Pakadto ha sulod

AN BIBLIA NAKAKAGBAG-O HAN KINABUHI

Nagkaada Gihapon Kami Maopay nga Relasyon ni Tatay

Nagkaada Gihapon Kami Maopay nga Relasyon ni Tatay
  • NATAWHAN NGA TUIG: 1954

  • NATAWHAN NGA NASUD: Pilipinas

  • PAGKINABUHI HADTO: Linayas tikang ha abusado nga tatay

AN AKON NAGLABAY

Damu nga turista an nabisita ha kilala nga waterfalls, o busay, nga hirani ha bungto han Pagsanjan ha Pilipinas. Didto nagdaku ha kapobrehan an akon tatay nga hi Nardo Leron. Tungod han iya nakikita nga korapsyon ha gobyerno, mga pulis, ngan ha iya gintatrabahoan, nagin masisinahon hiya.

Nangalimbasog an akon mga kag-anak nga padakuon kami nga walo nga anak. Tag-iha hira nga waray ha balay kay ginpapanginano nira an mga tanom ha bukid. Agsob nga kami la ni Kuya Rodelio an nag-aataman ha amon kalugaringon, ngan kasagaran gutom kami. Han mga bata pa kami, talagsa la kami makag-uyag. Pag-iedad hin pito, kami nga magburugto kinahanglan na magtrabaho ha usa nga plantasyon, nagpapas-an kami hin mabug-at nga mga lubi ha sagkahon nga dalan. Kon an amon dara mabug-at hinduro, gindadanas na la namon ito.

Naaantos namon an pangastigo ha amon ni Tatay, pero mas masakit ha amon nga makita nga ginkakastigo niya hi Nanay. Nangangalimbasog kami nga pugngan hiya, pero waray kami nahihimo. Nagsabot kami ni Kuya Rodelio nga pagdaku namon papatayon namon hi Tatay. Ginhingyap ko gud nga magkaada tatay nga nahigugma ha amon!

Tungod han kasina ha pagin madarahog ni Tatay, linayas ako han 14 anyos ako. Ha kalye ako nag-ukoy ha sulod hin pipira ka panahon, ngan nagtikang ako gumamit hin marijuana. Ha urhi, nagin bangkero ako, gindudul-ong ko an mga turista ngadto ha busay.

Paglabay hin pipira ka tuig, umiskwela ako ha usa nga unibersidad ha Manila. Pero tungod kay nauli ako ha Pagsanjan kada weekend basi magtrabaho, gutiay na la an akon panahon ha pag-aram. Makuri an akon kinabuhi ngan waray katuyoan, ngan diri na naiibanan han marijuana an akon mga kabaraka. Nagtikang ako gumamit hin shabu, cocaine, ngan heroin. Kaupod na ha pagdroga an pagbuhat hin seksuwal nga imoralidad. Napapalibotan ako hin kapobrehan, kawaray-hustisya, ngan pag-antos. Nangalas ako ha gobyerno ngan ginbasol ko ito. Nagpakiana ako ha Dios, “Kay ano nga sugad hini an kinabuhi?” Pero waray ako nabilngan nga baton ha iba-iba nga relihiyon nga akon gin-usisa. Mas dinuroy pa ako paggamit hin droga basi itago an akon pagin desperado.

Han 1972, an mga estudyante ha Pilipinas nag-organisar hin mga protesta kontra ha gobyerno. Inapi ako ha usa hito nga mga protesta, ngan nagin bayolente ito. Damu an gin-aresto, ngan paglabay hin mga bulan, igindeklara an martial law ha bug-os nga nasud.

Nag-ukoy utro ako ha kalye, pero hini nga panahon tungod ha kahadlok ha mga awtoridad kay nakigbahin ako ha pagrebelde. Basi masuportaran an akon bisyo ha droga, nangawat ako ngan ha urhi, nagpabayad ha mga riko ngan mga langyawanon ha pakighilawas ha ira. Waray ako labot kon mamatay ako.

Hito nga mga panahon, hi Nanay ngan an akon manghod nga bugto nagtikang mag-aram ha Biblia upod han mga Saksi ni Jehova. Nasina gud hi Tatay, ngan ginsunog niya an ira mga literatura nga basado ha Biblia. Pero nagpadayon la hira ngan nabawtismohan sugad nga mga Saksi.

Usa ka adlaw, may Saksi nga nakiistorya kan Tatay mahitungod han saad han Biblia nga magkakaada tinuod nga hustisya ha bug-os nga tuna. (Salmos 72:12-14) Naruyagan gud ito ni Tatay salit nagdesisyon hiya nga mag-usisa. Nabasa niya ha Biblia diri la an saad han Dios nga maopay nga gobyerno kondi pati an sugo han Dios para ha mga bana ngan amay. (Efeso 5:28; 6:4) Waray pag-iha, nagin Saksi hi Tatay pati an ngatanan ko nga bugto. Tungod kay hirayo ako, waray ako mahibaro mahitungod hini.

KON PAONAN-O NABAG-O HAN BIBLIA AN AKON KINABUHI

Han 1978, binalhin ako ha Australia. Pero bisan pa hinin mamurayawon ngan mainuswagon nga nasud, waray la gihapon ako kamurayawan ha hunahuna. Padayon ako nga nagin parahubog ngan adik. Ha ikatarapos hito nga tuig, may binisita ha akon nga mga Saksi ni Jehova. Naruyagan ko an ira ginbasa ha akon ha Biblia mahitungod han mamurayawon nga tuna, pero nag-alang ako nga magkaada koneksyon ha ira.

Waray pag-iha, inuli ako ha Pilipinas hin pipira ka semana. Ginsumatan ako han akon mga bugto nga nangangalimbasog na hi Tatay nga magbag-o, pero nasisina la gihapon ako ha iya salit diri ko karuyag nga makita hiya.

Iginsaysay ha akon han akon manghod nga babaye gamit an Biblia kon kay ano nga an kinabuhi duro an pag-antos ngan kawaray-hustisya. Diri ako makatoo nga an akon mga pakiana mababaton han usa nga tin-edyer nga gutiay la an eksperyensya. Antes ako lumakat, gintagan ako ni Tatay han libro nga Mahimo Ka Mabuhi ha Waray Kataposan ha Paraiso ha Tuna. * Nagsiring hiya: “Ayaw na pagpinamiling ha kon diin-diin. Bubuligan ka hini nga libro nga mahiagian an imo ginbibiniling.” Gin-aghat niya ako nga mamiling hin Saksi ni Jehova pagbalik ko ha Australia.

Namati ako han sagdon ni Tatay ngan nakabiling hin Kingdom Hall han mga Saksi ni Jehova hirani ha akon balay ha Brisbane. Nagpa-Bible study ako. Nahibaroan ko ha mga tagna ha Biblia sugad han Daniel kapitulo 7 ngan Isaias kapitulo 9 nga an gobyerno han Dios, nga waray korapsyon, magmamando ha aton ha tidaraon. Nahibaroan ko nga magigin paraiso an tuna ngan mag-uukoy kita dida hito. Karuyag ko nga uyonan ako han Dios, pero nasantop ko nga kinahanglan ko kontrolon an akon emosyon, iundang an akon pagdroga ngan pagin parahubog, ngan bayaan an akon imoral nga pagkinabuhi. Ginbulagan ko an akon kalungon nga babaye ngan ginbayaan an akon mga bisyo. Samtang nagririg-on an akon pagsarig kan Jehova, nag-ampo ako ha iya nga buligan ako nga mahimo an iba pa nga pagbag-o.

Hinay-hinay nga nasantop ko nga an akon nahibabaroan puydi gud makagbag-o ha usa nga tawo. An Biblia nasiring nga kon pangangalimbasogan, maisusul-ot naton an “bag-o nga personalidad.” (Colosas 3:9, 10) Samtang nangangalimbasog ako ha pagbuhat hini, nasantop ko nga bangin tinuod gud man an akon mga nabatian nga nagbag-o na hi Tatay. Imbes nga magpabilin nga nasisina, karuyag ko na makigmurayaw ha iya. Ha urhi, ginpasaylo ko hi Tatay ngan ginwara an kangalas nga akon gintinipigan tikang han bata pa ako.

MGA KAOPAYAN NGA AKON NAPAHIMULSAN

Sugad nga batan-on, agsob nga naiimpluwensyahan ako han maraot nga panggawi han iba. An pahamangno han Biblia nagin tinuod gud ha akon—naghikaraot ako tungod han maraot nga mga kaupod. (1 Corinto 15:33) Pero nagkaada ako matataporan nga kasangkayan nga mga Saksi ni Jehova, ngan ginbuligan nira ako nga magin maopay nga tawo. Ha ira ko liwat nakilala an akon hinigugma nga asawa nga hi Loretta. Magkaupod nga igintututdo namon ha iba kon paonan-o hira mabubuligan han Biblia.

Nangangaon kaupod an akon asawa ngan kasangkayan

Mapasalamaton gud ako ha Biblia kay nakita ko hi Tatay sugad nga mahigugmaon nga bana, mapainubsanon, ngan mamurayawon nga Kristiano​—nga hadto waray ko gud mahunahuna nga magigin sugad hiya. Katapos han akon bawtismo han 1987, nagkita kami ni Tatay ngan ginhangkopan niya ako ha siyahan nga higayon!

Ha sulod hin sobra 35 ka tuig, magkaupod nga iginsangyaw nira Tatay ngan Nanay an paglaom nga igintututdo han Biblia. Nagin maduruto hi Tatay, mahigugmaon, ngan nagin kilala nga mabinuligon. Durante hito nga mga tuig, nahibaro ako nga respetuhon ngan higugmaon hiya. Proud gud ako nga nagin anak ako niya! Namatay hiya han 2016, pero nalilipay ako kon nahuhunahuna hiya kay pariho kami naghimo hin dagku nga pagbag-o ha amon personalidad han igin-aplikar namon an mga katutdoan han Biblia. Waray na nabilin nga bisan gutiay nga kasina nga akon gin-abat hadto. Mapasalamaton gud ako nga nakilala ko an akon langitnon nga Amay, hi Jehova nga Dios, nga nagsasaad nga wawad-on an ngatanan nga hinungdan han mga problema ha pamilya.

^ par. 20 Iginpublikar han mga Saksi ni Jehova, kondi diri na gin-iimprinta yana.