Te manatu hala ’a te tokolahi

Manatu hala: ’E mole fia fai ia te kau Fakamo’oni ’a Sehova ki te poto fakatoketa pea mo te ’u faito’o.

Tona mo’oni: ’E matou kumikumi ia te ’u faito’o lelei kia matou pea mo ’omatou famili. Ka matou mahahaki, ’e matou olo ki he ’u toketa faiva ’e feala ke natou foaki mai he ’u faito’o pea mo natou fai he ’u tafa ’e mole faka’aoga’i ai ia te toto. ’E matou lelei’ia ia te lakalaka ki mu’a ’o te poto fakatoketa. ’I tona fakahagatonu, ko te ’u faito’o ’ae ’e mole faka’aoga’i ki ai te toto ’ae ne’e fai tafitō ma’a te kau Fakamo’oni ’a Sehova kua toe faka’aoga’i nei e te haha’i fuli. ’I ’ihi fenua, kua feala ki he tahi ’e mahaki ke ina filifili ke fakafisi ki te ’u fo’i huki toto, ’o toe feia ki te ’u mahaki ’e ma’u ai, mo te ha’ele kovi ’o te système immunitaire pea mo ’ihi atu fua kovi.

Manatu hala: ’E tui ia te kau Fakamo’oni ’a Sehova ’e faito’o e tanatou tui ia te ’u mamahi ’o he tahi.

Tona mo’oni: ’E mole matou fai he ’u faito’o ’aki te tui.

Manatu hala: Ko te fakafisi ki te ’u fo’i huki toto ’e totogi kovi.

Tona mo’oni: ’E totogi lelei age ia te ’u faito’o ’ae ’e mole faka’aoga’i ai te ’u fo’i huki toto. a

Manatu hala: Tokolahi te kau Fakamo’oni ’a Sehova, ’o kau ai te ’u fanau, ’e natou mamate ’i te ta’u fuli ’uhi ko tanatou fakafisi ki te ’u fo’i huki toto.

Tona mo’oni: ’E mole mo’oni te ’u palalau ’aia. ’E fakahoko tu’uma’u e te ’u toketa fai tafa ia te ’u tafa faigata’a ohage ko te tafa ’o te mafu, mo te ’u hokoga hui pea mo te fetogi ’o te ’u tafitō ’o te sino, ’o mole natou faka’aoga’i te toto. b Ko te kau mahahaki, ’ae ’e kau ai te ’u fanau, ’e natou malolohi vave age ’i ’ae ne’e natou tali te ’u fo’i huki toto. c Koia, ’e mole feala ai ke tou ui ’e mate anai he mahaki kote’uhi ne’e fakafisi ki te ’u fo’i huki toto pe’e ’uhi ne’e ina tali.

He ko ’e ’e mole tali e te kau Fakamo’oni ’a Sehova ia te ’u fo’i huki toto?

’E matou fakafisi ’uhi ko tamatou tauhi ka’e mole ’uhi ko te he alu’aga fakatoketa. ’E fakaha fakatotonu mai ’i te Tauhi ’Afeā ’o te toe feia aipe ki te Tauhi Fo’ou ke ’aua na’a tou faka’aoga’i ia te toto. (Senesi 9:4; Levitiko 17:10; Tetelonome 12:23; Gaue 15:28, 29) Tahi ’ae, ki te manatu ’a te ’Atua, ’e ina faka’uhiga ia te toto ki te ma’uli. (Levitiko 17:14) Koia, kapau ’e matou fakafisi ki te toto ’e mole ’uhi pe ko tamatou fakalogo ki te ’Atua ka’e ’e matou toe faka’apa’apa kia te ia, ’ae ko te Matapuna ’o te ma’uli.

Te fetogi ’o te ’u manatu ’a te kau toketa

’I te ’u ta’u ki mu’a atu, ki te manatu ’a te kau toketa ko te ’u fa’ahiga faito’o ’ae ’e mole faka’aoga’i ai te ’u fo’i huki toto, ’e fakamataku pea ’e feala ke mate ai he tahi, ka’e kua fetogi ia te manatu ’aia ’i te temi nei. Ohage la, ’i te ta’u 2004, ne’e ta ai ia te alatike ’o ’uhiga mo te ako fakatoketa ’o ina ui ai: “’e lahi ia te ’u fa’ahiga faito’o ne’e faka’aoga’i ki te kau Fakamo’oni ’a Sehova kua lahi tona faka’aoga”i ’i te temi nei.” d Ne’e ui fenei ’i te alatike ’o te sulunale Heart, Lung and Ciculation ’o te ta’u 2010: “’E mole tonu ke fai pe ia te tafa ’ae ’e mole faka’aoga’i ai te toto ki te kau Fakamo’oni ’a Sehova ka’e ’e tonu ke faka’aoga’i ’i te ’aho e te kau toketa moka natou fai tafa.”

Ko te toko lau ’i afe kau toketa ’i te malamanei katoa ’e natou faka’aoga’i nei ia taupau ’o te toto ’i te ’u tafa lalahi ’ae ’e mole faka’aoga’i ai te ’u fo’i huki toto. Kua lahi te ’u fenua ’e natou fai te ’u tafa ’e mole kei faka’aoga’i ai te ’u fo’i huki toto pea ’e natou fakalavelave ki te haha’i pe’e mole ko natou ko he kau Fakamo’oni ’a Sehova.