TE ʼU FEHUʼI ʼE FAI E TE KAU TUPULAGA

He Koʼe ʼe Tonu Ke Au Kau Ki Te ʼu Fono?

LAU

’E fakatu’utu’u te ’u fono ’a te kau Fakamo’oni ’a Sehova tu’a lua ’i te vaha’a. Pea ko te koga meʼa ’e fai ai tanatou tauhi, ’e higoa Fale Fono. Kotea ʼae ’e fai ai, pea kotea ʼae ’e ke maʼu ’i te ’u fono ʼaia?

Kotea ʼae ʼe fai ʼi he Fale Fono?

Ko te Fale Fono ’e fakahoko ai ia te tauhi ki te ʼAtua ’o kita ako’i ai pea mo mulimuli ki te ’u meʼa ʼae ’e ako’i mai ’i te Tohi-Tapu. Pea ko te ’u fono ’ae ’e fakahoko ai, ’e tokoni atu kia koe:

Ke ke akoʼi ai te mo’oni ʼo te ʼAtua.
Ke ke mahino ki te fakaʼuhiga ʼo te ʼu aluʼaga ʼae ʼe hoko nei.
Ke ke liliu ko he tahi ʼe lelei age.
Ke ke maʼu hou ʼu kaumeʼa ʼe lelei age.

’E ke ilo’i koa? Ko te koga meʼa ʼae ’e fakatahitahi ai te kau Fakamo’oni ’a Sehova ’e higoa ko te Fale Fono, koteʼuhi ’e tou palalau’i tu’uma’u ai ki te Puleʼaga ’o te ʼAtua.—Mateo 6:9, 10; 24:14; Luka 4:43.

He koʼe ’e tonu ke ke kau ki te ’u fono?

Ko te ’u ako ʼae ’e ke maʼu ai ’e ʼaoga atu kia koe. Pea ko te ’u vaega ʼae ka ke vakaʼi lolotoga te ’u fono ’o te kau Fakamo’oni ’a Sehova ’e tokoni atu ke ke ‘ma’u te poto.’ (Taaga Lea 4:5) Koia, ko te Tohi-Tapu ’e tokoni atu ke ke to’o he ’u tonu ’e fakapotopoto. ’E ina toe tali atu ki te ’u fehuʼi maʼuhiga ’o te maʼuli, ohage la:

Koʼeni te ’u kupu tafito ʼo te ’u akonaki ’e fakahoko lolotoga te ’u fono ʼi te faka’osi vaha’a:

He Koʼe ’e Tonu Ke tou Tuku Ke Taki Tatou ’i Te Tohi-Tapu?
ʼE Tou Ma’u ’Ifea He Tokoni ’i Te ’u Temi Mamahi ʼAeni?
Te Gaue ’e Fakahoko e Te Puleʼaga ’o Te ʼAtua Ma’a Tatou ’i Te Temi Nei.

“Ko te tupulaga ’e ma ako tahi ne’e kau ki ʼamatou fono. Pea ne’e ha’u ’o heka ovi mai kia au mo toku famili, ’o ina muli’i ai te fono ’i ʼamatou tohi. Ne’e ina ui mai ne’e punamaʼuli ki te ’u tali ʼae ne’e fai. Ne’e ina ui ʼi tona ʼekelesia, ko te hahaʼi mole ʼi ai hanatou tohi ako ohage ko tatou.”—Brenda.

’E ke ilo’i koa? Ko te ulu ki te Fale Fono ’e mole totogi pea ’e mole ʼi ai he tae falā.

Ko natou ʼae ’e kau ki te ’u fono ’e natou fakalotomalohi’i koe. ’E ui ’i te Tohi-Tapu ko te tupu’aga ʼae ’o te fakatahitahi ai ’a te kau Kilisitiano ke natou “fefakalotomalohiʼaki.” (Hepeleo 10:24, 25) ʼI he malama kua tahi manatu pe te hahaʼi kia natou totonu, kae ’e fakafiafia ka kita felaveʼi mo ni hahaʼi ’e natou manatuʼi tu’umaʼu te ʼAtua pea mo ʼihi atu.

“ʼI te ʼosi ’o te ʼaho katoa, ʼe au lotomamahi mo gaʼegaʼe, kae ne’e au logo fimalie tu’umau ʼuhi pe ko natou fuli ’ae ’i te fale fono. Ka au haʼu ki toku ʼapi ’i te ʼosi ʼo te ʼu fono, ʼe au fiafia pea ʼe au toe lotomalohi ki te hoko atu.”—Elisa.

’E ke ilo’i koa? ʼE ko kokelekasio ʼe 120 000 tupu ʼa te kau fakamo’oni ʼa Sehova ʼi te malamanei katoa. ʼE natou fakatahi ia Fale Fono ʼe 60 000 tupu ʼo fai ai tanatou tauhi. Ko Fale Fono ʼe 1 500 ʼe laga ʼi te taʼu fuli, ʼuhi ʼae ko te tuputupu ʼo te kaugā malie. *

ʼAnatou Manatu

“I taku kei ako ’i te lise, ne’e ʼi ai te ki’i ta’ahine ne’e ma ako tahi ne’e kau mo au ki te ’u fono. Ne’e malave kia ia ’i tana sio ʼae ko natou ʼae ’e natou ako te Tohi-Tapu ’e natou ta’u kehekehe pea ’e natou ako fakatahi. Mole fualoa ki ai, ne’e haʼu toku patolo ki te fono. Ko te fa’ahi ʼae ne’e punamaʼuli ki ai, ko te faka’aogaʼi tu’umaʼu ’o te Tohi-Tapu. Ko tana lotofakafetaʼi ne’e au toe lotomalohi ai.”—Jessica.

“Ko te ’u fono ’e ina pulihi ai ’aku hoha pea mo ’oku tuʼania. ʼE kita ako’i ai te maʼuli fakafeʼauga, pe ’e feafea’i takita liliu ko he tahi ’e lelei age pea mo ʼihi atu fa’ahi. Pea ka au mavae ʼi te fono, ʼe au logoʼi toku lotomalohi pea mo fimalie.”—Timothy.

“Ne’e au fakaafe te tagata ki te fono kae ki muli age ne’e ina ui mai: ‘Ne’e au haʼu pe au ke au ma’u he ʼu fakamo’oni ’e ko tokotou tauhi ’e mole mo’oni. Kae ta foki la ia ko taku ia tauhi ’ae ʼe mole mo’oni.’ Ne’e malave kia ia te agalelei ’o te kau Fakamo’oni ’a Sehova, ne’e ina ui fenei: ‘Ko te hoki tou falaveʼi ʼae, kae ne’e kotou tali lele’i au ohage pe kua fualoa hatatou feilo’iʼaki.’ ”—Jacob.

“’I ʼihi temi, ʼe au tau ui ’e ʼosi pe te fono pea ʼe au alu. Kae lolotoga te fono, ne’e puli atu aipe taku manatu ʼaia. ’I te ʼosi ’o te fono, moka au faipalalau mo ʼihi pea ʼe au galo’i atu aipe pe ’e koʼe ne’e au fia alu vave. Ko te ’u fono, ne’e ina fakafealagia ke au ma’u hoku ’u kaumeʼa lelei.”—Madison.