KINABURUT-ON NGA BANTAYI AN PANON HAN DIOS
“Bantayi an panon han Dios nga aada ha iyo, diri nga pinirit, kondi kinaburut-on.”—1 PEDRO 5:2, NW.
HI Jehova kinaburut-on nga nagbabantay han iya katawohan. (Salmo 23:1-4) “An maopay nga magbarantay,” hi Jesu-Kristo, kinaburut-on nga iginhatag an iya hingpit tawhanon nga kinabuhi para han karnerohon nga mga tawo. (Juan 10:11-15) Salit, ginsagda ni apostol Pedro an Kristiano nga mga tigurang nga ‘kinaburut-on nga bantayan an panon han Dios.’—1 Pedro 5:2, NW.
2 An pagin kinaburut-on amo an tigaman han mga surogoon han Dios. (Salmo 110:3) Kondi labaw pa han pagin kinaburut-on han Kristiano nga tawo an ginkikinahanglan para ha pagpili ha usa nga paramangno, o kabulig nga magbarantay. Hin-o an kalipikado nga magin sugad nga mga magbarantay? Ano an nahiuupod han ira pagbantay? Paonan-o ito gimaopayi nga mahihimo?
Nangunguna ha Panimalay
3 Antes an tawo pilion ha “katungdanan han paramangno,” kinahanglan maabut niya an Kasuratanhon nga mga kinahanglanon. (1 Timoteo 3:1-7; Tito 1:5-9) Ha usa nga butang, hi apostol Pablo nagsiring nga an paramangno sadang magin “usa ka tawo nga nangunguna hin maopay ha iya kalugaringon nga panimalay, iton iya mga anak nagpapasakop ha bug-os nga kaligdong.” May maopay nga hinungdan para hini, kay hi Pablo nagsiring: “Kon an tawo diri maaram ha panguna ha iya kalugaringon nga panimalay, oonan-on niya an pagmangno ha kongregasyon han Dios?” (1 Timoteo 3:4, 5, NW) Han pinipili an katigurangan ha mga kongregasyon ha isla han Kreta, ginsumatan hi Tito nga mamiling hin “tawo nga waray ikasumbong, bana han usa nga babaye, nga may mga anak nga magtinoohon nga waray igsumbong ha kasamok o diri maglarisnon.” (Tito 1:6, NW) Oo, an paagi han pagmangno han Kristiano ha iya pamilya kinahanglan tagdon ha pagsiguro kon hiya ba kalipikado ha pagpas-an han maburubug-at nga responsibilidad ha pagbantay han kongregasyon.
4 An kalalakin-an nga nangunguna hin maopay ha ira mga panimalay nagbubuhat labaw pa han pag-ampo ngan pag-aram ha Biblia upod han iya mga pamilya ha regular nga paagi. Andam hira pirme ha pagbulig ha ira mga hinigugma. Para hadton nagigin mga ginikanan, nagtitikang ini ha adlaw nga natatawo an bata. An Kristiano nga mga ginikanan maaram nga kon labaw nga ginsusunod nira hin maopay an diosnon nga rutina, labaw nga maangay dayon an ira batan-on ha ira eskedyol han Kristiano nga mga buruhaton ha adlaw-adlaw nga kinabuhi. Kon maopay nga nangunguna an Kristiano nga amay hini nga mga kahimtang makakaapekto ito ha iya mga kalipikasyon sugad nga tigurang.—Efeso 5:15, 16; Filipos 3:16.
5 Ha panguna ha iya panimalay, an matinumanon Kristiano nga amay nasunod han sagdon ni Pablo: “Diri niyo pag-aghaton ha kasina an iyo mga anak, kondi aghata hira ha disiplina ngan paglaygay ni Jehova.” (Efeso 6:4, NW) An regular nga pag-aram ha Biblia upod han pamilya, an asawa ngan mga anak, naghahatag hin maopay nga mga higayon para han mahigugmaon nga instruksion. An mga anak nakarawat kon sugad han “disiplina,” o nagtatadong nga instruksion. An “paglaygay” nga nahitatabu nabulig ha kada usa nga bata nga mahibaro han panhunahuna ni Jehova han mga butang. (Deuteronomio 4:9; 6:6, 7; Proberbios 3:11; 22:6) Ha relaks nga palibut hinin espirituwal nga pagtarampo, an nagmamangno nga amay namamati hin maopay samtang nagyayakan an iya mga anak. Ginagamit an maloloy-on nagtutugway nga mga pakiana basi hibaroan an tangkod nga mga ekspresyon tikang ha ira mahitungod han ira mga pagtagad ngan mga paggios. An amay diri naghuhunahuna nga maaram hiya han ngatanan nga nahitatabu ha ira batan-on nga mga hunahuna. Tinuod, nga “an nahatag han baton nga diri pa hiya nakakabati, amo an kalurongan ngan kaalohan ha iya,” siring han Proberbios 18:13. Yana nga adlaw, kadam-an nga mga ginikanan an maaram nga an mga kahimtang nga inaatubang han ira mga anak kaiba gud hadton ira naeksperiensiahan mismo han batan-on pa hira. Salit, an amay mangangalimbasug ha paghibaro han tinikangan ngan mga detalye han problema antes magyakan kon paonan-o ito sadang sulbaron.—Itanding an Jakobo 1:19.
6 Ano an nahitatabu katapos nga hinbabaroan an mga problema, mga pangarit, ngan mga paggios han mga anak han usa? An amay nga nangunguna hin maopay nakonsulta ha Kasuratan, nga “mapulsanon ha pagtutdo, ha pagsaway, ha pagtadong han mga butang, ha pagdisiplina ha katadongan.” Nagtututdo hiya ha iya mga anak kon paonan-o bubuhaton an inspirado nga mga giya han Biblia. Hini nga paagi, adton mga batan-on nagigin “bug-os nga takus, bug-os nga nasangkapan para han ngatanan maopay nga buhat.”—2 Timoteo 3:16, 17, NW; Salmo 78:1-4.
7 An diosnon nga mga batan-on naatubang han makuri nga mga kahimtang may kalabutan han kalibotanon nga mga kaeskwela. Salit paonan-o maiibanan han mga amay an mga kahadluk han ira mga anak? An usa nga paagi amo an pinaagi han regular nga pag-ampo upod nira ngan para ha ira. Kon naatubang ini nga mga batan-on han makuri nga mga kahimtang, sigurado nga susubaron nira an pagsarig ha Dios han ira mga ginikanan. Usa ka 13-anyos nga bata nga babaye an gin-interbiyu antes bawtismohan sugad nga simbolo han iya dedikasyon ha Dios, nagsaysay nga naeksperiensiahan niya an pagtamay ngan pag-abuso tikang ha iya mga kaeskwela. Han depensahan niya an iya basado-ha-Biblia nga pagtoo ha pagkabaraan han dugo, an iba nga kabataan naghampak ha iya ngan gintuprahan hiya. (Buhat 15:28, 29) Binulos ba hiya? Waray. “Nag-inampo ako kan Jehova nga buligan niya ako nga magpabilin nga kalmado,” siring niya. “Nahinumduman ko liwat an igintutdo ha akon han akon mga ginikanan ha amon pamilya nga pag-aram mahitungod han pagpabilin nga nagpupugong ilarum han maraut nga kahimtang.”—2 Timoteo 2:24.
8 An tigurang nga waray mga anak makakahimo liwat hin maopay espirituwal ngan materyal nga mga tagana para hadton aada ha iya panimalay. Nag-uupod ini han iya asawa ngan bangin nadepende Kristiano nga mga paryente nga nag-uukoy ha iya balay. (1 Timoteo 5:8) Salit an panguna hin maopay amo an usa han mga kinahanglanon nga kinahanglan maabut han tawo nga pinili ha pagpas-an han responsibilidad sugad nga tigurang ha kongregasyon. Mationan-o, kon sugad, iisipon han pinili nga katigurangan an ira pribilehiyo nga mga responsibilidad ha kongregasyon?
Panguna “ha Totoo nga Kadasig”
9 Ha siyahan nga siglo han aton Komon nga Panahon, hi apostol Pablo nag-alagad sugad nga tinapuran ha panimalay han Dios, an Kristiano nga kongregasyon ilarum han pagkaulo ni Kristo. (Efeso 3:2, 7; 4:15) Ha baylo, ginsagda ni Pablo an iya igkasi magtinoohon ha Roma: “Tungod kay . . . mayada kita magkalainlain nga mga hatag sumala han diri-takus nga kalooy nga iginhatag ha aton, kon ha panagna, managna kita sumala han kadaku han aton pagtoo; o kon ha pagkaministro, ihatag ta an aton bug-os nga kusug ha pagkaministro; o hiya nga nagtututdo, magtutdo hiya; o hiya nga naglalaygay, maglaygay hiya; hiya nga nahatag, maghatag hiya hin kinasingkasing; hiya nga nangunguna, buhaton niya ito ha totoo nga kadasig; hiya nga nagbubuhat hin kalooy, magmalipayon hiya.”—Roma 12:6-8, NW.
10 Ginpahinumdum ni Pablo an mga taga-Tesalonika: “Sugad hin usa nga amay ha iya kalugaringon nga mga anak nag-aaghat kami ha tagsatagsa ha iyo, ngan nagliliaw ngan nagtetestigo ha iyo, basi magpadayon kamo nga naglalakat nga takus ha Dios nga nagtatawag ha iyo ngadto ha iya ginhadian ngan kahimayaan.” (1 Tesalonika 1:1; 2:11, 12, NW) An pagsagda iginhatag ha sugad kahumok, mahigugmaon nga paagi nga hi Pablo nakagsurat: “Nagin mahumok kami ha butnga niyo, sugad hin usa nga yaya nga nag-uugay ha iya kalugaringon nga mga anak. Salit, tungod kay naghigugma gud kami ha iyo, karuyag namon ihatag ha iyo, diri la an maopay nga sumat han Dios, kondi sugad man an amon kalugaringon nga mga kalag, tungod kay mga hinigugma kamo namon.” (1 Tesalonika 2:7, 8, NW) Uyon han sugad-amay nga susbaranan ni Pablo, an maunongon nga katigurangan mayada hilarum nga pagtagad para han ngatanan ha kongregasyon.
11 An kahumok, upod an kadasig, kinahanglan amo an kalidad han mahigugmaon nga pagmangno nga binubuhat han aton matinumanon Kristiano nga mga magbarantay. An ira paggawi nagpapakita gud hito. Hi Pedro nagsasagdon ha mga tigurang nga bantayan an panon han Dios “diri nga pinirit” o “tungod ha gugma han malimbong nga ganansia.” (1 Pedro 5:2, NW) Hini nga punto, an eskolar nga hi William Barclay nagpahayag hin pahamangno, nagsusurat: “Mayada paagi han pagkarawat han katungdanan ngan han paghatag hin pag-alagad nga baga in makaharadluk ito ngan baga in diri maopay nga buhat ito, baga in makapoy ito, baga in mabug-at an masinahan. Posible para han tawo nga hangyoon nga buhaton an usa ka butang, ngan para ha iya nga buhaton ito, kondi an pagbuhat hito ha sugad diri-maloloy-on nga paagi nga nadadaut an bug-os nga buhat. . . . Kondi [hi Pedro] nasiring nga an tagsa nga Kristiano sadang mangurog nga madasigon ha paghatag han sugad nga pag-alagad nga mahihimo niya, bisan kon maaram gud hiya nga hiya diri-takus ha paghatag hito.”
Kinaburut-on nga mga Magbarantay
12 “Bantayi an panon han Dios nga aada ha iyo . . . nga kinaburut-on,” an pagsagda liwat ni Pedro. An Kristiano nga paramangno nga nagmamangno han mga karnero nagbubuhat hito nga kinaburut-on, ha iya kalugaringon nga kaburut-on, ilarum han pagtugway han Maopay nga Magbarantay, hi Jesu-Kristo. An pag-alagad nga “kinaburut-on” nangangahulogan nga an Kristiano nga magbarantay nagpapasakop ha awtoridad ni Jehova, ‘an magbarantay ngan paramangno han aton mga kalag.’ (1 Pedro 2:25) An Kristiano nga kabulig nga magbarantay kinaburut-on nga nagpapakita hin pagtahud ha teokratiko nga kahikayan. Binubuhat niya ito kon tinutugwayan niya adton namimiling han sagdon ha Pulong han Dios, an Biblia. Bisan kon an eksperiensia mabulig ha tigurang ha pagtukod hin bodega han basado-ha-Biblia nga sagdon, diri ini nangangahulogan nga magkakaada hiya han Kasuratanhon nga kasulbaran ha tagsa nga problema nga andam dayon. Bisan kon maaram hiya han baton ha usa ka pakiana, maaramon para ha iya upod an nagpapakiana nga konsultahon an Watch Tower Publications Index o an pariho nga mga indese. Nagtututdo hiya kon sugad ha duha nga paagi: Iya ipinapakita kon paonan-o makikita an nakakabulig nga impormasyon ngan mapainubsanon nga ipinapakita an pagtahud kan Jehova pinaagi ha pagtugway han atension ngada ha iginpublikar han organisasyon han Dios.
13 Ano an mahihimo han tigurang kon waray iginpublikar ha literatura han Sosiedad ha espisipiko nga problema hiton nga takna? Sigurado, mag-aampo hiya para han pagsabut ngan magsasaliksik para han pipira mga prinsipyo ha Biblia nga may kalabutan hiton nga butang. Bangin mapulsanon liwat para ha iya nga maghatag suhestion ha tawo nga namimiling hin bulig nga tagdon an susbaranan ni Jesus. An tigurang mahimo magpakiana: “Kon hi Jesus, an Daku nga Magturutdo, aada ha imo kahimtang, ano ha hunahuna mo an iya bubuhaton?” (1 Korinto 2:16) An sugad nga pangatadongan bangin makabulig ha nagpapakiana nga maghimo hin maaramon nga desisyon. Kondi diri-maaramon gud para han tigurang nga maghatag hin personal nga opinyon nga baga in maopay Kasuratanhon ito nga sagdon! Lugod, mahimo paghisgutan han mga tigurang an makuri nga mga problema ha usa kag usa. Mahimo pa ngani nira paghisgutan an importante nga mga butang ha katirok han grupo han mga tigurang. (Proberbios 11:14) An magigin mga desisyon makakahimo ha ira ngatanan nga magyakan ha pagkaurosa.—1 Korinto 1:10.
Importante an Kaaghup
14 An Kristiano nga tigurang kinahanglan magpakita hin kaaghup kon nagtututdo ha iba, labi na kon nagsasagdon ha ira. “Mga kabugtoan,” nagsasagdon hi Pablo, “bisan kon an tawo nagtalapas antes hiya mahibaro hito, kamo nga mayada espirituwal nga mga kalipikasyon pabalikon unta hiya niyo ha espiritu han kaaghup.” (Galasia 6:1, NW) Interesante, an Griego nga pulong nga iginhubad dinhi “pabalikon” nagsasaysay han usa ka termino ha pag-opera nga ginagamit ha pagsaysay han pagtadong han tul-an basi malikyan an hilawig nga kabilinggan. An lexicographer nga hi W. E. Vine nagsasaysay hini ha pagpabalik “hadton espirituwal, ha usa nga nakasala, an sugad nga usa pariho han nahilisa nga bahin han espirituwal nga lawas.” An iba nga mga hubad amo an, “pabalikon ha husto nga posisyon; tadongon.”
15 Diri masayon an pagpabalik ha kalugaringon nga panhunahuna han usa, ngan makuri hinduro an pagtadong han mga panhunahuna han nagsasayop nga tawo. Kondi an bulig nga iginhatag ha espiritu han kaaghup sigurado nga kakarawaton nga may pagpasalamat. Salit, sadang sundon han Kristiano nga mga tigurang an sagdon ni Pablo: “Manul-ut kamo han mahumok nga kasingkasing han pagpaid, kalooy, pagpaubos, kaaghup, ngan pagpailub.” (Kolosas 3:12, NW) Ano an sadang buhaton han mga tigurang kon an indibiduwal nga nagkikinahanglan nga pabalikon mayada maraut nga paggios? Sadang nira “igpadayon . . . an kaaghup ha hunahuna.”—1 Timoteo 6:11, NW.
Pagbantay Upod an Pag-ikmat
16 Mayada labaw pa han sagdon ni Pablo ha Galasia 6:1 (NW). Iya ginsasagda an kalipikado ha espirituwal nga kalalakin-an: “Pabalikon unta hiya [an nagsayop] niyo ha espiritu han kaaghup, pagtan-aw man ha imo kalugaringon, bangin ikaw naman in pagsulayon.” Seryoso gud an mga resulta kon an sugad nga sagdon diri sinusunod! Tungod han mga sumat han Anglikano nga klero nga salaan ha pag-adulteryo ha duha nga mga parasingba, an The Times han London nagsiring nga ini an “waray kataposan nga kahimtang: usa nga nagsasagdon, bangin sugad hin amay o sugad hin bugto nga lalaki nga nahulog ha mga pagsulay han pagsarig han usa nga iya sinasagdonan.” Gin-unabi liwat han kulumnista han pahayagan an mga pag-angkon ni Dr. Peter Rutter nga “an malimbong nga mga buhat butnga han mga pasyente ngan han ira lalaki nga mga magsaragdon—mga doktor, mga abogado, mga padi ngan mga amo—nagin diri-kinikilala, nakakadaut ngan makaaralo nga peste, ha aton sosiedad nga matinuguton ha seksuwal nga buhat.”
17 Diri naton sadang hunahunaon nga an katawohan ni Jehova luwas na ha sugad nga mga pagsulay. Usa ka talahuron nga tigurang an nag-alagad nga matinumanon hin mga tuig an nakabuhat hin imoralidad tungod kay binisita hiya ha inasaw-an nga bugto nga babaye nga nag-uusahan la hiya. Bisan kon mabinasulon, nawara han bugto nga lalaki an ngatanan nga iya mga pribilehiyo ha pag-alagad. (1 Korinto 10:12) Paonan-o, kon sugad, mahihimo han pinili nga mga tigurang an mga pagbisita ha paagi nga diri hira mahuhulog ha pagsulay? Paonan-o hira makakaghikay para han pagkapribado, para han pag-ampo, ngan para han higayon ha pagkonsulta ha Pulong han Dios ngan Kristiano nga mga publikasyon?
18 Usa nga butang nga angay isipon han mga tigurang amo an prinsipyo han pagkaulo. (1 Korinto 11:3) Kon an usa ka batan-on namimiling hin giya, pangalimbasug nga iupod an iya mga ginikanan ha paghisgut kon angayan. Kon an inasaw-an nga bugto nga babaye naghahangyo hin espirituwal nga bulig, mahimo daw kamo maghikay para han iya bana nga presente durante han pagbisita? Anoman kon imposible o diri-matinoohon an bana nga inaabuso hiya ha pipira nga paagi? Niyan paghimo hin pariho nga mga kahikayan kon nabisita ha solo nga bugto nga babaye. Maaramon para han duha kalipikado ha espirituwal nga bugto nga lalaki nga bumisita nga magkaupod ha bugto nga babaye. Kon diri ini angayan, bangin mahimo pilion an angayan nga panahon para han duha nga bugto nga lalaki nga maghisgut upod ha iya ha Kingdom Hall, labi na ha kuwarto nga pribado. Sigurado nga malilikyan an anoman nga hinungdan han pakapakdol kon an iba nga kabugtoan nga kalalakin-an ngan kababayin-an presente ha katirokan, kondi diri nakakakita ngan nakakabati han paghisgut.—Filipos 1:9, 10.
19 An kinaburut-on nga pagbantay han mga karnero han Dios nagdadara hin maopay nga mga resulta—usa ka makusug ha espirituwal, tinugwayan-hin-maopay nga panon. Pariho kan apostol Pablo, an Kristiano nga mga tigurang yana nga adlaw mayada daku nga pagtagad ha igkasi magtinoohon. (2 Korinto 11:28) Labi nga mabug-at an responsibilidad han pagbantay han katawohan han Dios hinin magpakalilisang nga mga panahon. Salit, mapasalamaton gud kita han maopay nga buhat nga ginbubuhat han aton kabugtoan nga kalalakin-an nga nag-aalagad nga mga tigurang. (1 Timoteo 5:17) Tungod ha pagbendisyon ha aton hin “mga hatag nga kalalakin-an” nga kinaburut-on nga nagbabantay, gindadayaw naton an Humaratag han “ngatanan magopay nga hatag ngan ngatanan hingpit nga hatag,” an aton mahigugmaon langitnon nga Magbarantay, hi Jehova.—Efeso 4:8; Jakobo 1:17.
1. Kay ano nga sadang laoman naton an Kristiano nga mga tigurang nga ‘kinaburut-on nga nagbabantay han panon han Dios’?
2. Ano nga mga pakiana an angay paghisgutan mahitungod han nagbabantay nga mga buruhaton han Kristiano nga mga tigurang?
3. Kay ano nga masisiring nga an paagi han pagmangno han Kristiano nga tawo ha iya pamilya may epekto kon hiya ba kalipikado nga magin magbarantay ha kongregasyon?
4. Dugang pa ha pagkaada regular nga pag-aram ha Biblia ngan pag-ampo, paonan-o ipinapakita han Kristiano nga mga ginikanan an ira gugma ha ira mga pamilya?
5. Paonan-o minamangnoan han Kristiano nga amay an iya mga anak “ha disiplina ngan paglaygay ni Jehova”?
6. Kay ano nga sadang konsultahon han Kristiano nga amay an Pulong han Dios kon binubuligan an iya pamilya?
7. Ano nga susbaranan an sadang ipakita han Kristiano nga mga amay may kalabutan han pag-ampo?
8. Oonan-on han tigurang nga waray mga anak an panguna hin maopay ha iya panimalay?
9. Ano nga paggios an sadang ipakita han Kristiano nga mga tigurang ha ira mga toka han pag-alagad?
10. Ha pagmangno ha panon han Dios, ano nga susbaranan an ipinakita ni Pablo para han mga tigurang yana nga adlaw?
11. Paonan-o maipapakita han pinili nga mga tigurang an kadasig?
12. Paonan-o maipapakita han Kristiano nga mga tigurang an pagin kinaburut-on?
13. Ano nga mga pitad an mahimo buhaton ha pagbulig ha mga tigurang ha paghatag hin maopay nga sagdon?
14, 15. Ano an ginkikinahanglan ha mga tigurang kon ginpapabalik an Kristiano nga ‘nagtalapas antes hiya mahibaro hito’?
16, 17. Kontra han ano nga mga peligro sadang mag-ikmat an mga tigurang kon nagsasagdon ha iba?
18. (a) Paonan-o an pagbuhat han prinsipyo han pagkaulo nabulig ha mga tigurang nga malikyan an nagkokompromiso nga mga kahimtang? (b) Ano nga mga kahikayan an mahihimo para ha pagbisita ha bugto nga babaye?
19. An kinaburut-on nga pagbantay ha mga karnero han Dios nagdadara hin magopay nga mga resulta, ngan kan kanay kita nagpapasalamat para han kinaburut-on nga mga magbarantay?
An Kristiano nga tigurang kinahanglan nangunguna hin maopay ha iya panimalay
An Kristiano nga pagbantay sadang buhaton ha kaaghup ngan maopay nga paghukom
Paonan-o Mo Babatunon?
◻ Oonan-on han tawo an panguna hin maopay ha iya panimalay?
◻ Ano nga mga kalidad an sadang magtigaman han pagmangno han Kristiano nga mga tigurang?
◻ Paonan-o maipapakita han mga tigurang an pagpaubos ngan kaaghup ha paghatag hin sagdon?
◻ Ano an nabulig ha paghimo nga epektibo an espirituwal nga pagpabalik?
◻ Paonan-o malilikyan han mga tigurang an nagkokompromiso nga mga kahimtang kon nagbabantay han panon?