Te ’u manatu hala ’a te tokolahi

Manatu hala: ’E mole kotou fakamanatu te Po Tapu he ’e mole kotou tui kia Sesu.

Tona mo’oni: ’E matou tui kia Sesu Kilisito. ’E matou tui ’e fakalogo pe tomatou haofaki kia te ia.—Gaue 4:12.

Manatu hala: ’E kotou veteki te ’u famili ’aki takotou ako’i ki takotou haha’i ke ’aua na’a natou fakamanatu te Po Tapu.

Tona mo’oni: ’E matou tokakaga ki te ’u famili. Pea ’e matou faka’aoga’i te Tohi-Tapu mo’o fakamalohi’i ’anatou felogo’i.

Manatu hala: ’E mole kotou mahino ki te ma’uhiga ’o te Po Tapu: te loto fia foaki, mo te tokalelei ’i te kele pea mo te fai ’o te me’a ’ae ’e lelei ki te haha’i fuli.

Tona mo’oni: ’E matou faiga ke matou loto fia foaki pea mo tokalelei mo te haha’i ’i te ’aho fuli. (Taaga Lea 11:25; Loma 12:18) Ohage la, ’e mulimuli ’amatou fono pea mo tamatou gaue faifakamafola ki te fakatotonu ’aeni ’a Sesu: “Nee kotou mau hala totogi, pea kotou foaki hala totogi.” (Mateo 10:8) Pea tahi, ’e matou fakatafito tamatou gaue ki te Pule’aga ’o te ’Atua, he ko te ’amanaki mo’oni pe ’aia ’e tahi ki te tokalelei ’i te kele.—Mateo 10:7.

He ko ’e ’e mole fakamanatu e te kau Fakamo’oni ’a Sehova te Po Tapu?

• Ne’e kole mai e Sesu ke tou fakamanatu tona mate, ka’e mole ko tona ’aho tupu.—Luka 22:19, 20.

• Ne’e mole fakamanatu e te kau apositolo ’a Sesu pea mo te kau ’uluaki tisipulo ia te Po Tapu. ’E ui fenei ’i te tohi Le livre des superstitions. Mythes, croyances et légendes: “Ne’e kamata fai ia te ’u fakafiafia ’o te tupu tagata ’a Kilisito e te Ekelesia ’i te 4 sekulo,” ’i te hili ’o te kua mate ’o te apositolo fakamuli.

• ’E mole he fakamo’oni ne’e tupu ia Sesu ’i te ’aho 25 ’o Tesepeli; ’e mole talanoa ia te Tohi-Tapu ki tona ’aho tupu.

• ’E matou tui ’e mole lelei’ia e te ’Atua ia te Po Tapu ’uhi ko tona ha’u’aga fakapagani.—2 Kolinito 6:17.

He ko ’e ’e lelei ke tou fakakaukau’i ia te fa’ahi ’aia?

Tokolahi ’e kei natou fakamanatu te Po Tapu, ka’e ’e natou ilo’i ’e fakatafito ki te ’u aga’i fenua pea mo te ’u fa’ahiga fai fakapagani, ka’e mole ki te Tohi-Tapu. ’E lagi natou fe’ui’aki: ’E tonu koa ke kehe age ia te manatu ’a te kau Kilisitiano mai te manatu ’a te haha’i fuli? He ko ’e ’e lelei ke tou fakakaukau’i ia te fa’ahi ’aia?

’E fakalotomalohi’i tatou ’i te Tohi-Tapu ke tou tahi fakakaukau, ke tou tahi faka’aoga’i tona ’atamai. (Loma 12:1, 2) ’E ina ako’i tatou ke tou fakamu’amu’a ia te mo’oni. (Soane 4:23, 24) Koia, ’e matou faka’apa’apa ki te manatu ’a te haha’i, ’e matou mulimuli ki te ’u pelesepeto Fakatohi-tapu, tatau aipe pe ’e mole lelei’ia matou e te haha’i.

Logo la ’e mole matou fakamanatu te Po Tapu, ka’e ’e matou faka’apa’apa ki te manatu ’a te tagata takitokotahi ’o ’uhiga mo te fa’ahi ’aia. ’E mole matou pule’i te haha’i ’o ’uhiga mo te ’u fakafiafia ’aia.