Baibel pundom ngonom

 Ma. Baibel ku wal kes panadom, ala ku mambnem kes porpor mem paiyem panadom eri. Yu mand “ku mambnem kes porpor padom” e alamb puli embe nim, e wes apal pende, Baibel yu kun wei nadom panim. Ba Baibel “ku kanka kanim mem mambnem kes porpor mem paiyem padom.” a—1 Timoti 6:10, King James Version, yu “kanka” kangem nganimb kerma bolkenjip paim.

•  Baibel ku bol nal padom?

•  Nal ende Baibel ku kanka kanmen mem kanpol toya dom?

•  Baibel ku konganem enamen mal dom kenem nalmal pake sinamen?

•  Baibel wes pende ku yubol tonom

 Baibel ku bol nal padom?

 Baibel dom ye ende ku kun paim mal konganem enem e, ku olom pakero “kantawol” enem. (Eklisiastis 7:12) Ala, alamb ende ku na wal pende alamb ende ngonom, Baibel e mambnem ka padom.—Provep 11:25.

 Nomolpa esmen bar ku si ngimba kenjin dal, Baibel kanpol tonamen padom. Baibel embe dom: “Enem nomolpa esim bar, ku kanka kanim mambnem karkar naenam.” (Hibru 13:5) Nomolpa esmen bar sem wal por sem ne pisamen. Wes e kenem duwom embe erngom, ku konganem pam mal ere ala ku puli sinamen ne bu nakeramen. Ka paiyem, kenem kep mokun, konkongol, na gulgar sem dal, wal e por sem ne pile kapisamen—1 Timoti 6:8.

 Nal ende Baibel ku kanka kanmen mem kanpol toya dom?

 Kolumb sipe nom alamb kolmem nasinam. (Efesus 5:5) Kolumb nom mem lotu gend na imis lotu erngom bol dingmal paiyem. (Kolosi 3:5) Ala kolumb nom alamb mambnem dulto karkar na ere, enjep enjep kapisim wal sinam nepisim. Provep 28:20 dom, “Ye ende wamnam ku puli kanonal nepisa, olom ombun sinda.” Enjep mambnem kes pende embe mal enam, alamb er kerambe kisal golo enjep ku kerma ngonam, enjep alla okul enam ne enam, ala enjep alamb jel kumoni na wal pende tosi, alamb pra togoram eri.

 Ku kanka kanem ye mambnem kes pende naenda, ba ombun pende olom bol min wonda. Baibel embe dom, “alamb ende ku puli sinam ne esim enjep wal ende min wo erkanal ne enda kunum, enjep kilto bo ronam ala enjep mambnem kes bol kapile bunuman ka karkar naenam.”—1 Timoti 6:9.

 Baibel ku konganem enamen mal dom kenem nalmal pake sinamen?

 Kenem kun paiyem wal ere ala Got yuwom karkar esmen, kenem kumbol amin kin molpo Got kenem bol kapile pakeronda. Alamb Got kapisa ne wal porpor esim, olom enjep bol yu dongal embe dom: “Na enem wak wei naronal, ala na enem bul wei na ngonal.” (Hibru 13:5, 6) Ala Got yu dongal ende embe dom, “alamb ka wal kaka puli sinam.”—Provep 28:20.