Pakadto ha sulod

Paonan-o Ginsusuportaran an Buruhaton han mga Saksi ni Jehova?

Paonan-o Ginsusuportaran an Buruhaton han mga Saksi ni Jehova?

 An pinansyal nga suporta han amon bug-os-kalibotan nga buruhaton kasagaran na nga nagtitikang ha boluntaryo nga mga donasyon han mga Saksi ni Jehova. * May-ada mga kahon han kontribusyon ha amon mga katirokan, ngan an iba pa nga paagi ha pagdonar nakalista ha amon Donations page. Hito nga page, may iba-iba nga opsyon basi an indibiduwal makapili pagdonar para ha amon bug-os-kalibotan nga buruhaton, lokal nga mga kagarastohan, o para hito nga duha.

 An mga Saksi ni Jehova diri ginlalaoman nga maghatag han ikanapulo o magdonar hin espisipiko nga kantidad o porsyento han ira kità. (2 Corinto 9:7) Diri kami nangungolekta ngan waray bayad an pagtambong han amon katirok. An amon liwat mga ministro diri nagpapabayad kon nagdudumara hin pagbawtismo, lubong, kasal, o iba pa nga relihiyoso nga buruhaton. Diri kami nagtitirok hin pundo pinaagi hin pamaligya hin pagkaon ngan gamit, pagpa-bingo, pag-organisar hin sarayaw ngan panihapon, pagparapol, o puropariho nga mga aktibidad. Diri liwat kami nagsusolisit hin mga donasyon. An mga impormasyon mahitungod ha mga nagdonar diri ginpapahibaro ha publiko. (Mateo 6:2-4) An amon mga website ngan publikasyon waray mga adbertisment hin mga negosyo.

 An tagsa nga kongregasyon han mga Saksi ni Jehova nagpapakita hin binulan nga financial report ha ira mga katirok, nga abrido ha publiko. An mga accounting record han tagsa nga kongregasyon regular nga gin-aawdit basi masiguro nga an mga donasyon nagagamit ha husto nga paagi.—2 Corinto 8:20, 21.

Mga Paagi ha Pagdonar

  •   Mga kahon han kontribusyon: Puydi ka maghulog hin kwarta o tseke ha mga kahon han kontribusyon ha mga Kingdom Hall, Assembly Hall, o ha iba pa nga lokasyon diin nagkakatirok kami.

  •   Online nga pagdonar: Ha damu nga nasud, puydi mo gamiton an page nga “Pagdonar ha mga Saksi ni Jehova” basi makagdonar pinaagi hin credit card, debit card, bank transfer, ngan iba pa nga elektroniko nga mga paagi. * An iba nga mga Saksi nagdesisyon nga “maglaín hin maiaamot” kada bulan pinaagi ha pag-eskedyol hin regular nga donasyon gamit an usa hini nga mga paagi.—1 Corinto 16:2.

  •   Ginplano nga paghatag: An pipira nga paagi ha pagdonar nagkikinahanglan hin abanse nga pagplano ngan/o legal nga pamaagi. Hini nga paagi, posible maibanan an imo baraydan ha buhis depende ha imo nasud. Damu nga indibiduwal an nagpahimulos pinaagi ha pagin pamilyar mahitungod ha mga donasyon nga puydi nira ihatag samtang buhi hira o ihahatag ha ira ginpili kamatay nira. Alayon kontaka an sanga nga opisina han mga Saksi ni Jehova ha iyo lugar para hin dugang nga detalye kon an imo karuyag idonar nag-uupod hin:

    •   bank account

    •   insurance ngan retirement plan

    •   real estate

    •   stock ngan bond

    •   will ngan trust

 Para hin dugang nga impormasyon mahitungod ha mga paagi ha pagdonar nga available ha iyo lugar, kitaa an page nga “Pagdonar ha mga Saksi ni Jehova.”

^ par. 1 May pipira liwat nga diri Saksi nga nalilipay pagdonar basi suportaran an amon buruhaton.

^ par. 5 Kitaa an video nga Giya Para ha Elektroniko nga Paghatag hin Donasyon para hin dugang nga impormasyon.