Magin Duok ha Dios
Ano an Gin-aaro ni Jehova ha Aton?
DIRI pirme masayon an pagdesisyon kon kita masugot o diri masugot. Pananglitan, kon an usa mapintas o damu an gin-oobligar, an iya mga sakop mahimo sumugot tungod kay napipiritan la. Kondi, hi Jehova nga Dios kinaburut-on nga ginsusugot han iya mga magsiringba. Kay ano? Basi mabaton ito, aton usisahon an ginsiring ni Moises ha Deuteronomio 10:12, 13. a
Han ginsumaryo ni Moises an mga sugo han Dios, nagbangon hiya hin makapainteres nga pakiana: “Ano . . . an pinangangaro ni Jehova nga imo Dios ha imo?” (Bersikulo 12) An Dios may katungod ha pag-obligar hin bisan ano nga iya karuyag. Aw, hiya an Soberano nga Ginoo ngan an Burabod ngan an Paratagana han kinabuhi. (Salmo 36:9; Isaias 33:22) Kondi, diri niya karuyag nga mapiritan la kita pagsugot ha iya. Ano an iya gin-aaro ha aton? An kinasingkasing nga pagsugot.—Roma 6:17.
Ano an mag-aaghat ha aton nga kinaburut-on nga sugton an Dios? Gin-unabi ni Moises an usa han hiya nagsiring: “Kahadlok kan Jehova nga imo Dios.” b (Bersikulo 12) Diri ini sayop nga kahadlok ha maraot nga resulta han pagtalapas, lugod, ini an husto nga pagtahod ha Dios ngan ha iya mga sugo. Kon hilarom an aton pagtahod ha iya, lilikyan naton nga mapasubo hiya.
Kondi, ano an sadang magin nangunguna nga motibo ha pagsugot ha Dios? Hi Moises nagsiring: “Paghigugma ha iya [Jehova], ngan pag-alagad kan Jehova nga imo Dios ha bug-os mo nga kasingkasing, ngan ha bug-os mo nga kalag.” (Bersikulo 12) An gugma ha Dios nag-uupod diri la han pag-abat nga hinigugma naton hiya. Usa nga reperensya an nagsiring: “An Hebreo nga mga berbo para ha pagbati usahay nangangahulogan liwat ha mga buhat nga resulta hito.” Karuyag sidngon, kon hinigugma gud naton an Dios, bubuhaton naton an aton hinbabaroan nga makakalipay ha iya.—Proberbios 27:11.
Tubtob diin naton sadang sugton an Dios? Hi Moises nagsiring: “Paglakat ha ngatanan niya [Dios] nga dalan.” (Bersikulo 12)Karuyag ni Jehova nga buhaton naton an ngatanan nga iya ginpapabuhat. Posible ba nga an sugad nga pagsugot magpugong han aton kaopayan? Diri gud.
An kinaburut-on nga pagsugot magriresulta ha mga bendisyon. Hi Moises nagsurat: “Pagbantay ha mga sugo . . . nga akon iginsusugo ha imo hini nga adlaw para ha imo kaopayan.” (Bersikulo 13)Oo, an ngatanan nga sugo ni Jehova—an ngatanan nga iya gin-aaro—para ha makakaopay ha aton. Posible ba magsugo hiya hin makakadaot ha aton? Diri, tungod kay “an Dios amo an gugma,” siring han Biblia. (1 Juan 4:8) Salit, an iya mga sugo para gud la ha aton waray kataposan nga kaopayan. (Isaias 48:17) Kon bubuhaton naton an ngatanan nga iya sugo, malilikyan naton an damu nga kapakyasan yana ngan magriresulta ito ha waray kataposan nga mga bendisyon ha tidaraon ilarom ha pagmando han iya Ginhadian. c
Salit, may kalabotan ha pagsugot o diri pagsugot ha ginpapabuhat ni Jehova, usa la an maaramon nga desisyon—an bug-os ngan kinaburut-on nga pagsugot. An sugad nga matinumanon nga pagkinabuhi mabulig ha aton nga magin mas duok kan Jehova, an mahigugmaon nga Dios nga pirme naghuhunahuna han aton kaopayan.
[Mga footnote]
a Bisan kon an ginsiring ni Moises para ha kadaan nga Israel, an prinsipyo hito naaplikar ha ngatanan yana nga naruruyag mapalipay an Dios.—Roma 15:4.
b Ha iba-iba nga bahin han Deuteronomio, ginpabug-atan ni Moises nga an kahadlok ha Dios amo an prinsipyo nga sadang maggiya ha Iya mga surugoon.—Deuteronomio 4:10; 6:13, 24; 8:6; 13:4; 31:12, 13.
c Para ha dugang nga impormasyon, kitaa an “Ano an Katuyoan han Dios Para ha Tuna?,” kapitulo 3 ha libro nga Ano Gud ba an Igintututdo han Biblia?, iginpublikar han mga Saksi ni Jehova.
