Pakadto ha sulod

Pakadto ha mga sulod

 NANGUNGUNA NGA ARTIKULO

Kon Paonan-o Makukontrol an Imo mga Nahiaraan

Kon Paonan-o Makukontrol an Imo mga Nahiaraan
  • HAN nagtunog an alarm clock ni Austin, naghihingaturog pa hiya. Pero binuhat hiya dayon, nagliwan han iya igin-andam nga bado, ngan nag-jogging hin madaliay—sugad la han iya nahiaraan nga tulo ka beses ha usa ka semana han naglabay nga tuig.

  • Nag-away pa la hi Laurie ngan an iya bana. Kumadto hiya ha kusina nga naaaringit ngan nasisina, gin-abrihan an usa ka supot nga tsokolate, ngan gin-ubos ito—sugad la han iya ginbubuhat kon aringit hiya.

Ano an ginkakaparihoan nira Austin ngan Laurie? Maaram man hira o diri, hira nga duha apektado han makusog nga pwersa han ira mga nahiaraan.

Kumusta ka man? May-ada ba mag-opay nga rutina nga karuyag mo makultibar? Bangin karuyag mo regular nga mag-ehersisyo, temprano nga kumaturog, o magin mas duok ha imo mga hinigugma.

Ha luyo nga bahin, bangin karuyag mo iundang an magraot nga mga nahiaraan, sugad han panigarilyo, pagkinaon hin tsitseriya, o sobra nga pagkinompyuter.

Oo, makuri utdon an maraot nga nahiaraan. Ha pagkamatuod, iginpariho ito ha mapaso nga higdaan ha mahagkot nga panahon: masayon humigda dida hito kondi makuri bumaya!

Salit paonan-o mo makukontrol an imo mga nahiaraan basi magin mapulsanon ito para ha imo imbes nga makadaot? Tagda an masunod nga tulo nga suhestyon nga iginbasar ha mga prinsipyo ha Biblia.