ʼI ʼihi fenua ʼae ʼe lolotoga lagaʼi ʼi te faʼahi fakaekonomika, ʼe mole maʼu e te kau kivi te ʼu lelei ʼae ʼe maʼu e ʼihi kivi ʼi te tahi age fenua. ʼI ʼihi temi, ʼe liʼakina natou, pea ʼe mole foaki kia natou he tokoni ke feala hanatou fai te ʼu meʼa ʼae ʼe fai mahani e te hahaʼi ʼae ʼe sisio. Ohage la, ʼe feala ke faigataʼa kia natou tanatou olo ki te fakatauʼaga meʼa kai moʼo totogi mai hanatou meʼa kai, mo tanatou toʼo te ka, peʼe palu te falā. ʼE feala ke toe faigataʼa kia natou te lautohi. ʼE mole mahino te kau kivi fuli ki te faʼahiga faitohi ʼo te hahaʼi kivi, pea ʼi te agamahani, ko natou ʼae ʼe mahino ki ai, ʼe faigataʼa tanatou maʼu he ʼu tohi.

Kua taʼu 100 nei te ta ʼa te kau Fakamoʼoni ʼa Sehova te ʼu tohi Fakatohi-tapu ʼi te faʼahiga faitohi ʼo te kau kivi. Ke feala ke maʼu he ʼu tohi ʼi te faʼahiga tohi ʼo te kau kivi ʼi te lea Chichewa, ʼae ʼe palalau ʼi te fenua ʼo Malawi, neʼe momoli e te kau Fakamoʼoni mai Niu Sila ki Malawi te masini ta tohi ʼi te faʼahiga tohi ʼo te kau kivi, ʼo feia mo te ʼu meʼa gaue moʼo fakapipiki te ʼu tohi.

Ko te tehina ko Leo, ʼae neʼe mavae mai te Petele ʼi Pelesile ʼo alu ki te Petele ʼo Malawi, kua fualoa tana gaue ʼi te ta ʼo te ʼu alatike ʼi te faʼahiga tohi ʼo te kau kivi. Neʼe alu ki Malawi moʼo akoʼi ki te foʼi toko nima te fakaʼaogaʼi ʼo te ʼu meʼa gaue pea mo te polokalama ʼi te olotinatea ʼae neʼe faʼu e te kau Fakamoʼoni. ʼE maʼu ʼi te polokalama ʼaia te ʼu mataʼi tohi ʼi te lea Chichewa pea mo te faʼahiga tohi ʼo te kau kivi. ʼE ta leva e te polokalama ʼaia te ʼu alatike ki te faʼahiga tohi ʼo te hahaʼi kivi pea mo fakatuʼutuʼu te alatike ke faigafua tona lau e te hahaʼi kivi. Kotou tokagaʼi pe kotea ʼae neʼe ui e ʼihi ʼi Malawi ʼo ʼuhiga mo ʼanatou tohi ʼi te faʼahiga tohi ʼo te kau kivi.

Ko Munyaradzi ʼe ko te finemui ʼe kivi pea ʼe gaue vaelua ʼaho ʼi te fale latio. ʼE ina toe fakaʼaogaʼi hola ʼe 70 ʼi te mahina fuli moʼo akoʼi ki te hahaʼi ia te Tohi-Tapu. Neʼe ina ui fenei: “ʼI te temi muʼa, neʼe au maʼu ʼi te Fakapilitania te ʼu tohi ʼi te faʼahiga tohi ʼo te kau kivi. Kaʼe ʼi taku kua maʼu te ʼu tohi ʼi toku lea ʼoʼoku totonu, ʼe malave moʼoni ki toku loto. ʼE au fakafetaʼi ki te ʼu faiga pea mo te ʼu meʼa ʼae neʼe totogi ʼe ʼoku tehina mo tuagaʼane moʼo tokoni mai ke matou maʼu te ʼu tohi ʼi te faʼahiga tohi ʼo te kau kivi, ʼi tamatou lea. Kia au, ʼe fakaha e te faʼahi ʼaia neʼe mole galoʼi matou pea ʼe matou maʼuhiga.”

Ko Francis ʼe ko te Fakamoʼoni ʼe maʼuli ʼi te potu noleto ʼo Malawi. ʼI te temi muʼa, neʼe ko ʼihi ʼae neʼe natou fai tana lautohi he ʼe kivi. ʼI tana maʼu ʼana ʼuluaki tohi ʼi te faʼahiga tohi ʼo te kau kivi ʼi te lea Chichewa, neʼe ina ui fenei: “Neʼe hage neʼe au moemisi. ʼI meʼa taulekaleka leva!”

Ko Loyce ʼe toe kivi mo ia pea mo pionie katoa. Neʼe tokoni ki te toko 52 hahaʼi ke natou fetogi ʼonatou maʼuli. ʼO feafeaʼi? ʼE ina akoʼi te hahaʼi ʼo ina fakaʼaogaʼi te ʼu tohi ʼe ta ʼi te faʼahiga tohi ʼo te kau kivi kaʼe fakaʼaogaʼi e ʼana kau ako te ʼu tohi mahani, ʼe ta e te ʼu tohi fuli ʼaia e te kau Fakamoʼoni ʼa Sehova.

Ko Leo, te tehina mai Pelesile ʼae neʼe tou talanoa ki ai ʼi muʼa atu, neʼe ina ui fenei: “ʼE au logoʼi te toe fiafia lahi moka au fakatoʼo age ki te hahaʼi kivi te ʼu tohi Fakatohi-tapu ʼi te faʼahiga tohi ʼo te kau kivi pea mo au sio pe ʼe natou feafeaʼi moka natou mahino ʼe ko te tohi ʼi tanatou lea totonu. Tokolahi neʼe natou fakafetaʼi lahi kia Sehova pea mo natou fiafia ʼi tanatou kua lava teuteu tokotahi te ʼu fono pea mo te faifakamafola. Kua feala leva ke natou fai tanatou ako takitokotahi. Kua feala ke natou tokoni lelei age ki ʼonatou famili ke natou tuputupu ʼi te faʼahi fakalaumalie. ʼE tokoni te ʼu tohi ʼaia ke natou fakaovi kia Sehova.”