Pakadto ha sulod

Humunong Hira Basi Bumulig

Humunong Hira Basi Bumulig

Hi Bob nagdadrayb ha kalaksihon nga mga 100 ka kilometro kada oras ha mahagkot ngan makusog an hangin nga adlaw ha Alberta, Canada, han tigda nga binuto an wala nga kaliding han iya van ha likod. Waray dayon mapansin ni Bob an nahitabo, salit nagpadayon hiya pagdrayb pakadto ha ira balay nga lima ka kilometro pa.

Ha usa nga surat nga iginpadara ha Kingdom Hall han mga Saksi ni Jehova hito nga lugar, iginsaysay ni Bob an sunod nga nahitabo. “Samtang nagdadrayb ako, may sinapit ha akon nga awto nga may sakay nga lima nga batan-on ngan gin-abrihan nira an ira bintana,” hiya nagsurat. “Ginsumatan nira ako nga binuto an akon kaliding. Ginparada namon an amon awto ngan nagsiring hira nga bubuligan nira ako ha pagliwan han akon kaliding. Diri ngani ako maaram kon may-ada ako reserba o jack. Samtang nalingkod ako ha akon wheelchair ha ligid han kalsada, ginkuha nira ha ilarom han van an reserba nga kaliding ngan an jack, ngan ginliwanan nira an kaliding. Sobra kahagkot ngan nauran hin snow hito nga adlaw. Maopay gud an ira pamado, pero ginliwanan nira an akon kaliding ngan nakapadayon ako ha pagdrayb. Kon ako la, diri ko ito mahihimo.

“Salamat ha lima nga batan-on nga Saksi nga binulig ha akon. Nakada hira hito nga lugar kay tikadto hira ha balay han mga tawo basi magsangyaw. Ginbubuhat gud hini nga mga batan-on an ira iginsasangyaw. Kon waray nira ako buligi, magigin makuri gud ha akon ito nga sitwasyon, salit gin-aapresyar ko gud an ira ginhimo. Hin-o ba an maghuhunahuna nga may batan-on nga mga anghel ha kalsada hito nga adlaw?”