“Na yau se min wond bar, ombun ende na tomen keral pesil wei pam e, ye ende kanka kanj mem. Kunum ding tuwal wal e na bol min wonom ne pinj, ba ye ende kanka kanj mem na bol anjngo pamom.”​—Depit, 23.

 Depit olom Kristen ende mom pile erkelde Got kapisa nepim. Olom Got kapisa wal ere ala ye ende kanka kanja kun paiyem mo? Yeye na ambamb bolsim mem Got nalmal wei pisem?

•  Baibel nal padom?

•  Yu mem nalmal paim . . . ?

•  Ba embe pande pe . . . ?

 Baibel nal padom?

 Yeye na ambamb bolsim alamb nomolpa esim bar kombe kunum na yipe kunum bol dingmal napaiyem. Ba Kristen kankerambe alamb bunuman puli kesim mem enjep kolta naninda “ala komb pop wal to jeljel kerem” mal enjep kankul sinda yu ninam komol se napisam ma. (Efesus 4:​14) Yeye na ambamb bolsim Baibel lo nal padom karkar ere, ala embe (enam kunum mambnem pende pra omukronam eri)

 Yeye na ambamb bolsim Baibel lo penema wei paiyem. Baibel embe dom:

•  “Nim amb bol wur paiyen mal ye bol embe dingmal napandel.”​—Wok Pris 18:22.

•  “Got enjep bunuman kes mituwal kumbola sem pikane erim, . . . embe pile kankem enjep mambnem jengimb tuwal pu enjip, ambra komb ye kin wurding panam ne napinjip enjep amb ende kin wurding panam ne pinjip, Got enjep embe enam ne ernasem.”​—Rom 1:​24, 26

•  “Enem enem gend naronam. Alamb mambnem kes ere, imis lotu erngo, pasdia mem esim, yera bol sinam e kapil panim, ala yeye wurding paim, kunumb kun alamb, kolumb nom alamb, nol no sipak esim alamb, mo alamb ende yu kes ne ngonam alamb, mo alamb ende wal kenjen wal pane sim alamb porpor e Got Kingdom a tuwal napunam.”​—1 Korin 6:​9, 10.

 Weieri, Got lo alamb porpor lo, yeye wurding panam ne pisim na ambamb wurding panam ne kapisim. Ba wal kerma paim, enjep-porpor Got kanapisem mambnem kumbol si akisde enam ne enam kumbol eri kantawol ka enam.​—Kolosi 3:5.

 Yu mem nalmal paim  . . . ?

  E tadom alamb yeye kanka kanim ga kin popol sim Baibel kin kumbol ding seim mo?

 Ma. Baibel alamb ende kanka nakanam panadom​—e ende gei meim mo nameim pra. Embe pile, Baibel kenem ningo nomolpa enam jeljel panda ba “ombol ere alamb porpor bol kumbol amin moya dom.” (Hibru 12:14) Embe pile yeye na ambamb wurding panam ne kapisim bar enjep bol mambnem napam mal erngondol mo, enjep kankes kanjel kun napaim.

 Lo yeye na ambamb bol sim mem kapil padom Kristen tuironamen mo?

 Baibel tane penema kerem Got kapisem ye na amb dingeri bolsinambel. (Matyu 19:​4-6) Ba alamb lo pakle yeye na ambamb bolsinam panim e polotik wal tuwal pum, lo e kun paim moma. Baibel Kristen ga ningo polotik wal tuwal napuya dom. (Jon 18:36) Embe pile enjep gapman lo pakle yeye na ambamb bolsinam mo wurding panam kaple panim bol molmen kele opoyem naesim.

 Ba embe pande pe . . . ?

 Alamb ende yipe yeye na ambamb wurding paim mem karkar erim dal nalmal panda? Mambnem e wakronda mo?

 Weieri. Komna aposol kunum ga pende embe enjep! Yeye na ambamb bolsim ga Got Kingdom a tuwal napunam. Baibel embe nim: “Enem pende mambnem embe mal enjep.”​—1 Korin 6:​11.

 Nim pisen bulto enjep mambnem e wakronam ne makronom mo, yeye na ambamb bol wurding panam ne kapisim mem e ala min nawowo erim? Ma. Baibel embe dom: “Konkongol keren mal mambnem kol endel. Sape dulto erkelde mambnem e wokol punom.” (Kolosi 3:​10) Mambnem kol anjngo endel.

 Ba alamb ende Got lo karkar enda ne kapisa ba, olom yeye na ambamb wurding paim mem kumbol a pamom dal, e pi nalmal panda?

 Alamb wal ende kumbola kapisim min wonom kunum, olom omukro sikera mo se tuwal pu enda. Embe nalmal enda? Baibel embe dom: “Enem kankerambe oli spirit enem kol taninda, nalerim wusngam ele enem kumbol si akisde mambnem kes enam nepisim mem kerei ende karkar naenam.”​—Galesia 5:​16.

 Wes mand ele kumbol si akisde mambnem kes kumbola min nawonda panadom ma. Embe pile, alamb kumbol si akisde mambnem kes enam ne pisim mem kumbola senda, ombol ere, yane ne ala enjep enjep Baibel yu duwom ere tomen keram.

 Atikol ele kenem Depit yubol tonjin, olom pilkane erim, yu e yuwei pam​—bulto olom ombun pam mal Kristen damman tal nengom, olom embe nim. “Na enjep bol wamnam yu ninange ombun kerma na padang a pam wakronange,” olom ala embe nim, “na ngal gal mond kunum kolmem pal kin kapisange.”

 Weieri, kenem Johova lo karkar ere yipe wopil meimen. Kenem pilkane esmen lo e “dulto wei paiyem ala erkelde alamb kapisim,” ala ‘‘lo karkar enem ye topom ka sinda.”​—Buk Song 19:​8, 11.