Namatay Hiya Tungod ha Prinsipyo

NAHINUNUMDUMAN naton hi August Dickmann (natawo han 1910), usa han mga Saksi ni Jehova.” Iton an tinikangan han nahisurat ha plake (iginpakita dinhi) nga bag-o la nga nadiskobrehan ha daan nga kampo nga prisohan han Sachsenhausen. Kay ano nga takos han sugad nga plake an usa han mga Saksi ni Jehova? An sumpay nga sinurat nagsusumat han istorya: “Ginpusil [hiya] ha publiko han SS han Septyembre 15, 1939, tungod ha pagdumiri uyon han iya konsensya.”

Hi August Dickmann ginpriso ha kampo nga prisohan ha Sachsenhausen han 1937. Tulo ka adlaw katapos han pagbuto han Girra ha Kalibotan II han 1939, ginsugo hiya nga pirmahan an iya papeles para ha pag-alagad ha militar. Han nagdumiri hiya, ginkaistorya han kumander han kampo hi Heinrich Himmler, nga punoan han SS (Schutzstaffel, pinili nga guwardya ni Hitler), ngan nangaro hin permiso nga patayon hi Dickmann ha presensya han ngatanan iba nga mga priso ha kampo. Han Septyembre 17, 1939, an The New York Times nagreport tikang ha Alemanya: “Hi August Dickmann, 29 anyos, . . . ginpusil dinhi pinaagi han firing squad.” An pahayagan nagsiring nga hiya an siyahan nga Aleman nga nagdumiri hiton nga girra.

Paglabay hin saisenta ka tuig, han Septyembre 18, 1999, ginhinumdom an kamatayon ni Dickmann han Brandenburg Memorial Foundation, ngan an plake nagpapahinumdom yana ha mga bisita han iya kaisog ngan marig-on nga pagtoo. An ikaduha nga plake ha gawas nga pader han daan nga kampo nagpapahinumdom ha mga bisita nga hi Dickmann usa la han 900 nga mga Saksi ni Jehova nga nag-antos ha Sachsenhausen tungod han ira mga tinotoohan. Damu pa an nag-antos ha iba nga mga kampo. Oo, bisan ilarom han makuri nga mga kahimtang ha mga kampo nga prisohan, damu an nagpabilin nga matinumanon ha diosnon nga mga prinsipyo.

Para ha mga Saksi ni Jehova, Kristiano nga obligasyon an ‘magpasakop ha hitaas [gobyerno] nga mga awtoridad.’ (Roma 13:1) Kondi, kon an mga gobyerno nangangalimbasog ha pagpirit ha ira ha pagtalapas han mga balaud han Dios, ginsusunod nira an susbaranan han mga apostol ni Kristo, nga nagsiring: “Kinahanglan namon nga sugton an Dios san-o an mga tawo.” (Buhat 5:29) Sugad nga resulta, ha kalibotan diin nag-aaraway an mga tribo ngan an kapungot ha rasa nagtugway ha makalilisang nga mga araway, an mga Saksi ni Jehova ha bisan diin, pariho kan August Dickmann, nag-aaghat han kamurayawan. Ginsusunod nira an pagsagda han Biblia: ‘Ayaw padaog han maraot; kondi daoga an maraot pinaagi han maopay.’​—Roma 12:21.