Te tali ’i te Tohi-Tapu

 Neʼe fakaliliu ʼi ʼihi Tohi-Tapu te kupu Fakahepeleo “Shéol” pea mo te kupu Fakakeleka “Hadès” ʼaki te kupu “ʼIfeli.” ʼE fakaʼuhiga te ʼu kupu ʼaia ʼe lua ki te faitoka ʼae ʼe hifo ki ai te tagata fuli. (Pesalemo 16:10; Gaue 2:27) Tokolahi ʼe natou tui ki he ʼifeli ʼe ulo ai he afi. (Vakaʼi te pāki ʼo te alatike.) Kotou vakaʼi pe ’e kotea ʼae ʼe ako’i mai ʼi te Tohi-Tapu.

1.   Ko natou ʼae kua hifo ki ʼifeli ʼe mole kei natou iloʼi he me’a pea kua mate mo ʼonatou logoʼaga sino, koia ʼae ʼe mole feala ai ke natou mamahi. “E mole he gaue, pee ko he manatu, pee ko he iloilo, pee ko he poto, i te nofoaga o te kau mate ae e ke alu ki ai.”—Ekelesiasi 9:10.

2.   ʼE olo te kau agalelei ki ʼifeli. Ko Sakopo pea mo Sopo, ne’e ko he ʼu tagata agatonu ʼa te ’Atua, ne’e nā ʼamanaki, ʼe nā olo anai ki ʼifeli.—Senesi 37:35; Sopo 14:13.

3.   Ne’e fakatuʼā te agahala, ʼaki te mate kae mole ko he ʼu fakamamahi ʼi he ʼifeli ʼe ulo ai he afi ʼo heʼe gata. “Ko ia ʼae kua mate kua ʼateaina ia mai tana agahala.”—Loma 6:7.

4.   Ko te fakamamahi’i ʼo he tahi ʼo heʼe gata ʼe feagai ki te faitotonu ʼa te ʼAtua. (Tetelonome 32:4) ʼI te agahala ʼo te ʼuluaki tagata, ne’e fakatuʼā e te ʼAtua ia Atama ʼo ina ui age ki ai, ʼe ke pulinoa anai: “Ko te efu ia koe, pea e ke liliu anai ki te efu.” (Senesi 3:19) Kapau leva ne’e fakatu’utu’u e te ’Atua ke alu Atama ki he ʼifeli ʼe ulo ai he afi, ne’e loi ia.

5.   Ne’e mole he temi ne’e manatu ai te ʼAtua, ʼe ina fakatautea’i he tahi ʼaki he ʼu fakamamahi mole hona gata’aga. Ko te manatu ʼae ko te ’Atua ʼe ina fakatuʼā he hahaʼi ʼo ina fakahifo natou ki he ʼifeli ʼe ulo ai he afi kakaha ʼe fakafeagai ki te ʼu akonaki Fakatohi-tapu. ʼE akoʼi mai i te Tohi-Tapu “ko te ʼAtua ʼe ko te ʼofa.”—1 Soane 4:8; Selemia 7:31.