NGANG AMBEL GAL WALEM KI AIJEP

Nal Ende Na Kingdom Gar Sem Bar Make Punal?

PLAY

Wakan dingne tuwalto, kunum tal ne Johova Witnis ga lotu ere enjip Kingdom Gara Make torojip. Nawal kulu ele min wowo erim, ala Make e nim nalmal pake ronda?

Kingdom Gara nawal min wonom?

Kingdom gara Baibel yu duwom esim. Make ele pundol bar nim pakerondo:

Got bol sape dulto sindel.
Mem pande yipe wal porpor min wonom pilkane endel.
Ye amb ka ende morol.
Tap ka ga kansindel.

Nim pilkane enen mo? Johova Witnis ga Makerom dumam Kingdom Gar panim, nalenem Got Gapman yubol ele tom.—Matyu 6:9, 10; 24:14; Luk 4:43.

Nal ende nim Make e pundol?

Yu mand e nim pakeronda. Johova Witnis ga make esim bar Baibel kolta yunim, nim pakerondo “bunuman ka” sindel. (Provep 4:5) Ala tani penema kerem Baibel nim pakerondo nomolpa enen bar wal omuk karondol. Embe endel mal ki pende meim:

Make ere enjip mal yu pengem yipal pende meiyem:

Nal ende Kankelpe Baibel kenem Kol taninda?
Kenem Ombun min Wonda kunum Jebar pu Pake Sinamen?
Got Gapman Wal yipe ere Kenem Pakeronom.

“Na sukul ding ende make wongo na pemili bol ai ami ne monjin. Ala kin buk ai omukronjin. Bulto, olom na ki si angjen ambajen man ki pundom ngonjup na kanmalmal wei erind panim. Ala olom na ningo kin lotu esmen bar yuduwom embe naerejin panim.”—Brenda.

Nim pikane enen mo? Kingdom Gar seim bar ki si pundol, ku pane ki nasinam.

Alamb ende bol tapairon dal nim erdongal enda. Baibel dom mem ende pande Kristen tapai tonam bar “ende ende erdongal enam.” (Hibru 10:24, 25) Tapka tonom alamb ende meim olom Got na alamb ende si ngimba kerem, embe enem bar ya mala alamb enjep enjep nepisim bar olom dongal kol sinem.

“Tagaling na wal si wanjs kunum poninde na wimuk nine erim, ba Kingdom gara angjen ambajen man er kerambe na kawei pinj. Bulto Make pornim, se gara pund kunum, kawei wei pile tangdero wal enal mal buro pinj.”—Elisa.

Nim pilkane enen mo? 120,000 Johova Witnis ga kongrikeisen mal tambem yemyem poro seim, ala 60,000 poro kulu jeljel makerom. Kongar ding dingne tuwalto Kingdom Gar 1,500 mal tauwo dumam erka ersenambe alamb puli wo moram kaple enda. a

Nim kongar ding ga yujop

“Na ai sukul mond kunum, na sukul ding ambel kunum pende ne na bol make wowo erim, ala kongar jeljel monjup ga Baibel yu dowom enjep kanim kunum, olom malmal keswei erim. Kunum kanan wonapunom na bos aina make wo kanim, Baibel konganem kunum kunum enjin kunum, e erkelnge olom kawei wei pim. Na olom kanj kapim kunum na kawei wei pinj eri!”—Jesika.

“Na pilkane erind make pund bar pakero kelnge kunum ding dinge ombun min wom buro napinj. Kin kapil moramen mal wusngam ende kansi, nalmal ye ka molo wal puli duwom enal mal kanj. Na Kingdom gar wakro seori wond kunum dongal kol sind.”—Timoti.

“Na ye ende wiro make wa nind, bulto olom embe nim: ‘Na make wo enem kun napam wal pilgi nim kanal ne wond. Ba na pilkane erin nam pilgi nind wal kun napam!’ Olom Johova Witinis ga tapka ronjip pra kanka kanim. Olom embe nim: ‘Yipe mongsi na enem bol wond ba, enem mambnem esim kongar puli na senonjup mal embe pam!’ ”—Jekop.

“Kunum pende na bu embe sepile erind make poro ninda kunum, ‘na kamkam se gara punal.’ Ba make kunum, na bunuman e se taipum. Make bulto, na ga pende bol yu nind kunum, nal ende na yero se gara pupo erind ne pinj. Ala na make e napund dal na tap ka ga embe namoram.”—Madison.

a Nim mein bar Kingdom Gar ende sende kansindel ne pindal, “Johova Witnis ga kongrikeisen make” pane paim bar klik ere kan sindel.

Johova Witnis