Usa ka Espesyal nga Okasyon​—Makadto Ka Ba?

HA USA ka makatirigamnan nga adlaw sobra 3,500 ka tuig na an naglabay, ginsugo ni Jehova nga Dios an tagsa nga panimalay han nauripon nga mga Israelita ha Ehipto nga magpatay hin nati nga karnero o kanding ngan iwisik an dugo hito ha bawbaw ngan ha mga poste han mga purtahan han ira mga balay. Hito mismo nga gab-i, an anghel han Dios linabay ha mga balay nga gintigamnan kondi ginpatay an suhag nga mga anak nga lalaki ha mga balay han ngatanan nga Ehiptohanon. Hito nga panahon nakagawas an mga Israelita. Ha anibersaryo hito nga hitabo, ginsasaurog han mga Judio an Paskua.

Katapos gud igsaurog ni Jesu-Kristo an iya kataposan nga Paskua upod an iya mga apostol, gintikangan niya an usa ka panihapon nga magpapahinumdom han iya halad nga kamatayon. Iginhatag niya ha iya mga apostol an waray-ipaturubo nga tinapay ngan nagsiring: “Kuha kamo; kaon kamo; ini an akon lawas.” Ngan iginhatag niya ha ira an kopa han alaksiw ngan nagsiring: “Inuma niyo ngatanan ito; Kay ini an akon dugo han Bag-o nga Testamento nga igtatakbo tungod han kadam-an ha pagpasaylo han mga sala.” Hi Jesus nagsiring liwat: ‘Padayon nga buhata niyo ini nga hinumduman ha akon.’ (Mateo 26:​26-28; Lukas 22:​19, 20) Salit ginsugo ni Jesus an iya mga sumurunod nga buhaton ini nga pagsaurog han iya kamatayon.

Hini nga tuig an anibersaryo han kamatayon ni Jesus pagbubuhaton ha Mierkoles, Abril 19, katunod han adlaw. An mga Saksi ni Jehova ha bug-os nga kalibotan magkakatirok hinin espesyal nga gab-i ha pagsaurog hini nga Memoryal ha paagi nga ginhangyo ni Jesus. Malipayon nga gindadapit kamo nga umupod ha amon sugad nga mga paraobserbar. Alayon panginsayod ha mga Saksi ni Jehova ha iyo lugar para ha eksakto nga oras ngan lugar han katirok.