Pakadto ha sulod

Kalmado nga Gin-atubang an Nasisina nga mga Padi

Kalmado nga Gin-atubang an Nasisina nga mga Padi

Hi Artur nga paramangno han sirkito ha Armenia nabisita hadto ha usa nga kongregasyon han mga Saksi ni Jehova. Hinbaroan niya nga waray pa hira makagsangyaw ha publiko gamit hin cart nga may basado ha Biblia nga mga publikasyon. Para maaghat hira, hi Artur pati an iya asawa nga hi Anna upod an usa pa nga Saksi nga hi Jirayr nagbutang hin cart ha usa nga gutiay nga bungto. Pumwesto hira ha lugar nga damu an naagi.

Nainteres dayon hito an mga nalabay ngan nagkuha hin barasahon. Pero waray pag-iha, napansin ito han mga parakontra. Duha nga padi an humirani ha cart, ngan an usa ha ira tigda nga ginbanyakan an cart. Tapos iya gintampalo hi Artur, salit tinalbo an eyeglass ni Artur. Nagsari hira Artur, Anna, ngan Jirayr nga pakalmahon an mga padi, pero waray hira maglampos. Gintamak-tamakan han mga padi an cart ngan ginsarang an mga barasahon. Katapos buyayawan ngan tarhugon an mga Saksi, binaya hira.

Kinadto hira Artur, Anna, ngan Jirayr ha estasyon han pulis basi magpablater. Ginsumat nira an nahitabo tapos nakiistorya hin madaliay ha pipira nga pulis ngan empleyado mahitungod ha Biblia. Kahuman, gindara hira nga tulo ngadto ha opisina han opisyal. Ha siyahan karuyag la niya mahibaroan an nahitabo. Pero han hinbaroan niya nga hi Artur, bisan kon daku an lawas, waray umato han gintampalo han padi, waray na hiya magpinakiana mahitungod ha kaso lugod nagpinakiana na la ha gintotoohan han mga Saksi. Tungod hito, upat ka oras hira nga nag-iristorya! Bumilib gud an opisyal han iya hinbatian salit nakagsiring hiya: “Kaopay han iyo relihiyon! Magpapamembro ako!”

Hira Artur ngan Anna

Kinabuwasan, han hi Artur nagsangyaw utro ha publiko, may humirani ha iya nga lalaki nga nakakita han nahitabo ha naglabay nga adlaw. Gindayaw niya hi Artur tungod han pagin kalmado ngan diri pagbulos. Nagsiring pa hiya nga tungod han iya nakita nawara an iya respeto ha mga padi.

Pagkagab-i, ginpabalik hi Artur han opisyal han pulis didto ha estasyon. Pero imbes nga pag-istoryahan an kaso, nagpinakiana pa hiya mahitungod ha Biblia. May duha pa nga pulis nga inapi ha ira.

Kinabuwasan, ginbisita utro ni Artur an opisyal basi ipakita an pipira han aton mga video nga basado ha Biblia. Gintawag han opisyal an iba pa nga pulis para magkita liwat han mga video.

Tungod han diri maopay nga pamatasan han mga padi, damu nga pulis an nasangyawan ha siyahan nga higayon. Salit nagkaada hira maopay nga impresyon ha mga Saksi ni Jehova.