Pakadto ha sulod

An Biblia Nakakagbag-o han Kinabuhi

An Pinakamaopay nga Premyo nga Akon Nakarawat

An Pinakamaopay nga Premyo nga Akon Nakarawat
  • NATAWHAN NGA TUIG 1967

  • NATAWHAN NGA NASUD FINLAND

  • PAGKINABUHI HADTO PROPESYONAL NGA PARAUYAG HIN TENNIS

AN AKON NAGLABAY

Nagdaku ako ha mamingaw nga lugar nga hirayo ha sentro han Tampere, Finland. Diri relihiyoso an amon pamilya pero importante ha amon an edukasyon ngan maopay nga pamatasan. German an akon nanay, ngan han gutiay pa ako, may mga panahon nga napakadto kami ha West Germany, diin didto naukoy hira Lolo ngan Lola.

Mahilig na ako ha isport tikang ha kabata. Gin-uuyag ko an ngatanan nga klase hin isport, pero han mga 14 anyos ako, nagpokus ako ha tennis. Han 16 anyos ako, nagpapraktis ako hin duha o tulo ka beses kada adlaw—duha ka sesyon han professional training ngan katapos nagpapraktis ako nga ako la ha gab-i. Naruruyagan ko gud an iba-iba nga aspekto hini nga uyag; an pag-uyag hin tennis usa nga paagi nga nasasarihan ko an akon abilidad ha mental ngan pisikal. Bisan kon nag-i-enjoy ako pakig-upod ha akon kasangkayan ngan pag-inom hin beer ha panapanahon, waray gud ako magkaproblema tungod ha droga o alkohol. An akon kinabuhi nakapokus ha tennis—ito an akon prayoridad.

Nagtikang ako mag-uyag ha mga tournament han ATP han 17 anyos ako. * Katapos magdaog ha damu nga tournament, nagin sikat ako ha amon nasud. Han 22 anyos ako, nagin usa ako han 50 nga pinakamaopay nga parauyag hin tennis ha bug-os nga kalibotan.

Ha sulod hin katuigan, nalibot ko an bug-os nga kalibotan tungod ha pag-uyag hin propesyonal tennis. Damu nga mag-opay nga lugar an akon nakita, pero nakita ko liwat an damu nga problema ha kalibotan sugad han krimen, pag-abuso ha droga, ngan pagdaot ha palibot. Pananglitan, han nakadto kami ha Estados Unidos, ginsidngan kami nga diri kumadto ha partikular nga mga lugar han pipira nga syudad tungod han damu nga insidente han krimen. Naalarma gud ako hini. Dugang pa, bisan kon nalilipay ako ha akon ginbubuhat, katatapos han adlaw, baga hin may kulang pa gihapon ha akon kinabuhi.

KON PAONAN-O NABAG-O HAN BIBLIA AN AKON KINABUHI

An akon uyab nga hi Sanna nagtikang magpa-Bible study ha mga Saksi ni Jehova. Medyo nakalasan ako nga relihiyosa ngay-an hiya, pero waray ako kumontra ha iya pag-aram. Han 1990, nagpakasal kami, ngan nabawtismohan hiya sugad nga Saksi ni Jehova han sumunod nga tuig. Masisiring ko nga diri ako relihiyoso, pero natoo ako nga may Dios. Nahinunumdoman ko nga an akon lola nga German mahilig magbasa han Biblia, ngan gintutdoan pa ngani niya ako pag-ampo.

Usa ka adlaw, han binisita kami ni Sanna ha mag-asawa nga Saksi, iginpakita ha akon han bana nga hi Kari an tagna ha Biblia mahitungod han “kataposan nga mga adlaw.” (2 Timoteo 3:1-5) Naimpres gud ako hini kay dida ko la naintindihan kon kay ano nga maraot gud an panhitabo ha kalibotan. Hito nga adlaw, waray na namon pag-iniristoryahi pa an mahitungod ha relihiyon. Pero tikang hito nga takna, nakikig-istorya na ako kan Kari mahitungod ha Biblia, ngan may punto an ngatanan ko nga nahibabaroan. Tungod kay sagipo ako ngan agsob magbiyahe, diri kami nagkakaistorya ni Kari hin regular, pero waray umundang hi Kari. Ginbabaton niya pinaagi hin surat an akon mga pakiana nga iginbangon ha amon mga pag-aram. An ngatanan nga magkuri nga pakiana ha kinabuhi ginbaton han Biblia ha lohikal nga paagi, ngan hinay-hinay nga nakita ko an kabug-osan nga tema hito​—nga tutumanon han Ginhadian han Dios an katuyoan han Dios. Nabantad gud ako han nahibaroan ko an ngaran han Dios nga Jehova ngan han iya mga ginbuhat ha aton. (Salmo 83:18) An mas nakapabantad ha akon amo an iya tagana nga halad-lukat​—diri la ito kay basta usa la nga kahikayan o legal nga pormalidad kondi usa ito nga kapahayagan han gugma han Dios. (Juan 3:16) Nahibaroan ko liwat nga may oportunidad ako nga magin sangkay han Dios ngan mabuhi ha waray kataposan ha mamurayawon nga paraiso. (Santiago 4:8) Ginpakianhan ko an akon kalugaringon, “Paonan-o ko maipapakita an akon pagpasalamat?”

Ginhunahuna ko hin maopay an akon pagkinabuhi. Nahibaroan ko ha Biblia nga an gintitikangan han daku nga kalipay amo an paghatag, ngan ginhingyap ko nga isumat ha iba an akon gintotoohan. (Buhat 20:35) Sugad nga propesyonal nga atleta, waray ako ha balay ha sulod hin mga 200 ka adlaw ha usa ka tuig tungod ha pakigbahin ha mga tournament. An amon pagkinabuhi sugad nga pamilya nakasentro ha akon​—ha akon pagpraktis, ha akon rutina, ngan ha akon propesyon. Nasantop ko nga kinahanglan ko magbag-o.

Maaram ako nga an akon desisyon ha pagbaya ha usa nga maopay nga propesyon ha isport para ha relihiyoso nga mga hinungdan diri masasabtan han damu nga tawo. Pero an higayon nga mas makilala pa hi Jehova ngan magkaada kinabuhi nga waray kataposan mas daku gud an bili kay ha bisan ano nga premyo nga mahimo ko makarawat ha pag-uyag hin tennis, salit waray ako makurii pagdesisyon. Determinado ako nga igbalewaray an sisidngon han mga tawo​—desisyon ko ini. An usa nga teksto nga labi nga nakaaghat ha akon nga diri magpapresyur amo an Salmo 118:6: “Hi Jehova dapig ha akon; diri ako mahahadlok. Ano an mahihimo ha akon han tawo?”

Hito nga mga panahon, may pipira nga esponsor nga nagtanyag ha akon hin maopay nga kontrata​—makakag-uyag ako hin tennis ha sulod hin katuigan nga waray ako sadang kabarak-an. Kondi, nakagdesisyon na ako, salit waray ko ito karawata ngan ha urhi waray na ako umapi ha mga tournament han ATP. Nagpadayon ako pag-aram ha Biblia, ngan han Hulyo 2, 1994, nabawtismohan ako sugad nga Saksi ni Jehova.

MGA KAOPAYAN NGA AKON NAPAHIMULSAN

Ha akon kahimtang, waray ako makaeksperyensya hin trahedya basi makaghunahuna ako mahitungod ha Dios. Diri ko liwat masisiring nga ginbiniling ko an kamatuoran. Hadto, pag-abat ko maopay na an akon kinabuhi ngan waray na kulang ha akon. Pero baga hin naghinulat ha akon an kamatuoran ha Biblia. Waray ko laumi nga mahibabaroan ko nga may-ada mas hilarom nga katuyoan an kinabuhi, ngan an akon kinabuhi nagin mas maopay gud kay han akon nahuhunahuna! An amon pamilya nagin mas marig-on ngan mas nagkaurosa. Ngan malipayon gud ako nga ginsunod han akon tulo nga anak an akon ginbuhat​—diri sugad nga mga atleta, kondi sugad nga mga Kristiano.

Nag-i-enjoy la gihapon ako pag-uyag hin tennis. Tubtob yana, may kalabotan la gihapon ha tennis an akon trabaho, sugad han pagin coach ngan manidyer ha usa nga tennis center. Pero an akon kinabuhi diri na nakapokus ha isport. Hadto, nagpapraktis ako hin damu ka oras kada semana basi magin maopay nga parauyag hin tennis, magin usa nga kampyon. Yana, sugad nga bug-os-panahon nga ebanghelisador, nalilipay ako paggamit han akon panahon ha pagbulig ha iba nga mahibaro ngan magsunod han mga prinsipyo ha Biblia nga nakagbag-o han akon kinabuhi. Nahibaroan ko nga an pinakamakalilipay nga pagkinabuhi amo an pag-una han akon relasyon kan Jehova nga Dios ngan ha pagsumat ha iba han akon paglaom nga maopay nga kabubuwason.​—1 Timoteo 6:19.

^ par. 10 An ATP amo an Association of Tennis Professionals. Ito an grupo nga nagdudumara han professional tennis circuits para ha mga lalaki. An ATP Tour nag-uupod hin propesyonal nga mga tournament nga naghahatag hin mga point ngan kwarta sugad nga premyo han mga nagdadaog. An world ranking han usa nga parauyag madepende ha kadamu han iya makukuha nga mga point.