Pakadto ha sulod

Pakadto ha mga sulod

 MAY-ADA BA NAGDISENYO HITO?

An Maranggat nga Pagkaasul han Berry han Pollia

An Maranggat nga Pagkaasul han Berry han Pollia

AN GUDTIAY nga berry han Pollia condensata nga tanom nga mabibilngan ha Aprika, waray gud kapariho ha duro nga pagkaasul hito. Pero waray ito substansya han kolor nga asul. Ano an sekreto han maranggat nga kolor hito?

Tagda ini: An putos han mga selyula ha panit han berry may gudtiay hinduro nga mga lanot nga nakahan-ay pariho hin nakarumbay nga mga palito. Ini nga mga lanot nagluluon-luon, ngan an tagsa nga luon nakaanggulo hin guti ha ginsusundan nga luon, salit samtang nagdadamu an luon, nagtitika-spiral ito. Ini nga mga lanot diri asul an kolor. An kolor resulta kon paonan-o ginluon-luon an lanot. Salit an pagkahan-ay, diri substansya, an nakakahatag hin maranggat ngan nagbuburobag-o nga kolor hito nga berry. Kadam-an han selyula baga hin asul an kolor. Pero ha iba nga anggulo, baga hin nagigin berde, rosas, o dulaw ito tungod han pagkaiba-iba han kadakmol han pagkaluon. Dugang pa, kon uusisahon hin maopay, an mga kolor hito nagkakabangkabang ngan nagbuburobag-o pa ngani, depende kon diin nga anggulo kikitaon.

Tungod kay an berry han Pollia waray substansya han kolor, diri nalubad an kolor hito bisan kon waray na ito ha tanom. Ngani, an pipira nga berry nga nakolekta sobra 100 ka tuig na an naglabay presko la gihapon kitaon! Bisan kon an berry waray makakaon nga bahin, kondi mga liso la, nasiring an mga syentista nga naruruyagan gud ito han mga tamsi.

Natoo an mga syentista nga an berry han Pollia mahimo magin basihan ha paghimo hin mga produkto sugad han tina nga diri nalubad ngan mga papel nga diri napipeke.

Ano ha imo panhunahuna? An maranggat ba nga pagkaasul han berry han Pollia produkto han ebolusyon, o may nagdisenyo hito?