Pakadto ha sulod

Pakadto ha mga sulod

 BULIG PARA HA PAMILYA | PAG-ASAWA

Kon Paonan-o Magpapakita hin Respeto

Kon Paonan-o Magpapakita hin Respeto

AN PROBLEMA

An bana nasiring: “Kami nga mag-asawa may magkaiba nga panhunahuna may kalabotan ha kon paonan-o magpapakita hin respeto. Diri man nga an usa husto ngan an usa sayop, kondi magkaiba la kami. Agsob ko hunahunaon nga sadang unta magin mas matinalahuron an akon asawa ha pakiistorya ha akon.”

An asawa nasiring: “Bahin han kultura nga akon gindak-an an pagyakan ha daku nga tingog, pagkaada sobra nga ekspresyon han nawong, ngan pagsagbang kon may nag-iistorya. Para ha amon, diri ito kawaray-pagtahod. Pero iba gud ito ha gindak-an han akon bana.”

An pagtahod ha imo padis diri kalidad nga sadang ipakita hin panalagsa la; importante gud ito. Paonan-o mo maipapakita nga gintatahod mo an imo padis?

AN SADANG MO HIBAROAN

Labi nga nagkikinahanglan hin respeto an lalaki. Ha mga bana, an Biblia nagsiring: “Sadang higugmaon han tagsa ha iyo an iya asawa sugad han iya paghigugma ha iya kalugaringon.” Kondi ito nagdugang: “An asawa sadang magkaada daku nga respeto ha iya bana.” (Efeso 5:33) Bisan kon an bana ngan asawa kinahanglan umabat hin gugma ngan respeto, an bana labi nga nag-uuswag kon gintatahod hiya. “Kinahanglan abaton han lalaki nga maaatubang niya an mga sitwasyon, masusulbad an mga problema, ngan maaataman an iya pamilya,” siring han bana nga hi Carlos. * Kon ginrirespeto han asawa an iya bana tungod han sugad nga mga abilidad, diri la an iya bana an nagpapahimulos kondi pati hiya mismo. Hi Corrine nagsiring: “Kon nagpapakita ako hin pagtahod ha akon bana, mas labaw nga ginhihigugma ako niya.”

Kinahanglan liwat han asawa hin respeto. Natural la ito kay diri mahimo higugmaon han bana an asawa nga diri niya ginrirespeto. “Kinahanglan ko respetuhon an opinyon ngan suhestyon han akon asawa,” siring ni Daniel. “Kinahanglan ko liwat respetuhon an iya emosyon. An diri ko pakaintindi kon kay ano nga sugad an iya inaabat diri nangangahulogan nga sadang ko balewarayon ito.”

Iba-iba an opinyon han tawo may kalabotan ha pagtahod. An isyu, diri kon ginhuhunahuna mo nga nagpapakita ka hin respeto ha imo padis, kondi kon inaabat niya nga ginrirespeto mo hiya. Ini an leksyon nga hinbaroan han asawa nga gin-unabi kanina ha sub-ulohan nga “An Problema.” “Bisan kon para ha akon nagpapakita ako hin respeto, kondi waray ito maabat han akon bana, kinahanglan ko magbag-o.”

 AN IMO MAHIMO BUHATON

  • Isurat an tulo nga imo naruruyagan mahitungod ha imo padis. An magpakaruruyag nga kalidad nga imo nakita mahimo magin pundasyon han imo pagtahod ha iya.

  • Ha sulod hin usa ka semana, usisaha an imo panggawi (diri an kanan imo padis) may kalabotan ha masunod:

An imo mga pulong. Sumala ha usa nga surbey, “kon nagdidiskusyon an mga mag-asawa nga may malipayon ngan marig-on nga relasyon, lima nga positibo nga komento an ira nayayakan ha kada usa nga negatibo nga komento. Ha kabaliktaran, an mga mag-asawa nga may posibilidad nga magbulag nagyayakan hin waray ngani mag-usa (0.8) nga positibo nga komento ha kada usa nga negatibo nga komento.” *Prinsipyo ha Biblia: Proberbios 12:18.

Pakianhi an imo kalugaringon: ‘Matinalahuron ba ako nga nakikiistorya ha akon padis? Mas agsob ko ba minuson an akon padis kay ha kumendasyonan hiya? Ano an tono han akon tingog kon nagpapahayag ako hin obserbasyon o reklamo?’ Mauyon daw la an imo padis ha imo baton hini nga mga pakiana?—Prinsipyo ha Biblia: Colosas 3:13.

Sarihi ini: Himoa nga tumong nga maghatag ha imo padis hin usa nga kumendasyon kada adlaw. Suhestyon: Hunahunaa an mag-opay nga kalidad nga imo iginsurat kanina. Batasana an pagsumat ha imo padis kon ano an imo naruruyagan ha iya.—Prinsipyo ha Biblia: 1 Corinto 8:1.

An imo mga buhat. Hi Alicia nagsiring: “Daku nga panahon an akon gin-gagamit ha mga buruhaton ha balay, ngan kon an akon bana nagpapakita hin pagtahod ha akon mga pangalimbasog pinaagi ha paghipos han iya mga gamit o paghugas han iya kinaonan, naabat ako nga takos an akon mga pangalimbasog ngan importante ako ha amon pag-asawa.”

Pakianhi an imo kalugaringon: ‘An paagi ba han akon pagtratar ha akon padis nagpapakita hin respeto? Naghahatag ba ako ha iya hin igo nga panahon ngan atensyon?’ Mauyon daw la an imo padis ha imo baton hini nga mga pakiana?

Sarihi ini: Isurat an tulo nga paagi diin karuyag mo ipakita ha imo an respeto. Aghata an imo padis nga buhaton an pariho. Katapos, pagbalyoay kamo han iyo ginsurat basi hibaroan han tagsa ha iyo kon ano an iyo sadang pauswagon. Pagpokus ha mga aspekto diin kinahanglan mo ipakita an pagtahod. Kon mangangalimbasog an usa, posible gud nga masubad an usa.

^ par. 8 Ginsaliwnan an iba nga ngaran dinhi hini nga artikulo.

^ par. 14 Tikang ha libro nga Ten Lessons to Transform Your Marriage.