Baibel pundom ngonom

 Kunum puli Jises “Got ngalem” pandom. (Jon 1:49) “Got ngalem” pandom tane penema kerem Got wal porpor erim, mo kol meiyem wal porpor olom mem, ala Jises pra. (Buk Song 36:9; Revelesen 4:11) Got ngangem ya mala alamb ngal kangsim mal e dingmal pam pane Baibel nadom.

 Baibel “enjol meim Got ngalem man” pandom. (Jop 1:6) Ala Baibel dom, ye komna Adam “Got ngalem” pandom eri. (Luk 3:38) Ba komna wei Got Jises erim, embe pile Baibel Jises Got Ngalem komna pandom.

•  Jises mala na kangjip kunum yero min epen mom nepisen mo?

•  Jises mala nawom kunum yero nalerim?

 Jises mala na kangjip kunum yero min epen mom nepisen mo?

 Weieri. Mala nakangjip kunum yero min epen kipe mal mom. Jises olom embe nim: “Na epen wakro se mala wond.”—Jon 6:38; 8:23.

 Got Jises yero ere bulto wal pende erim. Baibel Jises bol embe dom:

•   “Olom ngimba wei ere. . . wal porpor akling erim.”—Kolosi 1:15.

•   Wal porpor erim kunum “olom ngimba wei pulnombol ersem.”—Revelesen 3:14.

 Ye komna wei ende minwom pane yu propet pam Jises mongom tom “olom kombe kes ye.” —Maika 5:2; Matyu 2:4-6.

 Jises ya mala nawom kunum yero nalerim?

 Olom min epen namba kerma ambim. Jises namba e dale yane embe nim: “Dana, na kangem min kele. . . Kangem kerma e alamb ya mala min nawonjup kunum na bol sem.”— Jon 17:5.

 Olom Dam pakero wal porpor erim. Jises “sape ye mal Got kin mand molo kongan erim.” (Provep 8:30) Baibel Jises bol embe dom: “Jises wusngam a Got kupula na mala wal porpor ersem.”—Kolosi 1:16.

 Jises wusngama Got wal porpor erim minwom. e Spirit, mala, na kupula wal propor meiyem. (Revelesen 5:11) Enjel ai kongan ka esbel, akitek ga wose ding pu gar kongan esim dingmal. Akitek gar plen ende; gar taunom ye karkar ere gar simin kerem.

 Yu konganem erim. Baibel Jises pane yubol yero tom bulto Jises mala wom, embe pile Baibel Jises “yu” pandom. (Jon 1:1) E tane penema kerem Got Jises konganem ere yuwom sip spirit pende monjip bar ningom.

 Ala ende kenem pilkane esmen Jises yu kep ye mal molo yu si mala alamb monjip bar tum. Gaden Iden Andam na Iv yu karkar enambel ne Jises wusngam a yu ningom pam. (Stat 2:16, 17) Israil ga mal kulman ersem bar Jises enjol mal ende se ngimba pum, olom yunim mal enjep kun karkar enam pam.—Kisim Bek 23:20-23. a