Aga-aga pa han Pebrero 24, 2022, gin-atake han mga militar han Russia an Ukraine, bisan pa han pangalimbasog han mga lider ha kalibotan nga malikyan an girra. Ano an posible nga epekto ha kalibotan hini nga pag-atake? Pipira ka adlaw pa la an naglabay, an secretary-general han United Nations nga hi António Guterres, nagsiring: “Diri naton mahuhunahuna an pag-antos ngan kadaot nga resulta hini nga pag-atake ngan kon ano an magigin epekto hito ha seguridad han mga nasud ha Europa ngan ha bug-os nga kalibotan.”

•   Hi Jesu-Kristo nagtagna nga maabot an panahon nga “an usa nga nasud makikig-away ha lain nga nasud ngan an usa nga ginhadian makikig-away ha lain nga ginhadian.” (Mateo 24:7) Basaha an artikulo nga “Ano an Tigaman han ‘Kataposan nga mga Adlaw,’ o ‘Panahon han Kataposan’?” basi mahibaroan kon paonan-o iginpapakita han Biblia nga an mga girra yana katumanan han tagna ni Jesus.

•   Ha libro han Biblia nga Pahayag, an mga girra ginsisimbolohan han usa nga mangangabayo nga nasakay ha “usa nga kabayo nga pula an kolor” ngan ‘nagkukuha han kamurayawan ha tuna.’ (Pahayag 6:4) Basaha an artikulo nga “An Upat nga Mangangabayo—Hin-o Hira?” basi mahibaroan kon paonan-o ini nga tagna natutuman ha mga girra yana.

•   An libro han Daniel nagtagna parte ha away butnga han “hadi han norte” ngan “hadi han sur.” (Daniel 11:25-45) Kitaa an video nga Natuman nga Tagna—Daniel Kapitulo 11 basi mahibaroan kon kay ano nga makakasiring nga an Russia ngan an mga kaalyado hito amo an hadi han norte. a

•   Iginhuhulagway liwat han Pahayag an “daku nga adlaw han Dios nga Makagarahum-ha-ngatanan.” (Pahayag 16:14, 16) Pero diri ini girra han mga nasud sugad han aton nakikita yana. Para ha dugang nga impormasyon parte hito nga panhitabo ha tiarabot, basaha an artikulo nga “Ano an Girra han Armagedon?”

•   An Biblia nasiring nga ‘papaundangon han Dios an mga girra ha bug-os nga tuna.’ (Salmo 46:9) Basaha an artikulo nga “Makakaasa Ka sa Isang Magandang Kinabukasan” basi mahibaro hin dugang parte ha mga saad han Dios ha tiarabot.

•   Gintutdoan ni Jesus an iya mga sumurunod nga ig-ampo nga kumanhi an Ginhadian han Dios. (Mateo 6:9, 10) Ito nga Ginhadian amo an gobyerno ha langit nga magtutuman han kaburut-on han Dios dinhi ha tuna, ngan kaburut-on niya nga magkaada kamurayawan ha bug-os nga kalibotan. Basi mahibaro kon ano nga mga bendisyon an imo makakarawat pinaagi hito nga Ginhadian, kitaa an video nga Ano an Ginhadian han Dios?

 Sobra 129,000 an mga Saksi ni Jehova ha Ukraine. Pariho ha mga Saksi ha iba nga nasud, ginsusubad nira hi Jesus pinaagi ha pagpabilin nga neutral ha politika ngan diri pakigbahin ha girra. (Juan 18:36) Ha bug-os nga kalibotan, padayon nga iginsasamwak han mga Saksi ni Jehova an “maopay nga sumat han Ginhadian” sugad nga an amo la nga solusyon ha mga problema han tawo, upod na an girra. (Mateo 24:14) Gin-aaghat ka namon nga kontakon kami basi mahibaro hin dugang parte ha mensahe han paglaom nga aada ha Biblia.