAtua ʼe mole fakaʼuhiga leva kua tou mahino kiai. Kapau ʼe tou ʼiloʼi te fakaʼuhiga moʼoni ʼo te huafa ʼo te ʼAtua pea ʼe hā ai ʼe tou felōgoi lelei mo ia. Ko te huafa ʼo Sehova ko tona fakaʼuhiga “ ʼE Ina Fakahoko.” ʼE ko he fakapapau ʼaia ʼe feala ki te ʼAtua ke ina fai ia meʼa fuli moʼo fakahoko ʼana fakapapau. Koia, ʼe tou ʼiloʼi te huafa ʼo te ʼAtua heʼe tou tui ʼe ina fakahoko anai ʼana fakapapau. (Pesalemo 9:11) Ko te tui ʼa te hahaʼi ʼaē ʼe natou ʼiloʼi pea mo fakaʼaogaʼi ia te huafa ʼo te ʼAtua, ʼe ina uga nātou ke natou falala kiā te ia pea mo fakamuʼamuʼa ia ia ʼi tonatou maʼuli. ʼE puipui anai e Sehova ʼAtua te hahaʼi ʼaia.—Lau ia Pesalemo 91:14.

  3. He koe ʼe loto e te ʼAtua ke ʼiloʼi ia tona huafa?

ʼE loto e te ʼAtua ke ʼiloʼi e te hahaʼi tona huafa heʼe fua lelei anai ki tonatou maʼuli. ʼE feala ai hanatou fakakaumeʼa mo ia pea mo ʼamanaki ke natou māʼuʼuli ʼo heʼegata. Koia ʼe mole tou punamaʼuli ai ki tana loto ʼaē ke tou fakaʼilo tona huafa!—Lau ia Soane 17:3; Loma 10:13, 14.

Neʼe fakaʼilo e Sesu te huafa ʼo te ʼAtua ʼaki tana akoʼi ki te hahaʼi te ʼu gāue ʼa te ʼAtua, mo ʼAna lao pea mo ʼAna fakapapau. Iā ʼaho nei, ko te ʼu tisipulo ʼa Sesu ʼe natou hoko atu te fakaʼilo ʼo te huafa ʼo te ʼAtua ʼi te atu fenua fuli. ʼE natou fakahoko te faʼahi ʼaia ohagē ko he hahaʼi logotahi ʼe natou “fua tona huafa [ʼo te ʼAtua].”—Lau ia Gaue 15:14; Soane 17:26.

4. ʼE fakakolōlia anai feafeaʼi e te ʼAtua ia tona huafa?

ʼE loto e Sehova ʼAtua ke fakakolōlia tona huafa ʼuhi heʼe valokiʼi. Ohagē lā, tokolahi te hahaʼi ʼe natou ʼui neʼe mole ina fakatupu te maʼuli, pea ʼe mole tonu ke tou fakalogo kiā te ia. Pea ko ʼihi ʼe natou ʼui ʼe mole tokaga te ʼAtua kiā tātou, pea ʼe lahi lā te mamahi ʼuhi ko ia. Ko te taʼi faʼahiga hahaʼi ʼaia ʼe natou laukovi ki te huafa ʼo te ʼAtua. Kae ʼe mole hoholo anai. Heʼe fakaʼauha anai e te ʼAtua ia nātou ʼaē ʼe pātapāta ki tona huafa.—Lau ia Pesalemo 83:18, 19.

ʼE fakakolōliaʼi anai e Sehova tona huafa, mokā ʼe ina fakaʼauha anai te ʼu pule fakatagata fuli ʼaki tona Puleʼaga, pea mo ina toe fakatuʼu te tokalelei pea mo te fīmālie ʼi te mālamanei. (Taniela 2:44) Kei toe pē he kiʼi temi siʼisiʼi pea ʼe tonu anai ke ʼiloʼi e te hahaʼi fuli ko Sehova ʼe ko te ʼAtua moʼoni.—Lau ia Esekiele 36:23; Mateo 6:9.

Koteā ʼaē ʼe tonu ke kotou fai? Kotou fakaovi ki te ʼAtua ʼaki takotou ako tana Folafola pea mo kotou fakatahi mo te hahaʼi ʼaē ʼe natou ʼoʼofa kiā te ia. ʼI te temi ʼaē kā fakakolōliaʼi ai e te ʼAtua tona huafa, ʼe ina manatuʼi anai ʼana kaugana agatonu.—Malakia 3:16.

[Nota]

Kapau ʼe kotou fia maʼu he tahi ʼu fakamahino, vakaʼi te kāpite 1 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.

[Paki ʼo te pāsina 10]

Te huafa ʼo te ʼAtua ʼi te koga tohi ʼāfea Fakahepeleo