Gapening Bodi e grup kerei ende, pilgi dongal pam Kristen tuwal ele meim, enjep Johova Witnis ga mal tambem yemyem molpum yu ningo pakerom. Enjep kongan tambem tal paiyem:

•   Enjep pablikeisen buk na nus, make kunum, na Johova Witnis sukul, Baibel mem pande yu erkun esim, kongan kantawol esim.​—Luk 12:42.

•   Enjep Johova Witnis kongan mal tambel yemyem min wonom kantawol esim, Baibel yu neori kesim kongan kantawol ere se ngimba pu donesen ngom kantawol ere konganem esim eri.

 Gapening Bodi ga komna Kristen kunum “aposol na alamb tawol enjip ga Jerusalem” wal kerma omukro kongrikeisen Kristen porpor pake tonjup mal yipe enjep mambnem dingmal karkar esim. (Aposel 15:2) Komna aposol na alamb tawol enjip ga enjip mal, yipe Gapening Bodi meim kin okanaiseisen a enjep mol minto nakesim, ma. Enjep kankerambe Baibel yu enjep kolta ninde pilkane esim, Got Johova, Jises Krais makrom kongrikeisen Pengem meiyem.​—1 Korin 11:3; Efesus 5:​23.

Namal Gapening Bodi dulom a tuwal meim?

 Angjen man Gapening Bodi meim e Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Jody Jedele, Gerrit Lösch, Mark Sanderson, Jacob Rumph, David Splane, na Jeffrey Winder. Enjep kin etkota Wawik, Nu Yok, Amerika tuwal kongan esim.

Gapening Bodi ga kongan nalmal esim?

 Gapening Bodi komiti 6-poro makro kongan kantawol enam ne enjip. Angjen man dingne komiti kongan ding mo pende siding kel esim.

•   Kodineita Komiti: Komiti e kot a wal min wonom kantawol esim, ala angjen ambanjen man mal tambem yemyem meim bar nolmal bo enem, Johova Witnis ga pilgi aijep paim mal alamb erkes erngom, ala ombun pende Johova Witnis ga bol min wonom enjep pakerom.

•   Pesnol Komiti: Komiti e ga Betel kongan esim kantawol esim.

•   Pablising Komiti: Komiti e Baibel mem paiyem buk na nus esim, na sip kerambe mal tambem yemyem punom kongan kantawol esim. Ala make enam gar, yu akronam opis, na brens opis gar tawum kantawol esim eri.

•   Sevis Komiti: Komiti e kin “Kingdom yu mulom ka” neori kesmen kongan kantawol enem.​—Matyu 24:14.

•   Teaching Komiti: Komiti e kongrikeisen make paim bar, sukul nim bar, na odio vidio erkesim bar kongan kantawol esim.

•   Raiting Komiti: Komiti e Baibel mem pande buk, nus na pablikeisen erkun ere kin websait a min kel moksum kongan kantawol ere, ala yu akrom kongan pra kantawol esim eri.

 Ala wakan ding dingne Gapening Bodi ga makero, okanaiseisen a wal er pakeronam mal yune pisim. Make embe tom bar Baibel yu meim omukro pile, ala kankerambe Got murmulom dongal enjep pakero erkelde kumbol ding molo wal omukrom.​—Aposel 15:25.

Ga namal Gapening Bodi pakerom?

 Pilgi a dongal meim angjen man e, Gapening Bodi komiti kongan pakerom. (1 Korin 4:2) Komiti a tuwal meim kongan enjep enam sape paiyem, ala wakan ding dingne makerom bar enjep tuwal meim. Weieri, kongan enam mal wal omukrom enjep yu nanim, ba enjep bu paim mal neori kele wal enam mal bunuman ngom, komiti ga kumbol ding seim wal esim, ala kongan nalmal punom anjngo kurkanim. Gapening Bodi enjep pra makronambe, angjen ambanjen man mal tambem pende meim bar pu kanim, mo make tom kunum mo Sukul Giliet gredweit esim bar pu yunim.