Ko te Kolesi Pule ʼe ko te kiʼi kutuga ʼo he ʼu Kilisitiano fakapotopoto pea ʼe natou takitaki te kau Fakamoʼoni ʼa Sehova ʼi te malamanei. ʼE fakahoko e te Kolesi Pule te ʼu gaue ʼaeni ʼe lua:

•   ʼE natou teuteuʼi te ʼu manatu Fakatohi-tapu ʼae ʼe tufaki ʼi te ʼu tohi, te ʼu fono, mo te ʼu fale ako ʼa te kau Fakamoʼoni ʼa Sehova.​—Luka 12:42.

•   ʼE natou takitaki te gaue fakamalamanei ʼa te kau Fakamoʼoni ʼa Sehova ʼaki tanatou fakatuʼutuʼu te gaue faifakamafola pea mo tokaga ki te fakaʼaogaʼi ʼo te ʼu meʼa ʼofa.

 ʼI te ʼuluaki sekulo, neʼe toʼo e te “kau apositolo mo te kau tagata ʼafeā” ʼi Selusalemi ni tonu maʼuhiga ʼo ʼuhiga mo te kau Kilisitiano fuli. (Gaue 15:2) ʼE toe mulimuli pe te Kolesi Pule ki te faʼahiga fai ʼaia. Ohage pe ko te ʼu tagata agatonu ʼaia, ʼe kumi e te Kolesi Pule te takitaki ʼa te Tohi-Tapu he ʼe natou iloʼi neʼe hinoʼi e Sehova ʼAtua ia Sesu Kilisito ko te Pule ʼo te kokelekasio.​—1 Kolonito 11:3; Efeso 5:​23.

Ko ai ʼae ʼe natou faʼufaʼu te Kolesi Pule?

 Ko natou ʼae ʼe natou faʼufaʼu te Kolesi Pule ʼe ko Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane mo Jeffrey Winder. ʼE natou gaue ʼi te ʼu pilo lalahi ʼa te kau Fakamoʼoni ʼa Sehova ʼi Warwick, ʼi New York, ʼi Amelika.

ʼE fakatuʼutuʼu feafeaʼi te ʼu gaue ʼa te Kolesi Pule?

 Neʼe fakatuʼu e te Kolesi Pule ia komite ʼe ono ke tokaga ki te ʼu gaue kehekehe ʼa te kau Fakamoʼoni ʼa Sehova. Pea ko te ʼu tehina ʼo te Kolesi Pule, ʼe natou kau ki he komite ʼe tahi peʼe laka atu ʼi te ʼu komite ʼaia.

•   Komite ʼo Te ʼu Kootinatea: ʼE tokaga ia ki te ʼu fihi mo te lao pea mo te ʼu aluʼaga fuli ʼe hoko ki te kau Fakamoʼoni ʼa Sehova, ohage la te ʼu tuʼutamaki fakanatula, peʼe ko te fakataga ʼuhi ko tanatou tauhi.

•   Komite Ki Te Hahaʼi Gaue: ʼE tokaga ki te ʼu fakatuʼutuʼu ʼe fai ʼo ʼuhiga mo te famili ʼo te Petele.

•   Komite Ta Tohi: ʼE tokaga ki te ta mo te tufa ʼo te ʼu tohi Fakatohi-tapu pea mo te laga ʼo te ʼu fale fono, te ʼu pilo faifakaliliu pea mo te ʼu filiale.

•   Komite ʼo Te Gaue: ʼE tokaga ki te fakatuʼutuʼu ʼo te fakamafola ʼo te “logo lelei . . . ʼo te Puleʼaga.”​—Mateo 24:14.

•   Komite ʼo Te ʼu Akonaki: ʼE tokaga ki te ako fakalaumalie ʼae ʼe tufaki ʼi te ʼu fono, te ʼu fale ako, pea mo te ʼu polokalama audio mo viteo.

•   Komite ʼo Te Faitohi: ʼE tokaga ki te teuteuʼi ʼo te ʼu ako fakalaumalie ʼae ʼe ta pea mo ʼae ʼi tatatou tuʼasila ʼi te Neti. ʼE toe tokaga ki te gaue faifakaliliu.

 ʼE mole gata pe tanatou gaue ki te ʼu komite ʼaia, kae ʼe toe fono te Kolesi Pule ʼi te vahaʼa fuli ʼo vakavakaʼi te ʼu aluʼaga ʼae ʼe ʼaoga ki te kautahi. ʼI te ʼu fono ʼaia, ʼe natou vakaʼi te manatu ʼa te Tohi-Tapu pea mo tuku ke takitaki natou e te laumalie maʼoniʼoni ʼo te ʼAtua, ke natou manatu tahi ʼo ʼuhiga mo te ʼu tonu.​—Gaue 15:25.

Ko ai te kau tokoni gaue ki te Kolesi Pule?

 ʼE ko ni Kilisitiano ʼe tuha mo te falala ʼe tokoni ki te Kolesi Pule ʼi te ʼu komite. (1 Kolonito 4:2) ʼE ʼi ai ʼonatou fealagia mo tonatou faiva ʼi te ʼu gaue ʼae ʼe takitaki e te komite ʼae ʼe natou gaue ki ai. Pea ʼe natou toe kau ʼi te vahaʼa fuli, ki te fono ʼo te komite ʼae ʼe natou kau ai. Logo la ʼe mole natou toʼo ni tonu, kae ʼe natou foaki ni tokoni mo ni manatu maʼuhiga. Tahi ʼae meʼa, ʼe natou fakahoko te ʼu tonu ʼaia pea mo muliʼi ʼona fua. ʼE feala ke toe hinoʼi natou e te Kolesi Pule ke natou olo ʼo ʼaʼahi te kau Fakamoʼoni ʼa Sehova ʼi te ʼu fenua kehekehe ʼo te malamanei pea mo kau ki ni fakatahi lalahi ʼe fai ʼi te taʼu fuli peʼe ko te foaki ʼo te ʼu pepa ʼo te Fale Ako ʼo Kileate.