YU WEI e nal yu? Yu wei eñ, alamb askim kerma pende pam piⱡ monjip. Askim kerma pende meñero mem eñ, ñim pende numan to pisapiñ mal:

  • God wei wei kenem ñe pisem mo?
  • Opo nganmal na ombunduom poro ninda mo?
  • Kenem gosmon kunum e, na wal enem?
  • Gonjip paim e, wal ka ende akling miñe wonda mo?
  • Na beten nal mal ñine God pisa?
  • Na wal nawal wei ere yipe ka moraⱡ?

Ñim askim miñero mem eñ, yu bekim pu nanja bar kan sindeⱡ? Ñim alamb kanem kanem askim ngondoⱡ eñ, yu bekim kanem kanem ngonam. Lotu pum ga, na lotu pengim esim ga, ñim askim ngondoⱡ, yu bekim ding mal na ngonam. Yu bekim pende yipe ñim piseⱡ e, ka mal panda ba, akling kanjiⱡ e konganim ka na panda.

Ba, buk ding ende sim eñ, yu bekim wei keñem pake sinamen yu meiem. Buk eñ yu wei mongsi dom. Jisas Krais beten ñe God ngom ngo embe ñim: “Ñinim yuanem el, yu wei.” (Jon 17:17) Yipe kenem kanmen Yu eñ Baibel. Yu boⱡ pende miro mem eñ, yu bekim wei mi Baibel a mim, ñim pende pi kanjeⱡ.

God Wei Wei Kenem Ñe Pisem Mo?

A man surrounded by a crowd of people

NAL ENDE ASKIM E MIÑE WONOM: Pasin kes na pasin napam mal, ya mala wo kerma kes pum bar keñem mimen. Lotu puli kes ñim ñe ombunduom miñe wonom eñ, God wonda ñe pim mal wonom pa ñim.

BAIBEL NAL PA DOM: Pasin kes miñe wonom eñ God na enem. Rom 9:14 embe dom: “Embe paim el, kiñim naⱡ pa ñiñamen. Kiñim moⱡmun, Got aⱡa erem, pa ñi embe ñiñamen-mo. Ma.” God wal ka wei ende alamb boⱡ enal ñe pisem. Embe pam piⱡ Jisas beten embe ñiya ñim: “Kiñ Danjin, ñim komb ep miñe kiñ min.…Ñim tauⱡ er tangen kunum ya miñe wonda. Wonde, ñim ka pisin beⱡ miñe Epen kar kar esim beⱡ embe, kiñ ya maⱡeng kar kar enamen.” (Matyu 6:9, 10) God keñem ñe wei pim piⱡ olom wal kerma ende erim. Erim bar e, olom ka pim wal e wei miñe wonda.—Jon 3:16.

E pra kane Stat 1:26-28, “Buk Baibel”; Jems 1:13; na 1 Pita 5:6, 7.

Opo Nganmal Na Ombunduom Poro Ninda Mo?

Soldiers

NAL ENDE ASKIM E MIÑE WONOM: Alamb puli kes wei yipe opo nganmal a gosim. Ombunduom keñem mimen bar poro miñe wonom.

BAIBEL NAL PA DOM: Kunom ende ya mala kumboⱡ amiñ senda yu e, God ñe kem Baibel a paiem. God Kingdom eñ miñe heven gavman, ya mala alamb tawoⱡ enda kunom eñ, alamb “opo nganmal enam ne duom na enam.” Embe piⱡe “opo nganmal wal eñ si je kapor mal kele kep mongne taⱡ nonam.” (Aisaia 2:4, Buk Baibel ) God er kelde ombunduom na pasin napam mal eñ, poro niñda. Baibel embe dom: “[God] aⱡamb ga noⱡum kil ngonda. Ngonde, aⱡamb ala goⱡ na-goram. Kumbuⱡ ombun na-panda. Na-pande, nganj ngimbil si ga na-enam. Yek mambnem el [ombunduom na pasin napam mal yipe esim e pra] pore wei ñi sekra, pa ñim.”—Repelesen 21:3, 4.

E pra kane Song 37:10, 11; 46:9, “Buk Baibel”; na Maika 4:1-4, “Buk Baibel.”

Kenem Gosmon Kunum E, Na Wal Enem?

A cemetery

NAL ENDE ASKIM E MIÑE WONOM: Lotu puli kes ñim ñe alamb gosim gorambe, miñmañ na gorom, koⱡnga mem pa ñim. Pende pisim e, alamb gonjip er molo kenem er kes enam ñe pisim. Pende pisim eñ, God er molo alamb kes si mi dop pam bar kelde, dop kunom kunom do moram pa ñim.

BAIBEL NAL PA DOM: Alamb gosim gorambe poro dom na meim. Saveman 9:5 (Buk Baibel ) embe dom: “Alamb gosim poro dom, wal ende piⱡ kane na esim.” Gosim alamb, yu na pisam, na kanam, yu na ninam, numan kongan nanda, embe pam piⱡe, kenem koⱡnga mimen er kes nanam, pake na tonam eri.—Song 146:3, 4, Buk Baibel.

E pra kane Stat 3:19, “Buk Baibel” na Saveman 9:6, 10, “Buk Baibel.”

Gonjip Paim E, Wal Ka Ende Akling Miñe Wonda Mo?

A child grieving the death of a loved one

NAL ENDE ASKIM E MIÑE WONOM: Keñem ga kan ka kanmen ga e, boⱡ koⱡnga ka wei moromen ñe pismen. Kenem ga kan ka kanmen ga gosim gorambe, kenem bu numan kerma kes paiem eñ, ga aⱡa kañamen ñe pismen.

BAIBEL NAL PA DOM: Alamb gonjip kip ku a paim e, akling aksam. Jisas embe ñe kem paim, “gonjip gul to kenjip mim…ori wonam.” ( Jon 5:28, 29) God komna alamb erim e kunom kunom ya mala Paradais sende, koⱡnga moram ñe pim, embe piⱡe gonjip kip ku a paim ga akiⱡ wonam, wo ya mala Paradais sende koⱡnga moram. Alamb God yu kar kar esim alamb eñ, ngans ka panda, kes na tonda, kunom kunom koⱡnga moram pa ñe God embe ñe kem paim. Baibel embe dom: “Alamb mambnem ka enjip alamb eñ, God mal ngondo si kunom kunom koⱡnga moram.”—Song 37:29, Buk Baibel.

E pra kane Jop 14:14, 15, “Buk Baibel”; Luk 7:11-17; na Aposel 24:15.

Na Beten Nal Mal Ñine God Pisa?

A man praying

NAL ENDE ASKIM E MIÑE WONOM: Lotu poropor alamb meim e, beten ñim. Ba, alamb puli pisim eñ, beten nimen e bekim na simen ñe pisim.

BAIBEL NAL PA DOM: Jisas kenem beten ñia ñim ñe embe ñim, “yu kanan” na yu “auⱡi auⱡi” ga pende ñim mal e, na ñia ñim. (Matyu 6:7) Embe paim piⱡe, keñem beten ñinamen ñe, yu ñimen yu aⱡa ñe aⱡa ñe na enamin. Kenem beten ñipe God pisa ñe piñjin ende, God olom ka pisem mal kenem beten ñinamen. Embe pam ende, God ka pisem mal kenem kane pakⱡe, beten olom ka pise mal nipe God pisa. 1 Jon 5:14 embe dom: “Kiñim wei eri bu se pilmin, Danjin bueng yap ende yane ñinjin keñ, elim kiñim yu pisa.”

E pra kane Song 65:2, “Buk Baibel”; Jon 14:6, 14; na 1 Jon 3:22.

Na Wal Nawal Wei Ere Yipe Ka Moraⱡ?

A woman searching for happiness by reading the Bible

NAL ENDE ASKIM E MIÑE WONOM: Alamb pipro ku, kangem kerma, ngans ka, e wal wei er kelde ka moramen ñe pisim. Embe paim piⱡe, ga kongan omblomboⱡ ere wal e sinamen ñe esim ba, ere kanem e ere si ka moram na paiem.

BAIBEL NAL PA DOM: Keñem nal mal ere ka moramen yu eñ, Jisas ñe embe ñim: “Aⱡamb Got yu pilimb, kar kar enam aⱡamb el, eñim eñim arngan komb ende moram, pa ñim.” (Luk 11:28) Wal kerma ende keñem kane pakⱡe ka moramen eñ—God wal nal wal ya alamb boⱡ endan e, kenem piⱡe kane eramen ñe pisamen. Yu kanamen yu e Baibel a paim. Wal kerma paiem mo na paiem eñ, kenem yu wei kanamen e, pake tonde kenem kane dumu ninamen. Yu wei mi Baibel a paiem eñ, kenem ta ninde wal nawal eramen, kol nal mal wanamen e mem ka pandan.

E pra kane Sindaun 3:5, 6, 13-18, “Buk Baibel” na 1 Timoti 6:9, 10.

Baibel mand askim 6-pela kanjin eñ, yu bekim ñe sikem mal. Ñim yu pende kanaⱡ ñe pisen mo? Ñim ga yu wei kurum mal ñim ende kurun ende, ñim yu wei pende kanaⱡ ñe piseⱡ. Ñim askim embe pende numan to pisapin, askim embe mal: ‘God kenem ñe pim ende, nal ende ombunduom na pasin kes kelde ya mala kanan pa meim? Na wal nawal er kelne, kin famili propor kaple moramen?’ Askim e, na askim pende Baibel yu bekim ka we ngonom.

Ba, alamb pipro yipe Baibel kanam ñe na pisim. Ga kanem e Baibel buk kerma pande, piⱡe kansinamen ñe esim e ma paiem. Ñim ga ende pake si yu bekim ya Baibel a meim e, kañaⱡ ñe pisen mo? Ñim wal taⱡ pake sindeⱡ wal eñ ga Jehova Witnes boⱡ seiem.

Wal komna, buk Tru Tru Baibel i Tok Wanem? Buk e enjip ere, ga kongan puli pam ga, pake tonde askim kerma kerma bekim ya Baibel a sinam. Wal ende, Baibel stadi wo ñim gara kisi wei er ngonam. Ñim gar sem bar ga Jehova Witnes ga ende mand moram, wo ñim kane Baibel stadi er ngonam, mo ma pande ñim dumam ende kan si eⱡep stadi yipaⱡ ñe enabel. Baibel stadi eñ alamb puli kes wei mal tambem tambem mol pum e, pake ka sinjip. Ga puli embe ninjip: “Na yu wei kants!”

E wal ka wei wei ende kenem kane sinjin. Kipe esim e, na kipe kisaⱡ gosim e, na bu numan kuⱡ punom eñ, Baibel yu wei er kelde, keñim wal eñ numan to na pismen, kenem kisi mimen. Yu wei e, er kelde kenem wal ka akling wondan eñ, kenem sinamen ñe ka piⱡe mimen. Jisas embe ñim: “Eñim yu wei pil sekram. Yu wei er kere, eñim kan ngonde mim beⱡ el eñim sekⱡemb, kisi moram, pa ñim.”—Jon 8:32.

1. A man learning what the Bible teaches; 2. A woman learning what the Bible teaches