Pakadto ha sulod

May Kalugaringon ba nga Biblia an mga Saksi ni Jehova?

May Kalugaringon ba nga Biblia an mga Saksi ni Jehova?

An mga Saksi ni Jehova nagamit hin iba-iba nga hubad ha ira pag-aram ha Biblia. Pero, ha mga yinaknan nga may-ada na Bag-o nga Kalibotan nga Hubad han Baraan nga Kasuratan ito an amon ginagamit tungod han paggamit hito han ngaran han Dios, pagin husto, ngan pagin klaro.

  • Paggamit han ngaran han Dios. An pipira nga nagpublikar han Biblia waray makaghatag hin pasidungog ha Awtor hito. Pananglitan, ha usa nga hubad han Biblia, iginlista an sobra 70 nga ngaran han mga tawo nga nakabulig ha pagpublikar hito. Pero, hito gihapon nga Biblia, ginpananggal an ngaran han Awtor hito​—hi Jehova nga Dios—​waray nasalin bis’ usa!

    Ha kabaliktaran, iginbalik han Bag-o nga Kalibotan nga Hubad an baraan nga ngaran hin yinukot ka beses kon diin ito makikita ha orihinal nga sinurat, pero an komite nga nagpublikar hini waray ngarani.

  • Pagin husto. Diri ngatanan nga hubad husto nga nagsusumat han orihinal nga mensahe han Biblia. Pananglitan, ha usa nga hubad, sugad hini an pagkahubad ha Mateo 7:13: “Sulod kamo han haligot nga aragian; kay haluag an aragian ngan masayon an dalan tipakadto ha impyerno.” Pero, an orihinal nga sinurat naggamit hin termino nga “kabungkagan,” diri “impyerno.” Posible nga gin-gamit han mga parahubad an pulong nga “impyerno” tungod kay natoo hira nga an magraot pasasakitan ha impyerno ha waray kataposan. Pero ito nga ideya diri ginsusuportaran han Biblia. Salit, husto an pagkahubad han Bag-o nga Kalibotan nga Hubad, nasiring ito: “Sulod kamo pinaagi ha haligot nga ganghaan, kay haluag an ganghaan ngan hilapad an dalan tipakadto ha kabungkagan.”

  • Pagin klaro. An usa nga maopay nga hubad diri la kay husto kondi klaro liwat, ngan masayon masabtan. Kitaon ta an usa nga ehemplo. Ha Roma 12:11, hi apostol Pablo naggamit hin ekspresyon nga ha literal nangangahulogan hin “ha pagkaladkad han espiritu.” Tungod kay ini nga ekspresyon diri na masyado nasasabtan ha moderno nga Ingles, ginhubad han Bag-o nga Kalibotan nga Hubad ini nga bersikulo ha paagi nga mas masayon masabtan. Nasiring ito nga an mga Kristiano sadang magin ‘madasigon gud pinaagi han espiritu.’

Labot han paggamit han ngaran han Dios, pagin husto, ngan pagin klaro, may usa pa nga kaibahan an Bag-o nga Kalibotan nga Hubad: Libre ito. Amo nga minilyon an nakakabasa han Biblia ha ira kalugaringon nga yinaknan​—bisan adton diri nakakapalit hin kalugaringon nga Biblia.