Pakadto ha sulod

Pakadto ha mga sulod

 MAY-ADA BA NAGDISENYO HITO?

An Muhok-Buhok han Tahong

An Muhok-Buhok han Tahong

PARIHO han sisi, an tahong nadukot ha bato, kahoy, ngan ha kasko han barko. Pero diri pariho han sisi nga nadukot hin maopay, an tahong nakapyot pinaagi han manipis nga mga muhok-buhok hito nga gintatawag nga byssus. Bisan kon nakakabulig ini ha ira pagkaon ngan pagbalhin, an muhok-buhok baga hin diri marig-on ngan diri makakailob han pagpusak han mga balud. Paonan-o nakakabulig an muhok-buhok basi makapabilin nga nakapyot ngan diri naaanod an tahong?

Tagda ini: An muhok-buhok han tahong may bahin nga matig-a, ngan may bahin liwat nga mahumok ngan nauunat. Nadiskobrehan han mga syentista nga an ratio nga ginagamit han tahong—80 porsyento nga matig-a nga materyales ngan 20 porsyento nga mahumok—an pinakamaopay nga ratio basi makadukot hin marig-on. Tungod hito, an muhok-buhok mahimo makailob han makusog nga pagduso ngan pagbutong han balud.

Para kan Professor Guy Genin, “nakakaimpres” ito nga nadiskobrehan, ngan hiya nagdugang: “An urusahon nga abilidad hini nga linarang resulta han maopay nga kombinasyon han mahumok nga bahin ngan han matig-a nga bahin.” Natoo an mga syentista nga an pagkadisenyo han muhok-buhok mahimo magin basihan para ha damu nga kapulsanan sugad han pagtaod hin equipment ha bilding, pag-ayad hin underwater nga sarakyan, pagpadukot hin litid ngada ha tul-an, ngan ha pagsara hin samad tungod hin operasyon. “Damu gud an urusahon nga linarang ha palibot nga makukuhaan hin kahibaro, kon may kalabotan ha pamaagi ha pagdukot,” siring ni J. Herbert Waite, usa nga propesor ha University of California ha Santa Barbara, E.U.A.

Ano ha imo panhunahuna? An muhok-buhok ba han tahong produkto han ebolusyon, o may nagdisenyo hito?