MGA PAKIANA TIKANG HA MGA MAGBARASA
Mga karnero ni Leicester, Meyers
Babanhawon ba an mga tawo kon diri nira kinakarawat an totoo nga Kristianidad yana ngan mamatay antes han tinikangan han daku nga kagol-anan?
Maopay para ha aton ngatanan nga likyan an anoman nga hilig ha pagbuhat sugad nga mga hukom, kinikilala nga ha kataposan, an paghukom ni Jehova pinaagi kan Jesu-Kristo amo an importante. (Juan 5:22; Buhat 10:42; 2 Timoteo 4:1) Kondi an Kasuratan naghahatag hin pipira makabulig nga impormasyon ha pagbaton ha pakiana ha igbaw.
An bug-os kalibotan nga pagwali han maopay nga sumat han Ginhadian han Dios amo an importante nga bahin han ‘tigaman han presensia ni Jesus.’ Ini nga tigaman nakikita tikang pa ha siyahan nga bahin hini nga siglo. An pagwali nga buruhaton nagreresulta ha pagbahinbahin han mga tawo han ngatanan nga mga nasud sugad nga katumanan han ilustrasyon ni Jesus han “mga karnero” ngan han “mga kanding.” Kon matapos na inin pagwali ngan pagbahinbahin nga buruhaton, an “daku nga kagol-anan” magdadara han kataposan han presente maraut nga sistema han mga butang.—Mateo 24:3, 21, 22; 25:31-46.
Hi Jehova, upod an iya Anak, maghuhukom ha bisan hin-o nga nagsasalikway han mensahe han Ginhadian ngan namamatay antes han pagbuto han daku nga kagol-anan nga iginklase sugad nga mga kanding. Siring ni Jesus nga an mga kanding “makadto ha sirot nga waray kataposan.” Salit, makakasiring kita nga adton determinado nga magin mga kanding diri makarawat hin pagkabanhaw. Mayada hira paghukom pariho hadton “mag-aantus han sirot nga waray kataposan nga kabungkagan” ha panahon han daku nga kagol-anan.—2 Tesalonika 1:9.
Kondi kumusta man adton bangin waray pa mahibaro han mensahe han Ginhadian basi makahimo hin maaramon nga pagpili para o kontra han kamatuoran antes hira mamatay durante han “kataposan nga mga adlaw”?—2 Timoteo 3:1.
Damu nga namamatay samtang nagpapadayon an pagwali nga buruhaton antes han daku nga kagol-anan an matin-aw nga makarawat hin pagkabanhaw. Ipinapakita ini han aton mababasa ha Pahayag 6:7, 8 mahitungod han pagsakay han simboliko nga mga nangangabayo. Damu nga mga tawo an nagkakamatay sugad nga mga biktima han mga girra, mga kagutom, ngan makamaratay nga mga peste. Tungod kay an “Hades” an nag-aangkon hini nga mga biktima han “Kamatayon,” babanhawon hira durante han Milenyo nga pagmando ni Kristo, kon ihatag na han Hades an ngatanan nga mga minatay dida hito. (Pahayag 20:13) Damu hadton nabanhaw ha kinabuhi an bangin nakadungug na han mensahe han Ginhadian antes hira namatay.
Mapasalamaton gud kita nga waray ihatag ni Jesus ha mga tawo an pagsiguro kon hin-o an sugad han mga karnero ngan kon hin-o an sugad han mga kanding! An diri-hingpit nga mga tawo diri makakagtimbang hin husto kon mationan-o kadaku han higayon nga kinahanglan hibatian ngan karawaton han usa ka tawo an maopay nga sumat. Mahibabaro ba kita kon ano an kahimtang han iya kasingkasing o kon nahigugma gud hiya han pagkamatadong? Masusukol ba naton kon mationan-o naapektohan han iya pamilya, han iya relihiyoso nga eksperiensia, o iba nga mga impluwensia an iya pagbaton? Matin-aw nga diri. Kondi, makakasiguro kita nga hi Jehova nga Dios ngan hi Jesu-Kristo makakagtimbang han sugad nga mga butang ngan makakadangat ha mga paghukom nga hingpit, husto, ngan matadong.—Deuteronomio 32:4; Isaias 11:1-5.
Salit, waray hinungdan para ha aton nga magbanabana mahitungod han kon hin-o hadton bag-o la nga nagkamatay an mahimo banhawon o diri. Usa ka butang ini nga waray kita hatagi hin katungod nga buhaton ito. (Itanding an Lukas 12:13, 14.) Labaw nga maaramon para ha aton an paghulat ha mga desisyon han matadong nga mga Hukom, hi Jehova nga Dios ngan hi Jesu-Kristo. Maghahatag ini ha aton hin labaw nga kamurayaw han hunahuna sugad nga mga surogoon ni Jehova. Mabulig liwat ito ha aton ha paghatag hin maoroopay nga atension ha igintoka ha aton nga pagbuhaton—‘lakat kamo ngan manhimo kamo hin mga disipulo han mga tawo han ngatanan nga mga nasud, tutdoan hira ha pagbuhat han ngatanan nga mga butang nga iginsugo ni Jesus.’—Mateo 28:19, 20, NW.