“ ʼE MAʼUHIGA TE ʼAMANAKI KI TOTATOU MAʼULI FAKALAUMALIE. Pea ʼe ko he faitoʼo lelei ki te maʼuli tuʼania, kia natou ʼae ʼe mole natou maʼu he ʼuhiga ʼo tonatou maʼuli pea mo natou ʼae ʼe kua lotovaivai ʼaupito.” Ko te ʼu palalau ʼaeni ʼe maʼu ʼi te tohi Hope in the Age of Anxiety.

ʼE talanoa ʼi te Tohi-Tapu ki te maʼuhiga ʼae ke tou maʼu he ʼamanaki. Pea ʼe toe fakatokagaʼi mai ai ke ʼaua naʼa tou falala ki he ʼu ʼamanaki hala. ʼE ui fenei ia Pesalemo 146:3, MN: “ ’Aua naʼa ke tuku tau falala ki te kau ʼaliki, pe’e ki te foha ’o te tagata, ʼae ’e mole feala ke ina haofaki.” ʼE ko he aga fakapotopoto te falala ki totatou Tupuʼaga ʼae ʼe ina lavaʼi te fakahoko ʼo ʼana fakapapau fuli. Kotea te ʼu fakapapau ʼaia? Tou vakavakaʼi fakatahi:

ʼE GATA ANAI TE AGAKOVI PEA ʼE MAʼU ANAI E TE KAU AGATONU TE TOKALELEI. ʼE ui fenei ia Pesalemo 37:10, 11, MN: “Kei toe he ki’i temi si’i pe, pea pulihi anai te tagata agakovi . . . Kae ko te kau agavaivai ’e natou ma’u anai te kele, pea ’e natou fiafia moʼoni anai ’i te mahu ’o te tokalelei.” Pea ʼe toe ui ʼi te vaega 29, MN: “E maʼuʼuli anai . . . te kau agatonu ʼi te kele ʼo talu ai.”

ʼE FAKAGATA ANAI TE TAU. ʼE ui fenei ia Pesalemo 46:8, 9, MN: “ ʼE fakagata [e Sehova] te ’u tau ’o a’u ki te potu taupotu ’o te kele. ’E ina fasifasi’i te nahau pea mo maumau’i te tao; ’e ina tutu te ’u saliote ’i te afi.”

ʼE MOLE TOE ʼI AI ANAI TE MAHAKI, TE MAMAHI MO TE MATE. ʼE ui fenei ia Fakaha 21:3, 4: “ ʼE tuʼu te tapenakulo ʼa te ʼAtua ʼi te lotolotoiga ʼo te hahaʼi, . . . ʼe ina holoholoʼi anai te ʼu loʼimata fuli mai ʼonatou mata, ʼe mole toe ʼi ai anai te mate, mo te putu, mo te lauga pea mo te mamahi.”

ʼE MAHU ANAI TE MEʼA KAI. ʼE ui fenei ia Pesalemo 72:16, MN: “ ʼE mahu anai te pulapula ʼi te kele; ʼe tapuke anai ʼi te tumutumu ʼo te ʼu moʼuga.”

KO TE PULEʼAGA FAITOTONU PE ʼE TAHI ʼAE KA PULE ANAI: TE PULEʼAGA ʼO KILISITO. ʼE ui fenei ia Taniela 7:14: “Nee foaki leva kia [Sesu] te pule, mo te kololia, mo te hau; pea nee tauhi leva kia ia te u hahai fuli, mo te u puleaga, pea mo te u tagata mai te u lea kehekehe fuli. Ko tana pule ko he pule heegata, ae e mole toe gata anai, pea e mole toe maumaui anai tona puleaga i he aho.”

He koʼe ʼe tou tui pau ʼe hoko moʼoni anai te ʼu fakapapau ʼaia? ʼI te maʼuli ʼa Sesu ʼi te kele, neʼe ha ai ko ia ʼae tuha mo te tuʼulaga Hau. Neʼe ina fakamalolo te hahaʼi mahaki neʼe ina fafaga te kau masiva pea neʼe ina fakatuʼuake te kau mate. Pea ko te meʼa ʼae neʼe maʼuhiga age, neʼe ko ʼana akonaki. Koteʼuhi neʼe maʼu ai te ʼu pelesepeto neʼe tokoni ki te hahaʼi ke natou logo tahi, ʼi te tokalelei ʼo heʼe gata. Neʼe toe fakakikite e Sesu te ʼu aluʼaga ʼae ka hoko ʼi te ka haʼu, ʼae ʼe kau ai te fakailoga ʼo te ʼu ʼaho fakamuli.

Neʼe fakakikite e Sesu ʼe fakailoga anai te ʼu ʼaho fakamuli ʼaki te tokakovi mo te maveuveu. Ko te fakailoga ʼo “te fakaʼosi ʼo te tuʼu ʼo te ʼu faʼahiga meʼa ʼaeni” ʼe kau ai te ʼu tau fakamalamanei, te hoge, te ʼu mahaki pea mo te ʼu mafuike. (Mateo 24:3, 7; Luka 21:10, 11; Fakaha 6:3-8) Neʼe toe ui fenei e Sesu: “ ʼUhi ko te ʼaʼasili ʼo te agakovi, ʼe momoko anai ia te ʼofa ʼo te tokolahi.”—Mateo 24:12.

Pea ʼe ha te ʼu aga kovi ʼaia ʼi he ʼu aluʼaga kehekehe pea neʼe toe fakakikite totonu pe e te Apositolo ko Paulo. ʼE ui ia 2 Timoteo 3:1-5, ʼi “te ʼu ʼaho fakamuli,” ʼe ʼoʼofa pe anai te hahaʼi kia natou totonu pea mo manako ki te paʼaga mo te ʼu fakafiafia. ʼE natou fiatuʼu mo aga fekai anai. Ko te ʼu famili ʼe mole natou feʼofaʼofani pea ko te ʼu fanau ʼe talagataʼa anai ki ʼanatou matuʼā. Pea ko te ʼu lotu ʼe natou malualoi anai.

Ko te ʼu maveuveu ʼaeni ʼe fakamoʼoni ai ko te malamanei kua ovi mai tona fakaʼosi. ʼE toe fakamoʼoni ai ko te tokalelei ʼae ka foaki mai e te Puleʼaga kua toe ovi mai foki. Koia, neʼe ui fenei e Sesu ʼi te lea fakapolofeta ʼo ʼuhiga mo te ʼu ʼaho fakamuli: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa ko he fakamoʼoni ki te ʼatu puleʼaga, pea hoki hoko mai anai ia te fakaʼosi.”—Mateo 24:14.

Ki te kau agakovi ko te logo lelei ʼaia ʼe ko he fakatokaga. Pea ki te kau agatonu ʼe ko he fakapapau ki te ʼu tapuakina ʼae neʼe fakakikite pea ʼe hoko moʼoni anai. ʼE kotou fia maʼu koa he tahi age ʼu fakamahino ʼo ʼuhiga mo te ʼu tapuakina ʼaia? Kapau koia, kotou vakaʼi te pasina ʼae ka hoa mai.