An Biblia Nakakagbag-o han Kinabuhi

PAONAN-O nakabiling hin katuyoan ha kinabuhi an batan-on nga babaye nga may miserable nga pagkabatan-on? Paonan-o nagin mamurayawon nga ebanghelisador an usa nga rebelde ha gobyerno? Alayon basaha an istorya han ira kinabuhi basi hibaroan an baton.

‘Naghandom Ako nga Higugmaon.’—INNA LEZHNINA

NATAWO: 1981

NATAWHAN NGA NASUD: RUSSIA

PAGKINABUHI HADTO: MISERABLE NGA PAGKABATAN-ON

NAGLABAY: Natawo ako nga bungol ngan bungol gihap an akon mga kag-anak. Malipayon an siyahan nga unom ka tuig han akon kinabuhi. Kondi nagdiborsyo an akon kag-anak. Bisan kon bata pa, maaram ako kon ano an diborsyo ngan nasakitan gud ako hito. Katapos, hi Tatay ngan an akon magurang nag-ukoy ha Troitsk, samtang kami ni Nanay binalhin ha Chelyabinsk. Paglabay han panahon, nag-asawa utro hi Nanay. Parahubog an akon pinakaamay, ngan agsob niya kami kastiguhon ni Nanay.

Han 1993, nalumos an akon hinigugma nga magurang. Natigdaan gud an amon pamilya. Nagtikang pag-ininom hi Nanay, ngan pariho han akon pinakaamay, ginmaltrato na gihap niya ako. Nagtikang ako pamiling hin maopay nga kinabuhi ngan naghandom nga higugmaon. Nagsari ako pagtambong ha iba-iba nga singbahan ha pagpamiling hin pagliaw, kondi napakyas ako.

KON PAONAN-O NABAG-O HAN BIBLIA AN AKON KINABUHI: Han 13 anyos ako, gin-iistoryahan ako han akon kaklase nga Saksi ni Jehova mahitungod han mga istorya ha Biblia. Naruruyag gud ako pagpinamati mahitungod kanda Noe ngan Job nga nag-alagad ha Dios bisan pa han kakurian. Waray pag-iha nag-aram ako han Biblia kaupod han mga Saksi ngan nagtambong ha ira mga katirok.

An pag-aram ha Biblia nakabulig ha akon nga hibaroan an damu nga kamatuoran. Nalipay ako paghibaro nga may ngaran an Dios. (Salmo 83:18) Nagkainteres ako nga an Biblia husto nga nagtagna han mga kahimtang ha “kataposan nga mga adlaw.” (2 Timoteo 3:1-5) Ngan nalipay ako paghibaro mahitungod han pagkabanhaw. Hunahunaa la—makikita ko utro an akon bugto!—Juan 5:28, 29.

 Pero ako la ngay-an an nalipay. An akon nanay ngan pinakaamay nakontra ha mga Saksi. Ginpirit nira ako nga umundang ha pag-aram han Biblia. Kondi naruyagan ko an akon hinbaroan ngan determinado ako magpadayon.

Diri masayon atubangon an paglutos han akon pamilya. Usa pa nga trahedya an nahitabo han malumos an akon manghod nga naupod ha akon ha katirok. Ha gihapon waray ako pabay-i han mga Saksi. Ha ira, inabat ko an gugma nga akon ginhiningyap tikang ha kabata. Hinbaroan ko nga ini an tinuod nga relihiyon. Han 1996, nabawtismohan ako sugad nga Saksi ni Jehova.

MGA KAOPAYAN NGA AKON NAPAHIMULSAN: Nakaasawa ako kan Dmitry, usa nga buotan nga lalaki, ngan unom ka tuig na kami nga magkaupod. Nagbuboluntaryo kami ha sanga nga opisina han mga Saksi ni Jehova ha St. Petersburg. Paglabay han panahon, waray na ako lutosa han akon mga kag-anak.

Mapasalamaton gud ako nga nakilala ko hi Jehova! An pag-alagad ha iya naghatag hin katuyoan ha akon kinabuhi.

“Damu nga Pakiana an Nakakagupong ha Akon.”—RAUDEL RODRÍGUEZ RODRÍGUEZ

NATAWO: 1959

NATAWHAN NGA NASUD: CUBA

PAGKINABUHI HADTO: REBELDE HA GOBYERNO

NAGLABAY: Natawo ako ha Havana, Cuba, ngan nagdaku ha pobre nga lugar diin ordinaryo an rambol ha kakalsadahan. Samtang nagtutubo, nagkainteres ako ha judo ngan ha iba nga combat sport.

Maopay ako nga estudyante, salit gin-aghat ako han akon mga kag-anak nga umiskwela ha unibersidad. Samtang naeskwela, inabat ko nga kinahanglan bag-uhon an pan-gobyernohan han amon nasud salit nagrebelde ako. Kaupod  hin kaklase, ginkastigo namon an usa nga pulis basi agawon an iya pusil. Tungod hito napuruhan an ulo han pulis. Salit napriso kami ngan nasentensyahan hin kamatayon pinaagi hin firing squad. Bainte anyos pa la ako, kondi paratayon na ako!

Ha akon pag-inusahan, ginpraktis ko an akon hihimoon durante han firing squad. Diri ko karuyag magpakita hin kahadlok. Pero damu nga pakiana an nakakagupong ha akon, sugad han: ‘Kay ano nga damu an kawaray-hustisya ha kalibotan? Sugad na la ba hini an kinabuhi?’

KON PAONAN-O NABAG-O HAN BIBLIA AN AKON KINABUHI: An amon sentensya ginhimo na la nga 30 ka tuig nga kaprisohan. Hito nga takna, nakilala ko an mga Saksi nga napriso tungod han ira relihiyoso nga gintotoohan. Naimpres ako han ira kaisog kondi mamurayawon nga panggawi. Bisan kon diri hira angay mapriso, waray hira masina o magdumot.

Gintutdoan nira ako nga an Dios may katuyoan para ha katawohan. Iginpakita nira tikang ha Biblia nga hihimoon han Dios an tuna nga paraiso diin waray na krimen ngan kawaray-hustisya. Gintutdoan liwat nira ako nga an tuna mapupuno hin mag-opay nga tawo nga mabubuhi ha waray kataposan ha hingpit nga kahimtang.—Salmo 37:29.

Naruyagan ko an akon hinbaroan pero baga hin makuri an pagsubad han ira panggawi. Para ha akon, imposible nga magin neutral ha politika o diri bumulos. Salit nagdesisyon ako maglugaring pagbasa han Biblia. Han natapos ako, nahunahuna ko nga hira la an pariho ha una nga mga Kristiano.

Tungod ha pag-aram han Biblia, hinbaroan ko nga kinahanglan ko maghimo hin dagku nga pagbag-o. Pananglitan, angay ko bag-uhon an akon panyakan kay mabuyayawon ako. Kinahanglan ko liwat umundang ha pagsigarilyo, ngan magin neutral ha politika. Diri ito masayon, kondi ha bulig ni Jehova, hinay-hinay nga nahimo ko ito.

An usa han pinakamakuri ko bag-uhon amo an pagkontrol han akon kasina. Bisan yana nag-aampo la gihap ako mahitungod hini. Nabuligan gud ako han mga teksto ha Biblia sugad han Proberbios 16:32: “Hiya nga mahinay ha pagkasina maoroopay kay han kusgan; ngan hiya nga nakakagarong han iya espiritu, maoroopay kay ha iya nga nakakakuha han bungto.”

Han 1991, nabawtismohan ako sugad nga Saksi ni Jehova ha prisohan—ha usa nga baril nga puno hin tubig. Han sunod nga tuig, an pipira ha amon nga priso ginpagawas ngan ginpadara ha Espanya kay may mga paryente kami didto. Pag-abot didto, tinambong dayon ako ha katirok han mga Saksi. Ira ako gin-abiabi sugad hin maiha na nira ako nga kilala, ngan ginbuligan nira ako ha pagtikang hin bag-o nga kinabuhi.

MGA KAOPAYAN NGA AKON NAPAHIMULSAN: Yana malipayon ako nga nag-aalagad ha Dios upod han akon asawa ngan mga anak. Ginagamit ko an kadak-an han akon panahon ha pagbulig ha iba nga mahibaro han Biblia, ngan pribilehiyo gud ito. Usahay nahihinumdoman ko nga han batan-on pa ako hirani na ako patayon, kondi tikang hito nga panahon damu nga bendisyon an akon nakarawat ngan nagpapasalamat ako hito. Gawas la nga buhi ako, may paglaom ako. Ginhahandom ko gud an iginsaad nga Paraiso—diin magkakaada hustisya ngan “mawawaray na kamatayon.”—Pahayag 21:3, 4.

[Blurb ha pahina 19]

“Nalipay ako ha paghibaro nga may ngaran an Dios”

[Retrato ha pahina 20]

Kami ngan an akon bana nalilipay pagsangyaw ha mga bungol