Baibel pundom ngonom

 Baibel yu “ngal ambil kesim” ende konganem naenem, e ngal mam kumbol tuwalto moldo ambil kesim. Ba, Baibel wes puli Got alamb kolmem bol bunuman ambrem mal yubol tonom, e ngal mam kumbol tuwalto sedarem pra.

 Kolmem wal kawei ende Got kin wom. (Stat 9:6; Buk Song 36:9) Olom kolmem paim wal poro wal kawei wei mal pisem, e ngal mam kumbol tuwalto meim pra. Embe pile ende kanse ngal kumbol tuwalto meim togorom, e ye ende ermolo ye ende togorom mal embe dingmal paiyem.

 Got Lo Israil ga ngom embe nim: “Alamb ende nganmal borambe ende ermolo amb ngal kumbombol tondo amb ngal kura kunum nasende yero kuldo, amb na ngal ai na gonjul dal, amb tom ye amb andam ku ngo, era ninda wal ere alla enem bar erkun enda; kot pisim ga ku nalnal nga ninam mal ngo erkun enda. Ba ngal mo mam ende gonjul dal, kolmem wakrom mal topom dingmal ngonam.”—Kisim Bek 21:22, 23. a

•  Nim pisen kolmem nal kunum pulnom bom?

•  Amb ngal ambil kera Got olom alla wakronda ne pisen mo?

•  Ngal mo mam ende kolmem wakronambel mal pam dal ngal ambil keram kun paim mo?

 Nim pisen kolmem nal kunum pulnom bom?

 Got dungol a, amb ngal kumbol a sedarem kunum kolmem pulnom borom. Baibel a, Got yubol to ngal mam kumbol tuwalto meiyem, alamb wei mal ende padom. Got ngal kumblamb mam kumbol a meiyem mo kangil si ori kerem, kolmem wei pil ngom mal Baibel yubol tom omukro kanjel.

•   Oli spirit King Depit kolta ninge olom Got ningo embe nim: “Na maiyam sedam kunum nim dungol na kanim.” (Buk Song 139:16) Depit mam nakangim kunum yero Got olom alamb wei ende mom mal kanim.

•   Ala, propet Jeremaia nakangjip kunum yero, Got kongan kerma wei ende olom ngonda pilkane erim. Got olom ningo embe nim: “Na erkelne nim manem kumbol a min nawon kunum, na nim kanjs, ala manem nim nakangim kunum, na nim kongan kerma ende endel ne makrond. E propet kongan ka kantri tuwalto endel.”—Jeremaia 1:5.

•   Luk e dokta ende, olom pra Baibel bom, olom Grik yu dingmal konganem ere ngal kangil ori kenjip na ngal kumblamb pi mand kangil ori kenjip makronom.—Luk 1:41; 2:12, 16.

 Amb ngal ambil kera Got olom alla wakronda ne pisen mo?

 Ambra ngal ambil kesim Got enjep alla wakronda kaple enem. Ba yipe ngal ambil kesim alla kerma paim ne pilkane enjip dal, weieri enjep kumbol yu ninda ba Got enjep alla waknaronda ne embe pisam olom kanapisem. “Johova wandil mem sem. . . anj almin wo se men punom bar mand naseiyem, embe dingmal olom kenem alla wakro si kolbar wei kerem.” b (Buk Song 103:8-12) Alamb porpor kombe alla enjip bar kumbol wei toakronam Johova enjep alla wakronda e, ambra ngal ambil kesim pildom eri.—Buk Song 86:5.

 Ngal mo mam ende kolmem wakronambel mal pam dal ngal ambil keram kun paim mo?

 Ngal kumbol tuwalto sedarem kunum, Baibel yubol tonom mal buro pin dal, tane penema kerem ngal mam bol ombun min wonda mal panda ba ngal ambil nakerel.

 Ngal manjep ngal kangra ne ende ombun min wondo enjep pilkane ere ngal mam bol kolmem kantawol enam ne omukronam mo? Kunum embe ende min wonda kunum, ye omukro karo yu ninde dokta ngal mo mam kolmem ersinda.