Pakadto ha sulod

Pakadto ha mga sulod

Pisikal nga Kahimsog

Pisikal nga Kahimsog

An Biblia diri libro han medisina. Pero may mga sagdon ito nga nakakabulig ha aton nga magin mahimsog. Kitaon naton an pipira nga prinsipyo ha Biblia nga makakabulig ha imo kahimsog.

ATAMANA AN IMO LAWAS

PRINSIPYO HA BIBLIA: “Waray pa tawo nga nangalas ha iya kalugaringon nga lawas, lugod iya ginpapakaon ngan ginmamayuyo ito.”​—Efeso 5:29.

AN KARUYAG SIDNGON: Ini nga prinsipyo nag-aaghat ha aton nga buhaton an aton mahihimo para magin mahimsog. Iginpapakita han usa nga pag-aram nga damu nga sakit an konektado ha estilo han pagkinabuhi. Salit kon pipilion mo hin maopay an paagi han imo pagkinabuhi magigin mas mahimsog ka.

AN IMO PUYDI HIMOON:

  • Nutrisyon. Atamana an imo kahimsog pinaagi hin pagkaon hin masustansya nga pagkaon ngan pag-inom hin igo nga kadamu hin tubig.

  • Magin Aktibo. An pagin aktibo nakakapahimsog anoman an imo edad, bisan kon may depekto ka ha lawas o may maiha na nga sakit. Bisan kon an imo kapamilya ngan mga doktor may maibubulig ha imo pag-ehersisyo, ikaw gud la an makakahimo hito!

  • Igo nga Katurog. An pagpiniraw mahimo magresulta hin grabe nga mga sakit. Tungod han diri husto nga pagprayoridad han ira mga buruhaton, damu nga tawo an kulang hin katurog. Pero kon pipilion mo nga magkaada igo nga katurog, ginpipili mo nga magin mahimsog.

LIKYI AN BISYO

PRINSIPYO HA BIBLIA: “Limpyohan naton an aton kalugaringon ha ngatanan nga kahugaw ha unod ngan espiritu.”​—2 Corinto 7:1.

AN KARUYAG SIDNGON: Daku gud an benepisyo kon diri naton ginhuhugawan an aton lawas hin  nakakadaot nga mga substansya sugad han tabako, nga kilala nga nangunguna nga hinungdan han sakit ngan kamatayon.

AN IMO PUYDI HIMOON: Pag-eskedyol kon san-o ka maundang ha imo bisyo ngan markahi ito ha kalendaryo. Antes hito nga adlaw, ilabog an imo mga sigarilyo, ashtray, lighter, ngan iba pa nga garamiton para hinin nakakadaot nga bisyo. Likyi an mga lugar diin may mga nagsisigarilyo. Isumat an imo desisyon ha imo kapamilya ngan kasangkayan para suportaran ka nira.

IBA PA NGA PRINSIPYO HA BIBLIA

Mahimo ka magkaada hin inimprinta nga kopya han Biblia pinaagi ha pagkontak ha mga Saksi ni Jehova ha iyo lugar

MAGIN MAHUNAHUNAON HA PAGIN TALWAS.

“Kon magtukod ka hin bag-o nga balay, kinahanglan maghimo ka liwat hin barandilya para ha imo atop, basi waray mahulog tikang hito ngan diri magin salaan ha dugo an imo panimalay.”​—DEUTERONOMIO 22:8.

KONTROLA AN IMO KASINA.

“An tawo nga diri madagmit masina hura hin husto nga pagturotimbang, pero an tawo nga diri pasensyoso nagpapakita han iya kalurongan.”​—PROBERBIOS 14:29.

LIKYI AN SOBRA NGA PAGKINAON.

“Diri ka unta magin usa han . . . mga nagpapatakas hin karne.”​—PROBERBIOS 23:20.