Pakadto ha sulod

Pakadto ha mga sulod

 BULIG PARA HA NAMATAYAN HIN HINIGUGMA

An Pinakamaopay nga Bulig ha mga Nagtataguminatay

An Pinakamaopay nga Bulig ha mga Nagtataguminatay

AN KASAKIT HAN KAMATYI HIN HINIGUGMA USA HAN PINAKAGIN-UUSISA GUD NGA TOPIKO HA MODERNO NGA PANAHON. Kondi sugad han nahisgotan na, an pinakamaopay nga sagdon han mga eksperto agsob nga uyon ha kinaadman han Biblia. Nagpapakita gud ini han pagin diri nadadaan nga giya han Biblia. Kondi an Biblia diri la nagsusulod hin masasarigan nga sagdon. Nagtatagana liwat ito hin mga impormasyon nga makakaghatag hin diri matupngan nga pagliaw nga diri mabibilngan ha iba nga barasahon.

  • Pasarig nga an aton patay na nga mga hinigugma diri nag-aantos

    “An mga patay diri maaram han bisan ano,” siring han Eklesiastes 9:5. An ira “hunahuna nawawara.” (Salmos 146:4) Uyon hini, iginpapariho han Biblia an kamatayon ha mahimyang nga pagkaturog.​—Juan 11:11.

  • Nakakahatag hin pagliaw an marig-on nga pagtoo ha mahigugmaon nga Dios

    An Salmos 34:15 nasiring: “An mga mata ni Jehova * ngadto ha mga magtadung, ngan binubuka niya iton iya talinga ngadto ha ira singgit.” An pagpahayag han aton pagbati ha pag-ampo labaw pa hin maopay nga terapi, o paagi basi maipahungaw an aton mga inaabat. Ha pagkamatuod, nabulig ito nga magkaada kita marig-on nga relasyon ha aton Maglalarang, nga mahimo magliaw ha aton pinaagi han iya gahum.

  • Paglaom hin mas maopay nga tidaraon

    Handurawa an tidaraon diin an mga aadto ha lubnganan babanhawon dinhi ha tuna! Pauroutro nga gin-unabi ito han Biblia. Ha paghulagway han magigin kahimtang han tuna hito nga panahon, an Biblia nasiring nga “papahiron [han Dios] an mga luha ha [aton] mga mata, ngan mawawara na an kamatayon, pati an kabido, pagtangis, ngan kasakit.”​—Pahayag 21:3, 4.

Damu han natoo kan Jehova an nabuligan gud ha pag-atubang han duro nga kasubo tungod kay naglalaom hira nga makikita nira utro an ira patay na nga mga hinigugma. Pananglitan, hi Ann nga 65 ka tuig nga inasaw-an nagsiring han mamatay an iya bana: “Ginpapasarig ako han Biblia nga diri nag-aantos an amon patay na nga mga hinigugma, ngan babanhawon han Dios an ngatanan nga aada ha iya panumdoman. Ini an akon ginpapamalandong ha kada panahon nga nahuhunahuna ko an akon hinigugma nga namatay na, ngan sugad nga resulta, nalalamposan ko an pinakamaraot gud nga nahitabo ha akon!”

Hi Tiina, nga gin-unabi han naglabay nga mga artikulo, nagsiring: “Tikang han mamatay hi Timo, inabat ko an bulig han Dios. Nakita ko gud an bulig ni Jehova durante han magkuri nga panahon. Ngan an saad han Biblia nga pagkabanhaw tinuod gud para ha akon. Nagpaparig-on ito ha akon nga magpadayon tubtob nga makita ko utro hi Timo.”

Nagpaparig-on ini han gintotoohan han minilyon han pagkamasasarigan gud han Biblia. Bisan kon ha imo pag-abat diri posible o usa la nga inop an siring han Biblia, mas maopay kon imo uusisahon kon kay ano nga masisiring nga masasarigan an mga sagdon ngan mga saad hito. Bangin mapamatud-an mo nga an Biblia amo an pinakamaopay nga bulig para ha mga nagtataguminatay.

MAHIBARO HIN DUGANG MAHITUNGOD HA PAGLAOM HAN MGA PATAY

Kitaa an video may kalabotan hini ha jw.org/war

An Biblia nagsasaad hin tidaraon diin tatapoon naton an aton namatay na nga mga hinigugma

 ANO AN KAHIMTANG HAN MGA PATAY?

Ano an mahitatabo ha aton kon kita mamatay? An matin-aw nga baton han Biblia nakakaliaw ngan naghahatag hin paglaom

Kitaa an PUBLIKASYON > VIDEO (Kategoriya han Video: An Biblia)

KARUYAG MO BA HIN MAOPAY NGA SUMAT?

Tungod han damu nga maraot nga sumat, diin ka makakabiling hin maopay nga sumat? Iginpipresentar hini nga video an brosyur nga Maopay nga Sumat Tikang ha Dios!

Kitaa an PUBLIKASYON > VIDEO (Kategoriya han Video: Amon Katirok Ngan Ministeryo)

^ par. 7 Ha Biblia, Jehova an ngaran han Dios.