ʼI te kamata ʼo Sulio 2013, neʼe mavae te kau Fakamoʼoni ʼa Sehova ʼe toko 28 ʼi te kolo ko São Felix do Xingu, ʼi Pelesile, ʼo natou olo ki te telituale ʼo te hahaʼi Initia kayapo mo yuruna. ʼAki tanatou vaka meta 15, neʼe natou folau ʼi te vai tafe Xingu ʼae ʼe loa ia meta e 2 092, mai te potu noleto ʼo to ki te vai tafe lahi ʼae ko te Amazone.

Neʼe fai e te kiʼi kutuga te folau ʼaia ke natou fakamafola te Puleʼaga ʼo te ʼAtua ki hahaʼi ʼae ʼe maʼuʼuli ʼi te ʼu kiʼi kolo ʼi te kauvai ʼo te vai tafe. ʼI te tolu ʼaho, neʼe tau te vaka ʼo te kiʼi kutuga ki te kolo ʼae ʼe higoa ko Kokraimoro. Neʼe fakatalitali natou e te hahaʼi neʼe malimali pea mo tali kaiga. Neʼe natou felaveʼi mo te fafine neʼe taukalo age. Neʼe kaugā olo mo te kiʼi kutuga ʼaia te tagata ʼe haʼu mai te kiʼi kolo ʼaia. Koia, neʼe ina fakamahino te fakaʼuhiga ʼo tana taukalo age ʼaia. Ko tona fakaʼuhiga: “Kotou ʼomai fuli. ʼE matou fia feʼiloʼiʼaki mo koutou fuli!”

Neʼe palalau te kau Fakamoʼoni mo te hahaʼi fuli, ʼi te lea fakapotukalia peʼe ʼaki te ʼu nima. Neʼe natou fakaʼaogaʼi lahi te ʼu paki lanu ʼae ʼi te ʼu tohi Fakatohi-tapu neʼe natou ʼave mo natou. Tokolahi te hahaʼi neʼe natou toʼo te ʼu tohi, tafitō te kaupepa lahi Fakalogo Ki Te ʼAtua.

Ko Gerson, ʼae ʼe pionie makehe temi katoa ʼi São Felix do Xingu, ʼe ina manatuʼi te tagata neʼe ina toʼo Te Tohi ʼo Te ʼu Hisitolia Fakatohi-tapu. ʼE ina ui fenei: “Neʼe ina puke te tohi mo ʼona nima ʼe lua, mo ina sioʼi pea mo ina kukumi. Neʼe mole kei ina fia tuku age te tohi.”

Neʼe tufa e te kau Fakamoʼoni ʼa Sehova te ʼu tohi, mo te ʼu nusipepa, pea mo te ʼu kaupepa lalahi ʼe 500 tupu. Neʼe lotofakafetaʼi te hahaʼi ʼae neʼe maʼuʼuli ʼi te kauvai ʼo te vai tafe. ʼI te kolo ko Kawatire, neʼe fakalogo lelei te hahaʼi ki te kau Fakamoʼoni ʼi tanatou fakaha age te fakapapau ʼae ʼe tuʼu ʼi te Tohi-Tapu, ʼo ʼuhiga mo he kele ʼe liliu anai ko he palatiso. Neʼe fakakaukau fenei e Tonjaikwa, te tagata Initia Kayapo: “ʼI te Palatiso, ʼe maʼuʼuli anai te hahaʼi ohage ko tatou.”

ʼI te kolo ko São Felix do Xingu, tokolahi te hahaʼi neʼe natou logo ki te folau ʼaia. Ko te tuagaʼane ko Simone, ʼae neʼe kau ki te folau ʼaia, neʼe ina ui ko ʼihi ʼo te kolo ʼae ʼe haʼu mai ai, neʼe natou manatu ʼe mole fakagafua anai kia ia mo te ʼu tehina mo tuagaʼane ke natou hu ki te ʼu kolo. Kaʼe neʼe mole hoko he fihifihia ʼe tahi. Neʼe ui fenei e Simone: “Neʼe fakatalitali lelei matou pea neʼe matou faifakamafola ki te hahaʼi fuli.”