Sumala ha usa nga eksperto, nagkikinahanglan hin 21 ka adlaw basi mahiara an usa ha bag-o nga rutina. Kondi ha reyalidad, an mga pagsaliksik nagpapakita nga may mga tawo nga nagkikinahanglan hin gutiay la nga panahon—samtang an iba mas daku nga panahon—basi maghimo hin mga pagbag-o. Nakapaluya ba ito ha imo?

Tagda ini: Tumong mo nga regular nga mag-ehersisyo hin tulo ka beses kada semana.

• Han siyahan nga semana, nabuhat mo an imo tumong.

• Han ikaduha nga semana, waray ka makag-ehersisyo hin usa ka adlaw.

• Han ikatulo nga semana, naabot mo an imo tumong.

• Han ikaupat nga semana, haros diri ka na makag-ehersisyo.

• Han ikalima nga semana, naabot mo na liwat an imo tumong, ngan tikang hito nga takna, nabuhat mo ito kada semana.

Lima anay ka semana antes ka nahiara ha imo bag-o nga rutina. Baga hin hilawig ito nga panahon, kondi kon mahiara ka na hito, malilipay ka nga nakultibar mo an bag-o nga maopay nga rutina.

An Biblia nag-aaghat ha aton nga magkaada hirayo nga panlantaw. Ha kataposan, an importante diri kon pira ka beses kita napakulob, kondi kon pira ka beses kita bumangon.

• Ayaw hunahunaa nga kon mapakyas ka yana, diri ka na maglalampos. Paglaom hin kapakyasan samtang nangangalimbasog ka nga magin regular ha imo rutina.

• Pagpokus ha mga higayon nga nabuhat mo an husto. Pananglitan, kon karuyag mo mag-uswag an imo paagi ha pakig-istorya ha imo mga anak, pakianhi an imo kalugaringon: ‘Kakan-o pa adto an kataposan nga higayon nga karuyag ko guliatan an akon mga anak, kondi napugngan ko? Ano lugod an akon ginhimo? Paonan-o ko mabubuhat ito utro?’ Ito nga mga pakiana mabulig ha imo nga mahunahuna an imo kalamposan imbes an imo kapakyasan.

Karuyag mo ba hibaroan kon paonan-o ka mabubuligan han mga prinsipyo ha Biblia ha iba pa nga aspekto han kinabuhi, sugad han pag-atubang ha kabaraka, pagkaada malipayon nga pamilya, ngan pagkaada tinuod nga kalipay? Pakig-istorya ha usa nga Saksi ni Jehova, o kitaa an amon website nga jw.org/war.