Kailoa, e mole fakamaʼa atu. ʼE leleiʼia e te toko lauʼi miliona hahaʼi te ʼu ako Fakatohi-tapu, kaʼe e mole natou liliu ko he ʼu Fakamoʼoni a Sehova. a ʼE fai te ako ke ke iloʼi pe kotea ʼae e akoʼi mai ʼi te Tohi-Tapu. ʼE fakalogo pe kia koe ia tau faʼahiga fakaʼaogaʼi ia te iloilo ʼaia ʼae e feala ke ke maʼu mai te ako Fakatohi-tapu. ʼE matou mahino ʼe fakalogo te tui ʼa he tahi ki tona loto faʼitaliha.​—Sosue 24:15.

ʼE feala koa haku fakaʼaogaʼi taku Tohi-Tapu ʼi te ako?

 ʼEi. ʼE feala pe tau fakaʼaogaʼi tau Tohi-Tapu. Kaʼe ʼe matou fakaʼaogaʼi ia te Tohi-Tapu Les Saintes Écritures. Traduction du Monde Nouveau heʼe mahino gafua. Pea ʼe feala hamatou foaki noa atu te Tohi-Tapu ʼaia. Kaʼe e feala pe hau fakaʼaogaʼi te Tohi-Tapu ʼae kua ke maʼu. ʼE feala hau ako ʼi te Tohi-Tapu fuli te logo lelei ʼo ʼuhiga mo te ʼamanaki pea mo te haofaki.

He koʼe ʼe kotou fai te ʼu ako mo natou ʼae ʼe mole fia liliu ko he ʼu Fakamoʼoni a Sehova?

•   ʼE matou fai te faʼahi ʼaia, heʼe matou ʼoʼofa ia Sehova ʼAtua. Pea ʼe loto e Sehova ke akoʼi e ʼana kaugana ki te hahaʼi te ʼu meʼa ʼae neʼe natou ako. (Mateo 22:37, 38; 28:19, 20) ʼE ko he toe pilivilesio lahi hamatou “kaugā gaue mo te ʼAtua” ki te tokoni ki te hahaʼi ke natou iloʼi pe kotea ʼae e akoʼi mai ʼi tana Folafola.​—1 Kolonito 3:​6-9.

•   Ko te tahi tupuʼaga ʼe ko tomatou ʼofa ki ʼomatou tatau. (Mateo 22:39) ʼE matou fiafia ʼi te vaevae mo ʼihi te ʼu logo fakaofoofo ʼae neʼe matou ako.​—Gaue 20:35.