Te tali ʼi te Tohi-Tapu

 Ne’e haofaki e Sesu te hahaʼi agatonu ’i tana foaki tona maʼuli ko he totogi. (Mateo 20:28) ’I te Tohi-Tapu ne’e fakahigoa’i ia Sesu ko te “fakama’uli ’o te malamanei.” (1 Soane 4:​14) ’E toe ui fenei: “ʼE mole ʼi ai ʼi te lalo lagi he tahi age higoa neʼe kua foaki ki te tagata, ʼe tonu ke haofaki ai tatou.”​—Gaue 4:​12.

 Ne’e mate ia Sesu ma’a te haha’i fuli ʼae ’e natou tui kia te ia. (Hepeleo 2:9; Soane 3:​16) Hili ki ai, “ne’e fakatu’uake ia ia e te ʼAtua,” pea ne’e toe liliu ia ki selo ko he laumalie fakapulipuli. (Gaue 3:​15) ’I tona tu’ulaga ʼaia, ko Sesu kua feala ai foki “ke ina faka’ateaina mai te agahala ia natou ’ae ’e fakaovi ki te ’Atua ’aki ia ia, kote’uhi ’e ma’uli tu’umau ’o kole ki te ʼAtua ke tokoni kia natou.”​—Hepeleo 7:​25.

He koʼe ʼe ʼaoga kia tatou ia Sesu ke tou maʼu te ʼofa ʼo te ʼAtua?

 ʼE tou agahala fuli. (Loma 3:​23) Ko te agahala ’e ko te ʼā ’e ina fakavaha ai tatou mai te ʼAtua, pea ’e ina fakatuʼā tatou ki te mate. (Loma 6:​23) Kae ko Sesu ne’e gaue ia ko he “avoka” ma’a natou fuli ʼae ’e tui ki tona sakilifisio faitotogi. (1 Soane 2:1, Bible en français courant) Ne’e gaue ma’a natou, ’o ina kole ki te ʼAtua ke fagono ki ʼanatou faikole pea mo fakamolemole ki ʼanatou agahala ’o fakatafito ki tona sakilifisio. (Mateo 1:​21; Loma 8:​34) ’E tali e te ʼAtua ʼanatou kole kote’uhi ’e alu tahi mo tona finegalo. Ne’e ina fekau’i ifo Sesu ki te kele “ke haofaki te malamanei ’aki ia ia.”​—Soane 3:​17.

ʼE feʼauga pe koa te tui kia Sesu ke haofaki ai te maʼuli?

 Kailoa. Logo la, ’e ʼaoga te tui ʼae kia Sesu ke maʼu ai te maʼuli, kae ’e mole feʼauga. (Gaue 16:30, 31) ’E ui ’i te Tohi-Tapu: “Ohage pe ko te sino, kapau ʼe hala laumalie ʼe mate ia, ʼo toe feia pe mo te tui, kapau ʼe mole fakaha ʼaki he ʼu gaue, ʼe mate ia.” (Sakopo 2:​26) Ke haofaki tatou, ’e tonu ke tou:

•   Ako ke tou iloʼi ia Sesu pea mo tana Tamai, ia Sehova.​—Soane 17:3.

•   Tou maʼu te tui kia naua.​—Soane 12:44; 14:1.

•   Tou fakaha te tui ’o tou talagafua ki ʼana fakatotonu. (Luka 6:​46; 1 Soane 2:​17) Ne’e akoʼi e Sesu ’e mole ko natou fuli ʼae ’e natou ui mai “ʼAliki” ʼae ka haofaki anai, kae ’e gata pe “kia ia ʼae ’e ina fai te finegalo ’o [tana] Tamai ʼae ’e ’i selo.”​—Mateo 7:​21.

•   Tou hoko atu te fakaha ’o totatou tui logo pe te ’u fihifihia. Ne’e tasilo lelei tona fakamahino e Sesu ’i tana ui ʼaeni: “Ko ʼae ʼe kataki ʼo kaku ki te fakaʼosi, ʼe haofaki anai ia.”​—Mateo 24:13.