KA HOKO HE TUʼUTAMAKI, ʼE KE FEUIʼAKI KOA PE NEʼE ʼIFEA IA TE ʼATUA? PEA KA HOKO ATU HE ALUʼAGA FAKAMATAKU, ʼE KE FEʼEKEʼAKI KOA PE NEʼE TOKAGAʼI E TE ʼATUA?

ʼE lagi ke manatu tahi mo Sheila, ʼe maʼuli ʼi Amelika. Neʼe tauhi lotu lelei tona famili. ʼE ina ui fenei: “Talu mai taku kei veliveli neʼe au fia iloʼi ia te ʼAtua, he ko ia te Tupuʼaga. Kae neʼe hage ia neʼe mole feala haku fakaovi kia te ia. Neʼe au ui ʼe ina sioʼi pe au mai mamaʼo. Neʼe mole au logoʼi hona ʼofa kia au. Kae neʼe mole au ui leva neʼe fehiʼa ia au.” He koʼe neʼe manatu feia ia Sheila? ʼE ina hoko atu fenei: “Neʼe tau toku famili mo he ʼu tuʼuga ʼahiʼahi kae neʼe mole tokoni mai pe la ia te ʼAtua.”

Ohage pe ko Sheila, ʼe lagi ke tui pau ʼe ʼi ai he ʼAtua Mafimafi. Kae, ʼe mole ke iloʼi pe ʼe tokaga moʼoni koa kia koe. Neʼe tui papau ia te tagata agatonu ko Sopo ʼe malohi mo poto ia te Tupuʼaga kae neʼe toe lotolotolua pe mo ia. (Sopo 2:3; 9:4) Neʼe felaveʼi hoholo mo he ʼu toe ʼahiʼahi. Pea neʼe mole ina maʼu hona fakafimalie, ʼo tupu ai tana fehuʼi fenei ki te ʼAtua: “Kotea ae e ke fufu ai ou mata, pea e ke too ai au ko tou fili?”—Sopo 13:24.

Kae, kotea ʼae ʼe akoʼi mai ʼi te Tohi-Tapu? ʼE tonu koa ke tukugakoviʼi ia te ʼAtua moka hoko mai he ʼu tuʼutamaki? ʼE ha feafeaʼi ʼe tokaga ia te ʼAtua ki te hahaʼi fuli pea mo te takitokotahi? ʼE tou iloʼi feafeaʼi ʼe tokaga mo mahino pea mo tokoni mai ki ʼotatou fihifihia?

ʼI te ʼu alatike ʼae ka hoa mai, ʼe talanoa ai ki ni ako mai te fakatupu, ʼe ha ai ʼe tokaga ia te ʼAtua kia tatou. (Loma 1:20) Pea mo te manatu ʼi te Tohi-Tapu ʼo ʼuhiga mo te lototokaga ʼa te ʼAtua. Koia kapau ʼe ke faiga ke ke “iloʼi ia ia” ʼaki tana fakatupu mo tana Folafola, pea ʼe ke tui pau anai “ ʼe tokaga ia” kia koe.—1 Soane 2:3; 1 Petelo 5:7.