Pakadto ha sulod

Pakadto ha mga sulod

TIKANG HA ATON DAAN NGA MGA KOLEKSYON

Nakita Niya nga Gugma an Nagpapadalagan han Kapiterya

Nakita Niya nga Gugma an Nagpapadalagan han Kapiterya

MAKALILIPAY gud an urosa nga pangaon ha lamesa ni Jehova. Kon an katawohan han Dios nagkakatirok ha usa nga espirituwal nga piyesta, an pagsararo hin materyal nga pagkaon nakakadugang han ira kalipay.

Han Septyembre 1919, an mga Estudyante han Biblia nagkaada walo ka adlaw nga kombensyon ha Cedar Point, Ohio, E.U.A. An mga hotel unta an magtatagana hin akomodasyon ngan pagkaon ha mga delegado, pero yinukot pa an inabot ngan damu gud ito kay han ginlalaoman. Tungod hito, an mga paraserbi natarantar ngan durungan nga binaya ha trabaho. An nababaraka nga manidyer han kapiterya nagpakiana kon may batan-on nga mga delegado nga makakabulig, ngan damu an nagboluntaryo. Usa hito hi Sadie Green. Hiya nagsiring: “Siyahan ko adto nga eksperyensya ha pag-waitress, pero nalipay gud kami hadto.”

Sierra Leone, 1982

Ha sumunod nga mga tuig, an pagkaada kapiterya ha kombensyon naghatag hin higayon ha damu nga malipayon nga boluntaryo nga makagserbi ha kabugtoan. An pagtrabaho kaupod han kabugtoan nakabulig liwat ha damu nga batan-on nga magkaada espirituwal nga mga tumong. Hi Gladys Bolton nagboluntaryo ha kapiterya ha usa nga kombensyon han 1937. Hiya nagsiring: “May mga nakilala ako nga taga-iba nga lugar, ngan hinbaroan ko kon paonan-o nira nalamposan an ira mga problema. Hito nga higayon ko ginhingyap nga magin payunir.”

Hi Beulah Covey nga tinambong ha usa nga kombensyon, nagsiring: “Tungod han dedikasyon han mga boluntaryo, nagin mahapsay an trabaho.” Pero diri masayon an buruhaton. Pag-abot ni Angelo Manera ha Dodger Stadium ha Los Angeles, California, han 1969, didto la niya hinbaroan nga igintoka ngay-an hiya ha pagdumara han kapiterya. Hiya nagsiring: “Ginkalasan gud ako hadto!” Kaapi han pagpangandam para hito nga kombensyon an paghimo hin kali nga 400 ka metro an kahilaba para han linya hin gas ngadto ha kusina!

Frankfurt, Alemanya, 1951

Ha Sierra Leone han 1982, ginhawanan anay han magduruto nga boluntaryo an lokasyon ngan gintukod an kapiterya gamit an mga materyales nga may-ada hira. Ha Frankfurt, Alemanya, han 1951, an madiskarte nga mga brother nagplete hin tren (locomotive) nga nagtagana hin steam para ha 40 nga kaldero. An mga paraserbi nanhatag hin 30,000 nga pagkaon ha usa ka oras. Basi mapagaan an trabaho han 576 nga parahugas, an mga tinambong nagdara hin kalugaringon nga kutsilyo ngan tinidor. Ha Yangon, Myanmar, gutiay la nga harang, kay ha nahiaraan, an ginsalakot han mahunahunaon nga mga paraluto ha pagkaon nga para ha mga delegado tikang ha iba nga nasud.

“NANUNUKDAW LA HIRA PANGAON”

Ha usa nga kombensyon ha Estados Unidos han 1950, an paghinulat ha hilaba nga pila ha kapiterya bisan kon masirak nagin bendisyon kan Annie Poggensee. Hiya nagsiring: “Nalipay gud ako ha pakiistorya ha duha nga sister nga nagbiyahe tikang ha Europa sakay hin barko.” An tagsa ha ira nag-istorya kon paonan-o hira ginbuligan ni Jehova nga makatambong. Hi Annie nagsiring: “Ha ngatanan nga nakadto, iton duha nga sister an pinakamalipayon. An maiha nga paghinulat ha pila ngan an sirak, balewaray gud ha ira.”

Seoul, Korea, 1963

Ha damu nga dagku nga kombensyon, an dagku nga tolda han kapiterya may mga nakarumbay nga higtaas nga lamesa diin an mga nakaon natukdaw la. Nag-aghat ini ha ira nga magdagmit basi makakaon liwat an iba. Hini nga paagi, napakaon an yinukot durante han udto. Usa nga diri Saksi an nagsiring: “Naiiba gud ito nga relihiyon. Nanunukdaw la hira pangaon.”

May mga opisyal han militar ngan han gobyerno nga binilib ha pagin epektibo ngan pagin organisado han kabugtoan. Katapos inspeksyunon an aton kapiterya ha Yankee Stadium ha New York City, gin-aghat han usa nga sundalo han United States Army hi Major Faulkner han British War Department nga mag-inspeksyon liwat. Salit, hiya ngan an iya asawa tinambong ha “Triumphant Kingdom” Assembly ha Twickenham, Inglatera han 1955. Hiya nagsiring nga nakita niya nga gugma an nagpapadalagan han kapiterya didto.

Ha damu ka dekada, an mga boluntaryo mahigugmaon nga nagserbi hin masustansya ngan barato nga mga pagkaon para ha mga delegado. Pero tungod kay daku ini nga buruhaton, damu nga boluntaryo an nagtatrabaho hin damu ka oras ngan diri pa ngani nakakapamati han pipira o han ngatanan nga bahin han programa. Ha ikatarapos han dekada han 1970, ginpasimple an kahikayan ha pagtagana hin pagkaon ha mga kombensyon ha damu nga lugar. Ngan tikang han 1995, an natambong ha mga kombensyon ginhangyo nga magbalon. Nakabulig ini ha mga boluntaryo hadto ha kapiterya nga makapahimulos ha espirituwal nga programa ngan pakigturotarampo ha kabugtoan. *

Sigurado nga ginpabilhan ni Jehova adton maduruto nga nagserbi ha ira kabugtoan! Bangin ginhahandom han pipira adton makalilipay nga mga panahon ha pagboluntaryo ha kapiterya. Pero ini an sigurado: Gugma pa gihapon an nagios durante han aton mga kombensyon.Juan 13:34, 35.

^ par. 12 Syempre, damu pa gihapon an higayon han mga boluntaryo nga bumulig ha iba pa nga departamento han kombensyon.