Pamiling han Masasarigan nga mga Tagna

Courtesy of National Weather Service

“HIYA nga nahibabaro patiuna han mga hitabu tulo kaadlaw antes pa mahitabu ito magigin bahandianon ha yinukot ka mga tuig.” Ito an siring han usa nga proberbio han Intsik.

Karuyag gud han mga tawo nga mahibaro kon ano an mahitatabu ha tidaraon, ngan damu an malipayon nga magbabayad hin daku ha masasarigan nga impormasyon sugad hito nga klase. Namimiling hira hin masasarigan nga mga tagna. Sugad han nakikita tikang ha mga tagna han templa han mga panahon ngan mga kahimtang han ekonomiya, interesado kita ha mga hitabu nga aada ha unhan. Dugang pa, an masasarigan nga kahibaro han tidaraon makakahimo ha aton nga magplano ngan maghikay han aton mga kinabuhi.

An hingyap nga hibaro kon ano an mahitatabu ha tidaron nagpapagios ha damu nga komunsulta ha mga paratigo, relihiyoso nga mga lider, mga astrologo, ngan mga tambalan. Ha mga tindahan han libro ngan mga burutangan han magasin damu an kadaan ngan bag-o nga mga sinurat hadton nag-aangkon ha pagtagna han tidaraon. Kondi ginruruhaduhaan han damu ini nga klase hin tagna. An Romano nga estadista hi Cato nagsiring: ‘Natitingala ako nga an mga paraliaw diri nagtatawa kon nakikita an lain nga paraliaw.’

Siyempre, mayada, damu nga mga klase han mga tagna. Han 1972 usa ka internasyonal nga grupo han mga makinaadmananon ngan mga negosyante nga kilala sugad nga Club of Rome an nagpublikar hin usa nga pag-aradman nga nagtatagna nga an kalibotan ha diri na mag-iiha mauubosan na han diri-maliliwnan nga mga bahandi. Mawawaray na bulawan han 1981, asugi han 1985, zinc han 1990, petrolyo han 1992, ngan iba pa. Nakikita naton yana nga ini nga mga tagna waray matuman.

Damu nga mga tagna an iginbasar ha relihiyoso nga mga panhunahuna. Ha pag-ilustrar: An obispo ha Saxon nga hi Wulfstan tinmoo nga an pagsulong han mga taga Denmark ha Englatera temprano han ika-11 ka siglo amo an tigaman nga hirani na an kataposan han kalibotan. Han 1525, nanguna hi Tomas Munzer han pagrebelde han Aleman nga mga parauma tungod kay ha usa nga bisyon hinkit-an niya an mga anghel nga nagbabaid han mga garab nga ginhunahuna niya nga magigin daku nga pag-ani. Matin-aw, diri husto ini nga mga tagna.

Sugad han bangin hinbabaroan mo, an Biblia nagsusulud hin mga tagna. Dugang pa, an mga parasurat han Biblia nag-angkon nga inspirado hira han Dios. An Kristiano nga hi apostol Pedro nagsiring: “Waray igintagna han Kasuratan nga ginhuhubad pinaagi  han kalugaringon nga hunahuna. Kay waray pa gud igintagna pinaagi han kaburut-on han tawo, kondi an mga tawo nagyakan tikang ha Dios tungod kay ginmandoan hira han baraan nga espiritu.”—2 Pedro 1:20, 21, NW.

Labaw han iba nga mga butang, igintagna han Biblia an magkalainlain nga mga hitabu nga nagpapakilala han katulinan nga makakaeksperiensia han presensia ni Jesu-Kristo ha gahum han langitnon nga Ginhadian. An waray kapariho nga araway, gutom, mga linog, ngan an kaguba han moral nga kusug han tawo amo an magigin tigaman han iginsasaysay han Biblia nga “an kataposan nga mga adlaw.” (2 Timoteo 3:1-5; Mateo 24:3-14, 34) Sumala han Biblia, an pagkuha han presente nga sistema han mga butang maghahatag han dalan para han kalipayan han katawohan ha bag-o nga kalibotan han waray kataposan nga mga bendisyon.—2 Pedro 3:13; Pahayag 21:1-4.

Ano an imo panhunahuna ha sugad nga mga tagna han Biblia? Pariho han damu iba nga mga tagna, mga banabana la ba ito? Masasarihan naton an pagkamasasarigan han diri pa natutuman nga mga tagna han Biblia pinaagi ha pagsiguro kon masasarigan ba an mga tagna han Biblia han naglabay nga mga hitabu. Ha masunod nga artikulo, aton paghihisgutan an iba hini.