Te tali ʼi te Tohi-Tapu

 Ko te tau ’o Alamaketone ’e faka’uhiga ki te tau fakaʼosi ’o te ʼAtua mo te ’u puleʼaga fakatagata. ’I te temi nei, ko te ’u puleʼaga fakatagata ʼaia mo tana hahaʼi fakafeagai ki te ʼAtua pea ʼe mole natou lagolago ki tana fakanofo. (Pesalemo 2:2) ʼI te tau ’o Alamaketone ’e pulihi katoa anai te ’u pule’aga fakatagata fuli.​—Taniela 2:44.

 Ko te kupu “Alamaketone” ’e ha tuʼa tahi ’i te Tohi-Tapu, ’i te tohi ʼo Apokalipesi 16:16. ’E fakakikite te tohi ʼaia ki he “koga meʼa ’e higoa ’i te Fakahepeleo ko Alamaketone,” “te ʼu hau ʼo te kele katoa” ’e natou fakatahitahi’i anai “ki te tau ʼo te ʼaho lahi ʼo te ʼAtua te Mafimafi.”​—Apokalipesi 16:14.

 Ko ai ka tau anai ʼi Alamaketone? Ko Sesu Kilisito, ka ina tau’i anai te ’u fili ’o te ʼAtua. ʼE malo anai mo tana foʼi solia ’i te tau ʼaia. (Apokalipesi 19:11-​16, 19-​21) Ko te ’u fili ’o te ʼAtua ko natou ʼaia ’e mole natou faka’apa’apa pea mo feagai ki tana pule.​—Esekiele 39:7.

 ʼE fakahoko anai koa te tau ʼo Alamakatone ʼi he fenua pe ʼe tahi? Kailoa ia, ’e mole hoko anai ’i he fenua ’e tahi kae ʼi te kele katoa.​—Selemia 25:32-​34; Esekiele 39:17-​20.

 Ko te kupu Alamaketone, ’e tau tohi fenei “Har-​Maguédôn” (’i te Fakahepeleo Har Meghiddôn), ʼe fakaʼuhiga “Mo’uga ’o Mekito.” Ko Mekito ne’e ko te kolo ’o Iselaele ʼi te temi muʼa. ’E fakaha ’i te hisitolia ne’e fakahoko ni tau lalahi ʼe ovi ’i te kolo ʼaia, ko ʼihi ’i te ’u tau ʼaia ’e tou maʼu ’i te Tohi-Tapu. (Tuʼi Fakamau 5:​19, 20; 2 Hau 9:​27; 23:29) Kae, ko Alamaketone ’e mole ko he koga meʼa ia ’e tu’u ovi ki te Moʼuga ’o Mekito. ’I te koga meʼa ʼaia ’e mole tu’u ai he moʼuga lahi ’o toe feia mo te Potu Fenua Laulelei ʼo Siseleele, ke feala he fakatalitali ai ia natou fuli ʼae ’e feagai ki te ʼAtua. Ko Alamaketone ’e fakaʼuhiga ki te aluʼaga ʼae ka fakatahitahi anai te atu ʼu puleʼaga fuli mo’o fakafeagai ki te pule Faka’atua.

 ʼE feafeaʼi anai koa te tau ʼo Alamaketone? ’E mole tou iloʼi pe ’e feafeaʼi anai te faka’aogaʼi e te ʼAtua tona malohi, kae lagi ’e ina toe faka’aogaʼi pe anai te ’u mahafu ʼae ne’e ina fakaʼaogaʼi ’i te temi muʼa: te ’ua maka ʼaisi, te ’u mafuike, te ʼua lalahi, te afi mo te sulifa, te ’u mana pea mo te mahaki. (Sopo 38:22, 23; Esekiele 38:19, 22; Hapakuke 3:​10, 11; Sakalia 14:12) ’I te fihi ʼaia ko te ’u fili ’o te ʼAtua ’e natou fematehitehi’aki pe ia natou totonu. Kae hoki natou mahino ai leva, ko te ʼAtua ’ae ’e lolotoga tau kia natou.​—Esekiele 38:21, 23; Sakalia 14:13.

 Ko Alamaketone ko te fakaʼosi koa ʼaia ʼo te malamanei? Kailoa, ’e mole pulihi anai te kele, he ’e ko te nofo’aga ʼaia ’o te tagata ’o talu ai. (Pesalemo 37:29; 96:10; Ekelesiasi 1:4) ʼI Alamaketone ’e mole pulihi fuli anai te haha’i ’i te kele kae ’e ina haofaki anai “he toe haha’i tokolahi” ia te kau atolasio ’o te Atua.​—Apokalipesi 7:​9, 14; Pesalemo 37:34.

 ’I te Tohi-Tapu, ko te kupu “malamane’i” ’e faka’uhiga ki te kele, pea ’e toe faka’uhiga ki te haha’i agakovi ʼae ’e feagai ki te ʼAtua. (1 Soane 2:​15-​17) ’I Alamaketone ’e hoko ai anai “te faka’osi ’o te malamanei” ko tona fakaʼuhiga ʼae ’e faka’auha anai te hahaʼi agakovi.​—Mateo 24:3, Bible du roi Jacques.

 ʼE hoko anai ʼafea ia Alamaketone? Tou talanoa ki te “mamahi lahi” ʼae ka faka’osi anai ʼaki te tau ’o Alamaketone, ne’e ui fenei e Sesu: “ʼE mole iloʼi e he tahi te ʼaho pea mo te hola ʼaia, peʼe ko te kau ʼaselo ʼae ʼe ʼi selo, peʼe ko te ʼAlo, kaʼe gata pe ki te Tamai.” (Mateo 24:21, 36) Koia, ’e fakaha lelei mai ’i te Tohi Tapu ’e hoko anai ia Alamaketone ’i te ’i heni fakapulipuli ’a Sesu, ’o kamata mai ’i te ta’u 1914.​—Mateo 24:37-​39.