God yi name be holy and we get-am for we Kingdom Hall them. Na why that weh na big honor for we for join hand for see say make e remain clean and make e no spoil. Na important part for we worship and all man fit join hand work for keep-am clean.

Stay small after meeting for clean hall. When meeting finish, brother and sister them di glad for do small work for clean the hall. Then inside week, they di clean-am again fine. Some elder or ministerial sevant di check the work and for see thing weh they get for do-am. Brother and sister them like for do work them like for sweep, dry-clean, wipe dust. They di arrange chair them, wash toilet, wash door and window them. And they di trouwei dirty, and clean yard. We di choose some day them inside one year for join clean we Kingdom Hall fine-fine. When we di clean with we pikin them, e di teach them for like and for respect Jehovah yi house.​—Ecclesiastes 5:1.

Join hand for fix any thing weh e spoil. Every year, we di check all side for we Kingdom Hall them fine-fine. We no di wait make some thing spoil all-all before we fix-am. This one di helep we for no di waste money. (2 Chronicles 24:13; 34:10) Kingdom Hall weh they fix-am fine and weh e clean na fine place for worship we God. When we join hand for do this work, e di show say we over like Jehovah and the place weh we di worship yi for deh. (Psalm 122:1) And when people see as we di clean we Kingdom Hall e di touch their heart.—2 Corinthians 6:3.

• Why we di lukot we Kingdom Hall fine?

• How we di arrange for clean we Kingdom Hall?