Pakadto ha sulod

Sumati Hira nga Hinigugma Mo Hira

Sumati Hira nga Hinigugma Mo Hira

Hi Ong-Li usa han mga Saksi ni Jehova ha Bulgaria. Gindudumarahan niya hin pag-aram ha Biblia an usa nga batan-on nga babaye nga hi Zlatka, nga an asawa diri naapi ha pag-aram. Hi Ong-Li nagsiring: “Samtang ginhihisgotan namon an mahitungod ha pamilya, ginpabug-atan ko an importansya ha pagsumat ha aton mga asawa ngan mga anak nga hinigugma naton hira. Hi Zlatka masurub-on nga nagkita ha akon; nagsiring hiya nga waray pa gud niya sumati an iya asawa o an iya noybe anyos nga anak nga babaye nga hinigugma niya hira!”

Hi Zlatka nagsiring, “Bubuhaton ko an bisan ano para ha ira, pero diri ko la kaya isiring ito nga mga pulong.” Ngan nagsiring pa hiya, “An akon nanay waray gud magsiring ha akon nga hinigugma niya ako, ngan an akon lola waray gud magsiring ha akon nanay nga hinigugma niya hiya.” Iginpakita ni Ong-Li kan Zlatka tikang ha Biblia nga nagsiring hi Jehova nga hinigugma niya hi Jesus. (Mateo 3:17) Gin-aghat niya hi Zlatka nga ig-ampo ito kan Jehova ngan himoon nga tumong nga sumatan an iya asawa ngan an iya anak nga hinigugma niya hira.

Hi Ong-Li nagsiring: “Paglabay hin duha ka adlaw, malipayon nga ginsumatan ako ni Zlatka nga nag-ampo hiya kan Jehova nga buligan hiya. Han inuli an iya asawa, ginsumatan niya hiya nga nahibaroan niya ha iya pag-Bible study nga importante para ha asawa nga irespeto ngan higugmaon an iya asawa. Kahuman, inundang hiya hin madaliay, ngan katapos ginsidngan niya an iya asawa nga hinigugma gud niya hiya! Han inuli an iya anak, ginhangkopan hiya ni Zlatka ngan ginsidngan hiya nga hinigugma niya hiya! Hi Zlatka nagsiring ha akon: ‘Naggaan gud an akon pag-abat. Ha naglabay nga mga tuig, waray ko gud maipahayag an akon inaabat pero ha bulig ni Jehova, naisumat ko na gihapon ha akon pamilya nga hinigugma ko hira.’

Hi Ong-Li padayon nga nagtatanyag hin pag-aram ha Biblia ha iya mga amyaw

Nagsiring pa hi Ong-Li, “Paglabay hin usa ka semana, nagkita kami han asawa ni Zlatka, ngan nagsiring hiya ha akon: ‘Damu nga tawo an nagsiring ha akon nga diri maopay nga nag-aaram hi Zlatka han Biblia kaupod mo, pero nakita ko nga nakakabulig gud ha amon pamilya an iya pag-aram han Biblia. Yana, mas duok ngan mas malipayon an amon pag-asawa.’”